ដាណាំង – ដែនដីនៃពិធីបុណ្យ និងព្រឹត្តិការណ៍

ដើម្បីយល់ពីអ្វីដែលធ្វើឲ្យទីក្រុងដាណាំងមានការទាក់ទាញខ្លាំងនោះ គេគ្រាន់តែក្រឡេកមើលរូបភាពនៃទីក្រុងដ៏អស្ចារ្យនេះជាការស្រេច។ ជាញឹកញាប់ត្រូវបានគេចាត់ទុកថាជា «ទីក្រុងគួរឲ្យរស់នៅបំផុត» របស់វៀតណាម ទីក្រុងដាណាំងទទួលបានការប្រសិទ្ធពរដោយការរួមបញ្ចូលគ្នានៃបរិស្ថានធម្មជាតិដ៏ស្រស់ត្រកាល ការរៀបចំនិងការអភិវឌ្ឍក្រុងយ៉ាងល្អប្រសើរ អាកាសធាតុដ៏ល្អបំផុតមួយក្នុងពិភពលោក និងថាមពលយុវវ័យដ៏រំភើបនៃទីក្រុងដែលកំពុងរីកចម្រើន។ នៅលើឆ្នេរសមុទ្រភាគកណ្ដាលនៃវៀតណាម ទីក្រុងដាណាំងមានមេឃស្រឡះ និងថ្ងៃចែងចាំងស្ទើរតែពេញមួយឆ្នាំ ដែលធ្វើឲ្យការដើរលេងកម្សាន្តនៅតាមឆ្នេរខ្សាច់ជាច្រើនរបស់ខ្លួន ក្លាយជាសកម្មភាពដ៏ពេញនិយមសម្រាប់អ្នកស្រុក និងភ្ញៀវទេសចរ។ ទីក្រុងនេះត្រូវបានខណ្ឌចែកដោយទន្លេ Han ដោយមានស្ពានប្រហែលកន្លះឡូកាតភ្ជាប់ឆ្លងកាត់ ដែលមានរចនាបថ និងការរចនាខុសៗគ្នា រួមទាំងមានសួនច្បារ និងផ្លូវដើរលេងតាមមាត់ទឹក បារដ៏រស់រវើក និងភោជនីយដ្ឋានឆ្ងាញ់ៗរាប់មិនអស់។ ទីក្រុងនេះត្រូវបានរៀបចំប្លង់យ៉ាងល្អ ដោយមានអាកាសយានដ្ឋានអន្តរជាតិនៅជិតកណ្តាលក្រុង ដែលមានផ្លូវធំៗស្អាតបាត តំបន់ពាណិជ្ជកម្មដ៏មមាញឹក តំបន់លំនៅឋានទាក់ទាញ និងគ្មានការបំពុលបរិស្ថានដូចក្រុងដទៃទៀតឡើយ។ កត្តាទាំងនេះរួមបញ្ចូលគ្នាធ្វើឲ្យទីក្រុងដាណាំងក្លាយជាទីក្រុងដ៏គួរឲ្យមនោរម្យជាខ្លាំង និងជាទីតាំងដ៏ល្អឥតខ្ចោះសម្រាប់រៀបចំព្រឹត្តិការណ៍នានា។ 

