កីឡាវាយកូនគោលនៅកោះភូគុក

នៅឆ្នាំ២០២១ ប្រទេសវៀតណាមនៅតែបន្តទទួលបានការគ្រងឈ្មោះជាគោលដៅវាយកូនហ្គោលល្អបំផុតនៅអាស៊ី (Asia’s Best Golf Destination) នៅក្នុងពានរង្វាន់ World Golf Awards ដ៏ល្បីល្បាញ ដែលជាពានរង្វាន់ដែលវៀតណាមឈ្នះបាន ៥ ឆ្នាំជាប់ៗគ្នាចាប់តាំងពីឆ្នាំ២០១៧។ ក្រៅពីនេះ ឆ្នាំ២០២១ គឺជាឆ្នាំទី ២ ដែលវៀតណាមមានកិត្តិយសទទួលបានពានរង្វាន់គោលដៅវាយកូនហ្គោលល្អបំផុតនៅលើពិភពលោក (World's Best Golf Destination Award) (២០១៩, ២០២១)។ តើអ្នកដឹងទេថា ប្រទេសនេះទទួលបានការសរសើរ និងពានរង្វាន់បែបនេះជាយូរមកហើយ? កាលពីឆ្នាំ២០១២ សមាគមអន្តរជាតិនៃប្រតិបត្តិករទេសចរណ៍វាយកូនហ្គោល (IAGTO) បានប្រសិទ្ធនាមវៀតណាមថាជា «គោលដៅវាយកូនហ្គោលមិនទាន់រកឃើញប្រចាំឆ្នាំ» (Undiscovered Golf Destination of the Year)។ ប្រាំពីរឆ្នាំក្រោយមក វៀតណាមបានយកឈ្នះពានរង្វាន់កំពូល − គោលដៅវាយកូនហ្គោលល្អបំផុតនៅលើពិភពលោក (World's Best Golf Destination)។

ប្រជាជនវៀតណាមកាន់តែច្រើនឡើងកំពុងចាប់អារម្មណ៍លើកីឡាក្រៅផ្ទះ។ អ្នកលេងកូនហ្គោលនៅទីនេះបានកើនឡើងពី ១០ ០០០ នាក់ ដល់ ៧០ ០០០ នាក់ រវាងឆ្នាំ២០០៩-២០១៨ – ដែលជាហេតុធ្វើឱ្យ linksmagazine.com ហៅវៀតណាមថាជា «ប្រទេសដែលមានការកើនឡើងនៃកីឡាវាយកូនហ្គោលលឿនបំផុតនៅលើពិភពលោក»។ ចំនួននេះត្រូវបានរំពឹងថានឹងបន្តកើនឡើងបន្ថែមទៀត។ សាកលវិទ្យាល័យជាតិវៀតណាមនៅហាណូយ បានបញ្ចូលកីឡាវាយកូនហ្គោលជាការសាកល្បងនៅក្នុងកម្មវិធីអប់រំកាយរបស់ពួកគេ។ ហើយសមាគមកីឡាវាយកូនហ្គោលវៀតណាមក៏បានចាប់ផ្តើមមូលនិធិអភិវឌ្ឍន៍កីឡាវាយកូនហ្គោលវ័យក្មេង ដើម្បីលើកកម្ពស់កីឡានេះក្នុងចំណោមយុវជនផងដែរ។

ការលេងកូនហ្គោលនៅវៀតណាម ក៏កាន់តែទាក់ទាញភ្ញៀវទេសចរបរទេសផងដែរ។ មុនពេលមានការរាតត្បាតជំងឺកូវីដ-១៩ ចំនួនភ្ញៀវទេសចរដែលមកលេងកូនហ្គោលបានកើនឡើង ២០% ជាៀងរាល់ឆ្នាំ។ ធម្មជាតិត្រូពិច និងទេសភាពចម្រុះ បានទាក់ទាញអ្នកស្នេហាកីឡាវាយកូនហ្គោលដែលស្វែងរកវិស្សមកាលវាយកូនហ្គោលបែបលំហែកាយ និងមើលទេសភាព។ ការដែលវាជាគោលដៅដែលមានតម្លៃសមរម្យ ក៏បានទាក់ទាញអ្នកដែលចង់ស្នាក់នៅរយៈពេលយូរផងដែរ។

