របៀបដើរកម្សាន្ត និងរីករាយនៅ Ba Na Hills

ត្រូវបានកសាងឡើងជាទីក្រុងរមណីយដ្ឋានសម្រាប់ជនជាតិបារាំងក្នុងឆ្នាំ ១៩១៩ បច្ចុប្បន្ន Ba Na Hills ស្វាគមន៍ភ្ញៀវទេសចរមកពីជុំវិញពិភពលោក។ ការធ្វើដំណើរទៅកាន់ទីនោះ គឺជាចំណុចលេចធ្លោមួយ ព្រោះលោកអ្នកនឹងជិះកន្ត្រកខ្សែកាបដ៏ធំទូលាយឡើងតាមជម្រាលភ្នំ ដោយទស្សនាទិដ្ឋភាពសមុទ្រនៅឆ្ងាយៗ ព្រមទាំងទឹកធ្លាក់ និងព្រៃឈើនៅខាងក្រោម។ ដោយសារសីតុណ្ហភាពនៅ Ba Na Hills តែងតែត្រជាក់ស្រួល ទីនេះគឺជាកន្លែងគេចចេញពីកំដៅដ៏ល្អឥតខ្ចោះនាដូវក្តៅ ប៉ុន្តែក៏ស្រស់ស្អាតនៅគ្រប់ពេលវេលានៃឆ្នាំផងដែរ។

ភូមិបុរាណសម័យមជ្ឈិមសម័យកំពុងរង់ចាំលោកអ្នកនៅពេលទៅដល់កំពូលភ្នំ ដែលមានរចនាសម្ព័ន្ធដូចជា អាងទឹកបាញ់កណ្តាល វិហារគ្រិស្ត និងផ្ទះថ្ម។ អ្នករចនា Ba Na Hills បានសម្រេចចិត្តបង្កើតភូមិបារាំងឡើងវិញនៅលើជួរភ្នំ ហើយពួកគេបានជោគជ័យ ដោយមានចំណុចថតរូបយ៉ាងស្រស់ស្អាតនៅគ្រប់ជ្រុងជ្រោយ។ ដើរលេងកម្សាន្តតាមសួនផ្កាចម្រុះពណ៌ Le Jardin ឬដើរតាមផ្លូវតូចៗកើនឡើងចុះដើម្បីស្វែងរកទិដ្ឋភាពជ្រលងភ្នំដ៏អស្ចារ្យ។ កុំភ្ញាក់ផ្អើល ប្រសិនបើលោកអ្នកបានជួបអ្នកសម្តែងកាយវិការ ព្រមទាំងព្រះអង្គម្ចាស់ និងព្រះនាងក្នុងរឿងព្រេងនិទានដើរលេងជុំវិញទីនោះ។

ចំណុចលេចធ្លោបំផុតនៅ Ba Na Hills គឺប្រាកដណាស់ ស្ពានដៃមាសដ៏ល្បីល្បាញ ដែលបានអង្រួនបណ្តាញសង្គមក្នុងឆ្នាំ ២០១៨។ ស្ពានសម្រាប់ជនដើរជើងនេះ មានរូបរាងជាដៃយក្សពីរទ្រខ្សែពណ៌មាសព្យួរលើជ្រលងភ្នំនៅខាងក្រោម។ បែរមុខទៅរកថ្ងៃរះលើសមុទ្រខាងកើត ទិដ្ឋភាពពីលើស្ពានគឺពិតជាអស្ចារ្យណាស់នៅថ្ងៃមេឃស្រឡះ ហើយមានអ័ព្ទគ្របដណ្តប់គួរឱ្យទាក់ទាញនៅថ្ងៃដែលមានអ័ព្ទ។ សូមអញ្ជើញទៅនៅព្រឹកព្រលឹម ដើម្បីរីករាយនឹងស្ពាននេះដោយខ្លួនឯង ដោយសារវាអាចនឹងមានមនុស្សកកកុញនៅពេលក្រោយ។ 