ពិធីបុណ្យកាំជ្រួចអន្តរជាតិដាណាំង — ត្រូវបានប្រារព្ធឡើងជាលើកដំបូងក្នុងខែមីនា ឆ្នាំ២០០៨ ពិធីបុណ្យកាំជ្រួចអន្តរជាតិដាណាំង ប្រហែលជាពិធីបុណ្យដ៏ល្បីល្បាញបំផុតរបស់ទីក្រុងដាណាំង។ រៀងរាល់ឆ្នាំ មេឃលើទីក្រុងដាណាំងត្រូវបានបំភ្លឺដោយការសម្តែងពន្លឺ ពណ៌ និងសំឡេងដ៏អស្ចារ្យ ហាក់ដូចជាផ្កាភ្លើងដ៏ធំសម្បើមកំពុងរីកស្កុសស្កាយនាពេលរាត្រី។ ជាទូទៅត្រូវបានប្រារព្ធឡើងក្នុងខែមិថុនា ពិធីបុណ្យនេះមានប្រធានបទខុសៗគ្នារៀងរាល់ឆ្នាំ ដែលក្រុមមកពីបណ្តាប្រទេសផ្សេងៗប្រកួតប្រជែងគ្នារចនាការបាញ់កាំជ្រួចដ៏ចាប់អារម្មណ៍បំផុត។ ឥឡូវនេះ ពិធីបុណ្យនេះត្រូវបានគ្រោងនឹងត្រលប់មកវិញចាប់ពីថ្ងៃទី៣ ខែមិថុនា ដល់ថ្ងៃទី៧ ខែកក្កដា ឆ្នាំ២០២៣។ 

ពិធីបុណ្យ Cau Ngu — ពិធីបុណ្យ Cau Ngu (ការថ្វាយបង្គំព្រះមច្ឆា ឬពេលខ្លះបកប្រែថា ពិធីថ្វាយបង្គំព្រះត្រីបាឡែន) គឺជាប្រពៃណីដ៏យូរលង់មួយសម្រាប់អ្នកនេសាទនៅឆ្នេរសមុទ្រវៀតណាម និងជាបេតិកភណ្ឌវប្បធម៌អរូបីជាតិ។ ជាទូទៅត្រូវបានប្រារព្ធឡើងបន្ទាប់ពីពិធីបុណ្យចូលឆ្នាំវៀតណាម (Tet) ពិធីបុណ្យនេះធ្វើឡើងដើម្បីសម្តែងការគោរពដល់ព្រះនៃសមុទ្រ និងត្រីបាឡែន ដែលត្រូវបានហៅដោយការគោរពថា «លោកតាតាត្រី» ដើម្បីបួងសួងសុំឲ្យនេសាទបានផលល្អនៅឆ្នាំខាងមុខ មានជីវិតសុខសាន្ត និងធូរធារ ព្រមទាំងដើម្បីរំលឹកគុណដូនតាផងដែរ។ ពិធីបុណ្យនេះរួមបញ្ចូលទាំងពិធីសាសនាដ៏អធិកអធម ការថ្វាយគ្រឿងសក្ការៈដល់ទេវតានិងអ្នកដែលបានចែកឋាន ព្រមទាំងការច្រៀង រាំ និងល្បែងប្រជាប្រិយយ៉ាងសប្បាយរីករាយ។ 

ពិធីបុណ្យភូមិស្រុកក្នុងស្រុក៖ ភូមិ An Hai, ភូមិ Hoa My, ភូមិ Tuy Loan៖ នៅតំបន់ជុំវិញទីក្រុងដាណាំង មានភូមិបុរាណមួយចំនួនដែលធាតុផ្សំនៃប្រពៃណី និងជំនឿប្រជាប្រិយវៀតណាមត្រូវបានថែរក្សាយ៉ាងគង់វង្ស។ ភូមិជិតខាង An Hai (ចាប់ពីថ្ងៃទី១០ ដល់ទី១១ នៃខែទី៨ តាមចន្ទគតិរៀងរាល់ឆ្នាំ) ភូមិ Hoa My (នៅថ្ងៃទី១២ នៃខែទី១ តាមចន្ទគតិរៀងរាល់ឆ្នាំ) និងភូមិ Tuy Loan (នៅថ្ងៃទី៩ នៃខែទី១ តាមចន្ទគតិរៀងរាល់ឆ្នាំ) សុទ្ធតែល្បីល្បាញដោយសារពិធីបុណ្យសាលាឆទានរបស់ពួកគេ ដែលជាការជួបជុំគ្នារបស់អ្នកភូមិដើម្បីបួងសួង និងថ្វាយគ្រឿងសក្ការៈ ព្រមទាំងមានការច្រៀងចម្រៀងប្រជាប្រិយ រាំ និងប្រារព្ធពិធីសាសនាផ្សេងៗ។ ពិធីបុណ្យទាំងនេះផ្តល់ឱកាសដ៏អស្ចារ្យសម្រាប់ភ្ញៀវទេសចរក្នុងការស្វែងយល់ពីជីវិតភូមិស្រុកវៀតណាមដូចដែលមានរាប់រយឆ្នាំមកហើយ ភ្លក់ម្ហូបឆ្ងាញ់ៗក្នុងស្រុក និងទស្សនា ឬលេងល្បែងប្រជាប្រិយដូចជា dap om, keo co, និង bai choi។