ប្រទេសនេះមានទីលានវាយកូនហ្គោលដ៏ស្រស់ស្អាតជាង ៣០ កន្លែង។ ប្លង់ទីលានមួយចំនួនត្រូវបានរចនាឡើងដោយវីរបុរសកីឡាវាយកូនហ្គោលល្បីៗ ដូចជា លោក Sir Nick Faldo, លោក Luke Donald និងលោក Greg Norman ជាដើម។

ទាក់ទងនឹងដំណើរទស្សនកិច្ចលើកដំបូងរបស់គាត់មកកាន់ប្រទេសនេះនៅដើមទសវត្សរ៍ឆ្នាំ២០០០ អ្នកលេងកូនហ្គោលអាជីពជនជាតិអូស្ត្រាលីរូបនេះបាននិយាយថា៖ «ខ្ញុំបានយល់យ៉ាងឆាប់រហ័សថា កីឡាវាយកូនហ្គោលនឹងក្លាយជាកម្លាំងចលករសេដ្ឋកិច្ចសម្រាប់ប្រទេសនេះ។ ក្នុងនាមខ្ញុំជាអ្នករចនាប្លង់ម្នាក់ និងក្រុមការងាររបស់ខ្ញុំ បានធ្លាក់ក្នុងអន្លង់ស្នេហ៍ជាមួយនឹងអ្វីដែលវៀតណាមអាចផ្តល់ជូនតាមរយៈកីឡាវាយកូនហ្គោល»។

លោក Norman បានក្លាយជាអគ្គរាជទូតទេសចរណ៍សម្រាប់ប្រទេសវៀតណាម ដោយផ្តល់ប្រឹក្សាអំពីទេសចរណ៍វាយកូនហ្គោលប្រកបដោយចីរភាព និងលើកទឹកចិត្តអ្នកលេងកូនហ្គោលជុំវិញពិភពលោកឱ្យមកសាកល្បងវាយកូនហ្គោលនៅទីនេះ។ នៅក្នុងការផ្សាយពាណិជ្ជកម្មដ៏ទាក់ទាញមួយ អ្នកឈ្នះពានរង្វាន់ World Golf Hall of Fame រូបនេះបាននិយាយថា «មនុស្សម្នាធ្វើដំណើរមកកាន់វៀតណាមដើម្បីមើលទេសភាព វប្បធម៌ និងម្ហូបអាហារ។ ខ្ញុំធ្វើដំណើរមកទីនេះដើម្បីចំណុចទាំងនោះ បូករួមទាំងការលេងកូនហ្គោលនៅលើទីលានដ៏ល្អបំផុតមួយចំនួននៅលើពិភពលោក។ ជួបគ្នានៅលើទីលានវាយកូនហ្គោលក្នុងប្រទេសវៀតណាម»។

