ការស្វែងយល់ពី Cao Bang៖ បទពិសោធន៍ ៧ យ៉ាងដែលត្រូវតែធ្វើ

ស្ថិតនៅលើព្រំដែនរវាងប្រទេសចិន និងវៀតណាម Bản Giốc គឺជាទឹកធ្លាក់ធំជាងគេទីបួននៅលើពិភពលោក។ មានទទឹង ៣០០ ម៉ែត្រ ទំហំនៃទឹកធ្លាក់នេះពិតជាគួរឱ្យស្ញប់ស្ញែងយ៉ាងខ្លាំង។ ផ្ទៃដីដ៏ល្វឹងល្វើយ ព្រមទាំងជួរទឹកធ្លាក់ និងអាងទឹកផ្សេងៗគ្នានៅក្នុងឧទ្យាននេះ ពិតជាមានភាពទាក់ទាញយ៉ាងខ្លាំង។ ស្ថិតនៅក្នុងជ្រលងភ្នំដ៏ស្រស់ស្អាត និងព័ទ្ធជុំវិញដោយព្រៃឈើខៀវស្រងាត់ Bản Giốc ប្រៀបដូចជាឋានសួគ៌ផ្ទាល់ខ្លួនមួយ។ 

គន្លឹះ៖ ពេលវេលាល្អបំផុតក្នុងការទស្សនា គឺក្នុងអំឡុងរដូវប្រាំងចាប់ពីខែតុលា ដល់ខែមេសា។ នៅចុងរដូវប្រាំង ការបង្ហូរទឹកប្រចាំថ្ងៃចេញពីទន្លេ Quây Sơn ដែលគ្រប់គ្រងដោយទំនប់ទឹក កើតឡើងនៅចន្លោះម៉ោង ១០:៣០ ព្រឹក ដល់ម៉ោង ១:០០ រសៀល ដែលធ្វើឱ្យទឹកធ្លាក់នេះមានកម្លាំងទឹកហូរពេញលេញ។  

ការដើរក្នុងចម្ងាយខ្លីប៉ុន្តែចោទខ្លាំង នឹងនាំអ្នកទៅកាន់វត្តបែបប្រពៃណីវៀតណាមមួយនេះ។ ការរចនារបស់វត្ត Trúc Lâm គឺសមស្របឥតខ្ចោះទៅនឹងជើងភ្នំ។ នៅពេលអ្នកឡើងកាន់តែខ្ពស់ទៅកាន់តំបន់ព្រះវិហារដើម ជ្រលងភ្នំដែលពោរពេញទៅដោយភ្នំកំបោរ នឹងបង្ហាញខ្លួននៅខាងក្រោម។ វត្ត Trúc Lâm ជាទីតាំងដ៏ស្រស់ស្អាតមួយដែលមិនឆ្ងាយពីទឹកធ្លាក់ Bản Giốc ប៉ុន្មានទេ ហើយអ្នកអាចទស្សនាបានយ៉ាងងាយស្រួលក្នុងថ្ងៃតែមួយ។

ប្រព័ន្ធរូងភ្នំ Ngườm Ngao មានទម្រង់ថ្មលូតប្លែកៗ និងអស្ចារ្យបំផុតមួយចំនួននៅក្នុងអាស៊ីអាគ្នេយ៍។ នៅពេលអ្នកឈានជើងចូលទៅក្នុងរូងភ្នំ ទម្រង់ថ្មនឹងផ្លាស់ប្តូរទៅតាមរូងនីមួយៗ។ ប្រព័ន្ធរូងភ្នំទាំងមូលមានប្រវែង ២.១៤៤ ម៉ែត្រ ប៉ុន្តែអាជ្ញាធរមូលដ្ឋានបានបើកឱ្យភ្ញៀវទេសចរចូលទស្សនាត្រឹមតែ ៩៤៨ ម៉ែត្រប៉ុណ្ណោះ ដើម្បីរក្សាសោភ័ណភាពធម្មជាតិរបស់វា។

គន្លឹះ៖ កុំភ្លេចយកទឹកពិសាតាមខ្លួនសម្រាប់ដំណើរកម្សាន្តនេះ៖ ការដើរប្រហែលមួយគីឡូម៉ែត្រអាចចំណាយពេលមួយម៉ោង ឬច្រើនជាងនេះយ៉ាងងាយស្រួល។ 

បឹង Thang Hen ត្រូវបានបង្កើតឡើងដោយបឹងតូចៗចំនួន ៣៦ ដែលភ្ជាប់គ្នាទាំងអស់តាមរយៈរូងភ្នំ និងផ្លូវក្រោមដី។ នៅរដូវវស្សា ករម្រិតទឹកកើនឡើងបង្កើតបានជាបឹងតែមួយ ដែលបត់បែនតាមជ្រលងភ្នំកំបោរដែលមានប្រវែងជាង ៣០០ គីឡូម៉ែត្រ។ ទោះបីជាបឹងនេះមានទេសភាពដ៏ស្រស់ស្អាតដូចគំនូរក៏ដោយ ប៉ុន្តែទម្រង់ថ្ម និងទិដ្ឋភាពនៃជីវភាពរស់នៅប្រចាំថ្ងៃ គឺជាអ្វីដែលធ្វើឱ្យ Thang Hen សក្តិសមក្នុងការទស្សនា។ 

គន្លឹះ៖ ជួលមគ្គុទ្ទេសក៍ក្នុងស្រុកដើម្បីនាំអ្នកទៅកាន់ Tuyệt Tình Cốc ដែលត្រូវបានគេស្គាល់ផងដែរថាជាភ្នែកភ្នំ (The Mountains Eye)។ កំពូលភ្នំកំបោរតែមួយនេះ គឺជាទីតាំងនៃរូងភ្នំដែលទម្លុះពីម្ខាងទៅម្ខាងទៀត បង្កើតបានជារន្ធដ៏ធំសម្បើមមួយនៅលើភ្នំ។  