ការរត់ម៉ារ៉ាតុងអន្តរជាតិដាណាំង — រៀងរាល់ឆ្នាំ អ្នករត់ប្រណាំងមកពីជុំវិញពិភពលោកបានមកជុំគ្នានៅទីក្រុងដាណាំង ដើម្បីចូលរួមក្នុងការរត់ម៉ារ៉ាតុង សាកល្បងសមត្ថភាពខ្លួនឯង ព្រមទាំងរីករាយជាមួយឆ្នេរខ្សាច់ដ៏ស្រស់ស្អាតប្រវែង ៣០ គីឡូម៉ែត្ររបស់ទីក្រុងដាណាំង។ ត្រូវបានប្រារព្ធឡើងជាលើកដំបូងក្នុងឆ្នាំ២០១៣ ការប្រកួតនេះគឺជាការរត់ម៉ារ៉ាតុងដំបូងគេរបស់វៀតណាមដែលទទួលបានការទទួលស្គាល់ជាអន្តរជាតិ។ ដោយមានការរត់ម៉ារ៉ាតុង ៤២ គីឡូម៉ែត្រ, ពាក់កណ្តាលម៉ារ៉ាតុង ២១ គីឡូម៉ែត្រ, ១០ គីឡូម៉ែត្រ, ៥ គីឡូម៉ែត្រ និងការរត់កម្សាន្ត ១.៥ គីឡូម៉ែត្រ ផ្លូវប្រកួតដ៏អស្ចារ្យនេះនាំអ្នករត់ឆ្លងកាត់ស្ពាននានានៃទីក្រុងដាណាំងនៅពេលព្រះអាទិត្យរះ តាមបណ្តោយឆ្នេរខ្សាច់ស និងឆ្លងកាត់ជើងភ្នំ ដែលធ្វើឲ្យវាក្លាយជាការរត់ម៉ារ៉ាតុងដ៏ស្អាតបំផុតមួយក្នុងពិភពលោក។ ការរត់ម៉ារ៉ាតុងនេះត្រូវបានគ្រោងនឹងត្រលប់មកវិញនៅខែសីហា ឆ្នាំ២០២៣។ 

_{ប្រភព៖ Instagram - rundanang.}

ពិធីបុណ្យប្រកួតទូកង — នៅដើមឆ្នាំចន្ទគតិនីមួយៗ ទន្លេ Han គឺជាទីតាំងរៀបចំពិធីបុណ្យប្រកួតទូកង ដែលជាប្រពៃណីដ៏យូរលង់មួយ ដែលក្នុងនោះក្រុមជាង ២០ មកពីតំបន់នេះប្រកួតប្រជែងទូកនាគដ៏មានពណ៌ស្រស់ឆើតឆាយ ក្រោមការគាំទ្រយ៉ាងក្លៀវក្លាពីអ្នកទស្សនា។ 