អ្នកលេងកូនហ្គោលដឹងយ៉ាងច្បាស់ថា៖ គ្មានអ្វីប្រៀបស្មើនឹងការលេងកូនហ្គោលនៅតាមតំបន់ជាប់ឆ្នេរសមុទ្រនោះទេ។ កោះភូកុកត្រូវបានព័ទ្ធជុំវិញដោយទឹកសមុទ្រពណ៌ខៀវស្រងាត់ដ៏ស្អាតប្លែក ដែលធ្វើឱ្យភ្ញៀវទេសចរមិនចេះកើនទ្រលាន់។ នៅភាគខាងជើងដ៏បរិសុទ្ធ មានទីលានវាយកូនហ្គោល ២៧ រន្ធ ដែលអ្នកអាចលេងបាន ៣ ជុំ (ជុំនីមួយៗ ៩ រន្ធ) នៅជាប់មាត់សមុទ្រ។ ការរចនាទីលានទំហំ ១០០ ហិកតានេះ ទទួលបានគំនិតច្នៃប្រឌិតចេញពីទីលានវាយកូនហ្គោលជាប់ឆ្នេរសមុទ្រដ៏ទាក់ទាញបំផុតមួយចំនួននៅលើពិភពលោក។ ទោះជាយ៉ាងណាក៏ដោយ សម្រស់ធម្មជាតិរបស់វាគឺពិតជាមានលក្ខណៈពិសេសបែប «ភូកុក» ផ្ទាល់តែម្តង។ ភូមិសាស្ត្រក្នុងស្រុក រួមមានតំបន់សមុទ្រ និងព្រៃឈើ ត្រូវបានបញ្ចូលគ្នាយ៉ាងផ្ចិតផ្ចង់ទៅក្នុងទីលានដ៏ប្រកួតប្រជែងមួយ ដែលទាំងអ្នកទើបលេងថ្មី និងអ្នកអាជីពសុទ្ធតែចង់មកស្វែងយល់។ ទីលានពីរជុំត្រូវបានក្រាលកាត់តាមព្រៃត្រូពិចធម្មជាតិដ៏បរិសុទ្ធ។ ចំណែកឯមួយជុំទៀតមានបឹងដ៏ស្រស់ស្អាត ជាមួយនឹងទិដ្ឋភាពទូលំទូលាយនៃសមុទ្រចិនខាងកើត។ កម្រិតលំបាកខុសៗគ្នា ធានានូវបទពិសោធន៍ដ៏សម្បូរបែបសម្រាប់អ្នកលេង។

ពិតណាស់ បរិស្ថានធម្មជាតិគឺជាចំណុចទាក់ទាញបំផុត។ លានបាល់ជម្រាល និងតំបន់រាបស្មើដ៏ធំល្វឹងល្វើយកាត់តាមព្រៃឈើស្ទឹងដ៏ល្បីល្បាញ ដោយមានខ្យល់សមុទ្របក់បោកស្លឹកឈើនៅខាងលើថ្នមៗ។ នៅពេលអ្នកឆ្ពោះទៅមុខតាមផ្លូវវាយកូនហ្គោលដែលបានកាត់ស្មៅយ៉ាងស្អាតបាត អន្លង់ខ្សាច់ដែលបានរៀបចំយ៉ាងស្អាត និងតំបន់ព្រៃឈើ សូមក្រឡេកមើលសត្វព្រៃ ដូចជាសត្វឥន្ទ្រីសមុទ្រពោះស និងស្វារ៉កជាដើម។ លេងឱ្យគ្រប់ ៩ រន្ធ ដើម្បីក្រសោបយកអារម្មណ៍ស្រស់ស្រាយពីធម្មជាតិព្រៃឈើ និងទេសភាពសមុទ្រដ៏ស្ងប់ស្ងាត់។

អ្នកដែលធ្លាប់បានលេងកីឡាវាយកូនគោលនៅកោះភូគុក (Phú Quốc) បានវាយតម្លៃខ្ពស់ចំពោះលក្ខខណ្ឌទីលាន ល្បឿននៃការលេង និងបទពិសោធន៍សរុប។ រន្ធខ្សាច់ និងផ្លូវស្មៅគឺស្ថិតក្នុងស្ថានភាពល្អឥតខ្ចោះ មានឧបសគ្គទឹក ទម្រង់ដី និងផ្លូវកោងជាច្រើន ហើយបុគ្គលិកសម្រួលការលេង (caddies) គឺជួយបានយ៉ាងច្រើន។ តើអ្នកអាចសុំអ្វីបន្ថែមពីនេះទៀត?