ផ្លូវ Nguyen Hue បើកឆាកការប្រារព្ធពិធីបុណ្យចូលឆ្នាំ Tet ឆ្នាំ ២០២០
ទីក្រុងហូជីមិញ ប្រទេសវៀតណាម (ថ្ងៃទី ១៥ ខែវិច្ឆិកា ឆ្នាំ ២០១៩) – ក្រុមហ៊ុន Saigontourist និងទីក្រុងហូជីមិញ កំពុងអញ្ជើញភ្ញៀវទេសចរឱ្យមកកម្សាន្ត និងរីករាយជាមួយការប្រារព្ធពិធីបុណ្យចូលឆ្នាំ Tet នៅផ្លូវ Nguyen Hue ចាប់ពីថ្ងៃទី ២២ ដល់ថ្ងៃទី ២៨ ខែមករា ឆ្នាំ ២០២០។
នៅថ្ងៃឈានចូលដល់បុណ្យចូលឆ្នាំប្រពៃណី ផ្លូវដើរ Nguyen Hue ដែលស្ថិតនៅមជ្ឈមណ្ឌលប្រវត្តិសាស្ត្រនៃទីក្រុង នឹងមានការរៀបចំដំឡើងអំពូលភ្លើង និងផ្ការ៉េចរាយយ៉ាងច្រើនសន្ធឹកសន្ធាប់សម្រាប់សាធារណជនទស្សនា និងកម្សាន្ត។
ប្រធានបទនៃការប្រារព្ធពិធីឆ្នាំ ២០២០ «ទីក្រុងហូជីមិញ – ឈានទៅមុខដោយភាពជឿជាក់» បង្ហាញពីទីក្រុងធំមួយដែលកំពុងផ្លាស់ប្តូរយ៉ាងឆាប់រហ័ស។ ពិធីបុណ្យនេះនឹងបង្ហាញពីសារៈសំខាន់នៃការថែរក្សាប្រពៃណី ព្រមទាំងស្វាគមន៍ឆ្នាំជូត (ឆ្នាំកណ្ដុរ) ផងដែរ។ រូប mascot កណ្ដុរនឹងត្រូវរៀបចំដាក់នៅតាមបណ្ដោយផ្លូវ ហើយច្រកចូលទៅកាន់ផ្លូវដើរនេះ នឹងមានក្បូរក្បាច់រចនាដែលទទួលបានគំនិតច្នៃប្រឌិតចេញពីគំនូរប្រជាប្រិយ Dong Ho។
គម្រោងនេះគឺជាកិច្ចសហការរវាងសាលាក្រុងហូជីមិញ និងក្រុមហ៊ុន Saigontourist ដែលជាសហគ្រាសរដ្ឋគ្រប់គ្រងសណ្ឋាគារ ភោជនីយដ្ឋាន និងរៀបចំដំណើរទស្សនកិច្ចទូទាំងប្រទេសវៀតណាម។ លើសពីនេះ អាជីវកម្មផ្សេងៗនៅទូទាំងទីក្រុងក៏បានចូលរួមចំណែកក្នុងការតុបតែងលម្អដើម្បីអបអរសាទរផងដែរ។
លោក Truong Tan Son អគ្គនាយករងនៃក្រុមហ៊ុន Saigontourist បានចែករំលែកថា ពិធីបុណ្យនេះនឹងមាន «ការរួមបញ្ចូលគ្នាយ៉ាងសុខដុមរមនានៃសម្ភារមេត្រីភាពបរិស្ថាន ស្ថាបត្យកម្មទំនើប និងអត្ថន័យសង្គមវិជ្ជមាន។»