ពិធីបុណ្យ Quan The Am (Avalokitesvara) — ពិធីបុណ្យព្រះពុទ្ធសាសនានេះ គឺជាពិធីបុណ្យប្រពៃណីដ៏ធំបំផុតរបស់ក្រុងដាណាំង ដែលត្រូវបានប្រារព្ធឡើងជារៀងរាល់ឆ្នាំនៅតំបន់ភ្នំ Marble Mountains។ ជាទូទៅត្រូវបានធ្វើឡើងនៅក្នុងខែទី២ នៃចន្ទគតិ ពិធីបុណ្យនេះផ្តោតលើតម្លៃផ្លូវចិត្ត និងវប្បធម៌ ហើយរួមបញ្ចូលទាំងការតាំងពិព័រណ៍សិល្បៈព្រះពុទ្ធសាសនា ការផ្លាស់ប្តូរកំណាព្យ និងពិធីសាសនាប្រជាប្រិយ ព្រមទាំងពិធីការផ្លូវចិត្តផ្សេងៗ។ 

_{ប្រភព៖ អ៊ីនធឺណិត}

ពិធីបុណ្យប៉េងប៉ោងខ្យល់ក្តៅ — ក្នុងចំណោមព្រឹត្តិការណ៍ដ៏ស្រស់ស្អាតបំផុតរបស់ក្រុងដាណាំង គឺពិធីបុណ្យប៉េងប៉ោងខ្យល់ក្តៅ ដែលជាការជួបជុំគ្នាដើមដើម្បីប្រែផ្ទៃមេឃលើក្រុងដាណាំងឱ្យទៅជាទិដ្ឋភាពដូចផ្ទាំងគំនូរ ពោរពេញដោយប៉េងប៉ោងខ្យល់ក្តៅមានពណ៌ឆើតឆាយ។ សម្រាប់អ្នកចូលចិត្តថតរូប ឬនរណាម្នាក់ដែលស្រឡាញ់ការទស្សនាពិភពលោកពីលើមេឃ ពិធីបុណ្យប៉េងប៉ោងខ្យល់ក្តៅគឺជាបទពិសោធន៍មួយនៅវៀតណាមមិនអាចរំលងបានឡើយ។ 

_{ប្រភព៖ អ៊ីនធឺណិត}

ព្រឹត្តិការណ៍ដ៏អស្ចារ្យទាំងនេះតំណាងឱ្យតែព្រឹត្តិការណ៍ល្បីៗមួយចំនួនប៉ុណ្ណោះរបស់ក្រុងដាណាំង ព្រោះទីក្រុងនេះក៏មានរៀបចំពិធីបុណ្យតន្ត្រី និងពិធីជប់លៀងជារៀងរាល់រដូវក្តៅ ក្បួនកម្សាន្ត carnival ជាទៀងទាត់នៅក្នុងតំបន់ទេសចរណ៍ Sun World Ba Na Hills ដ៏ល្បីល្បាញលើពិភពលោក (ម្ចាស់រង្វាន់តំបន់ទេសចរណ៍ជានិមិត្តរូបឈានមុខគេលើពិភពលោកឆ្នាំ២០២២) ព្រមទាំងព្រឹត្តិការណ៍មិនប្រចាំឆ្នាំជាច្រើនទៀត។ បន្ថែមពីនេះ ក្រុងដាណាំងក៏មានរៀបចំការអបអរសាទរយ៉ាងកុះករសម្រាប់បុណ្យជាតិវៀតណាម ដូចជាពិធីបុណ្យចូលឆ្នាំវៀតណាម (Tet) ពិធីបុណ្យស្តេច ហ៊ុង (Hung Kings) និងពិធីបុណ្យសែនព្រះខែ (Mid-Autumn Festival)។ សម្រាប់អ្នកដែលស្វែងរកបទពិសោធន៍ដ៏រីករាយពិតប្រាកដនៃពិធីបុណ្យផ្សេងៗរបស់វៀតណាម ក្រុងដាណាំងពិតជាទីក្រុងដែលត្រូវតែមកទស្សនា។