ខេត្ត Cao Bằng មានក្រុមជនជាតិភាគតិចជាង ៩ ក្រុម ដែលបានរស់នៅក្នុងជ្រលងភ្នំទាំងនេះអស់ជាច្រើនសតវត្សមកហើយ។ ជនជាតិ Tày, Nùng, Dao និង H’mong គឺជាក្រុមដែលល្បីល្បាញជាងគេ ហើយជនជាតិភាគតិចនីមួយៗមានសិប្បកម្ម និងរបៀបរស់នៅផ្ទាល់ខ្លួនដ៏ពិសេស។ ដើម្បីស្វែងយល់ពីវប្បធម៌ជនជាតិភាគតិច អ្នកអាចទៅទស្សនាភូមិសិប្បកម្មជនជាតិភាគតិចជាមួយមគ្គុទ្ទេសក៍ក្នុងស្រុក ឬកក់ការស្នាក់នៅបែប Homestay ជាមួយជនជាតិភាគតិចក្នុងអំឡុងពេលដំណើរកម្សាន្តរបស់អ្នក។

ដោយស្ថិតនៅជុំវិញទន្លេ Sông Bằng ទីក្រុង Cao Bằng បានរីកចម្រើនប្រែជាមជ្ឈមណ្ឌលអភិវឌ្ឍន៍ដ៏មមាញឹកមួយ។ ជាមួយនឹងជម្រើសសណ្ឋាគារ ហាងទំនិញ និងភោជនីយដ្ឋានតូចៗ ប៉ុន្តែមើលទៅសម័យទំនើប ទីក្រុងនេះជាទីតាំងដ៏ល្អឥតខ្ចោះសម្រាប់ការចាប់ផ្តើមរុករកផ្នែកផ្សេងទៀតនៃខេត្ត។ អ្នកនឹងប្រទះឃើញម្ហូបពិសេសប្រចាំតំបន់ភាគខាងជើងជាច្រើនដើម្បីសាកល្បងនៅក្នុងក្រុង ដូចជា Phở Chua (ហ្វើជូរ) និង Bánh Cuốn (នំបាញ់កួន)។ ទីក្រុង Cao Bang ក៏មានពិធីបុណ្យប្រពៃណីជាច្រើនដែលប្លែក និងមានតែនៅក្នុងតំបន់នេះផងដែរ។ 

តំបន់ប្រវត្តិសាស្ត្រ Pác Bó គឺជាវិមានរំលឹកគុណ និងជាសារមន្ទីរដែលត្រូវបានបង្កើតឡើងនៅលើទីតាំងដែលលោក Hồ Chí Minh បានចាប់ផ្តើមបដិវត្តន៍របស់លោក។ នៅទីនេះ អ្នកអាចមើលរូងភ្នំដែលលោក Ho Chi Minh ធ្លាប់រស់នៅលាក់ខ្លួន និងទន្លេដែលលោកធ្លាប់ស្ទូចត្រី និងតែងកំណាព្យ។ ការសម្តែងការគោរពដ៏មានអត្ថន័យចំពោះជីវិត និងស្នាដៃរបស់លោក Ho Chi Minh នេះ គឺជាទីកន្លែងគោរពបូជាដ៏សំខាន់មួយសម្រាប់ប្រជាជនវៀតណាម។

ការធ្វើដំណើរទៅកាន់ Cao Bang

ចម្ងាយផ្លូវពី Ha Noi ទៅកាន់ក្រុង Cao Bang គឺប្រមាណ ២៨០ គីឡូម៉ែត្រ។ រយៈពេលធ្វើដំណើរអាចចំណាយពេលប្រហែល ៨ ម៉ោង អាស្រ័យលើប្រភេទមធ្យោបាយធ្វើដំណើរ។ មានរថយន្តក្រុងធ្វើដំណើរនៅពេលថ្ងៃ និងពេលយប់ពី Ha Noi ទៅកាន់ Cao Bang។ រថយន្តក្រុងចេញដំណើរពីស្ថានីយរថយន្តក្រុង My Dinh។ ការជួលរថយន្តផ្ទាល់ខ្លួន និងកញ្ចប់ទស្សនកិច្ចជាក្រុមទៅកាន់ Cao Bang ក៏មានផ្តល់ជូនផងដែរ។ ភ្នាក់ងារទេសចរណ៍ក្នុងស្រុក និងតាមអនឡាញអាចជួយអ្នកកក់ការធ្វើដំណើររបស់អ្នកបាន។

ពេលវេលាដែលគួរទៅទស្សនា Cao Bang

ពេលវេលាដ៏ល្អបំផុតក្នុងការទៅទស្សនា Cao Bang គឺក្នុងរដូវប្រាំង ចាប់ពីខែតុលា ដល់ខែមេសា។ គួររំលឹកផងដែរថា តំបន់ភាគខាងជើងវៀតណាមអាចមានអាកាសធាតុត្រជាក់ខ្លាំងក្នុងអំឡុងខែរដូវរងា ចាប់ពីខែវិច្ឆិកា ដល់ខែកុម្ភៈ ដូច្នេះសូមរៀបចំសម្លៀកបំពាក់ឱ្យបានសមស្រប។ រដូវវស្សា — ចាប់ពីខែឧសភា ដល់ខែកញ្ញា នៅភាគខាងជើងវៀតណាម — អាចមានភាពស្រស់ស្អាត ប៉ុន្តែគ្រាន់តែត្រូវត្រៀមលក្ខណៈសម្រាប់អាកាសធាតុក្តៅ និងសើម។