សម្រាប់ការសម្រាកលំហែកាយដ៏រ៉ូមែនទិក មិនបាច់ស្វែងរកឯណាឆ្ងាយក្រៅពី Mercure Danang French Village នោះឡើយ។ សណ្ឋាគារនេះត្រូវបានរចនាឡើងក្នុងរចនាប័ទ្មកូធិក (gothic) សតវត្សរ៍ទី ១៩ ហើយជាកន្លែងដ៏អស្ចារ្យសម្រាប់ការស្នាក់នៅជាមួយគ្រួសារ ឬមិត្តភក្តិ។ បន្ទប់ដ៏ធំទូលាយទាំងអស់របស់សណ្ឋាគារមានគ្រែទំហំធំដ៏ទន់ល្មើយដូចពពក ការតុបតែងលម្អយ៉ាងប្រណីត និងមានរ៉ង់ដាដ៏ស្រស់ស្អាត។ ជាមួយនឹងស្ប៉ាចំនួនបី ក្លឹបហាត់ប្រាណ អាងហែលទឹក និងភោជនីយដ្ឋានជាច្រើនសម្រាប់ជ្រើសរើស លោកអ្នកនឹងមានជម្រើសយ៉ាងសម្បូរបែប។

ក្រៅពីស្ពាន និងសណ្ឋាគារដ៏ស្រស់ស្អាត Ba Na Hills ធានាថាលោកអ្នកនឹងទទួលបានការកម្សាន្តយ៉ាងរីករាយពេញទំហឹងក្នុងអំឡុងពេលទស្សនា។ Fantasy Park គឺជាឧទ្យានកម្សាន្តដែលត្រូវបានរចនាឡើង និងផ្អែកលើប្រលោមលោកផ្សងព្រេងរបស់ Jules Verne ដែលមានល្បែងកម្សាន្ត ការតោងភ្នំ និងរោងភាពយន្ត 4D។ រវាងសារមន្ទីររូបចម្លាក់ក្រមួន កន្លែងលេងហ្គេម និងអាងហែលទឹក កុមារគ្រប់វ័យនឹងបានកម្សាន្តយ៉ាងសប្បាយរីករាយ។ មនុស្សធំអាចសម្រាកលំហែកាយនៅរូងរក្សាទុកស្រាទំពាំងបាយជូរប្រវត្តិសាស្ត្រ Debay Wine Cellar ឬសម្រាកកម្សាន្តនៅ Beer Plaza ដែលមានពន្លឺព្រះអាទិត្យចែងចាំង។ 

ប្រសិនបើលោកអ្នកជាអ្នកចូលចិត្តកីឡាកូនគោល កុំចាកចេញដោយមិនបានលេងមួយជុំនៅ Ba Na Hills Golf Club ដែលស្ថិតនៅខាងក្រៅទីក្រុង Da Nang ឲ្យសោះ។ ហ៊ុមព័ទ្ធដោយជួរភ្នំ ទីលានវាយកូនគោលកម្រិតពិភពលោកដ៏ទាក់ទាញនេះត្រូវបានរចនាឡើងដោយ Luke Donald និងមានផ្ទៃដីរលកស្រាលៗជាច្រើន ដែលតម្រូវឱ្យមានការវាយកូនគោលតាមបច្ចេកទេសផ្សេងៗ។ ក្លឹបនេះទទួលបានពានរង្វាន់ ‘ទីលានវាយកូនគោលល្អបំផុតនៅអាស៊ី’ ចំនួនពីរដងពី World Golf Awards ព្រមទាំងទទួលបានការប្រសិទ្ធនាមជា ‘ទីលានវាយកូនគោលថ្មីល្អបំផុតក្នុងលោក’ នៅពេលបើកដំណើរការក្នុងឆ្នាំ ២០១៦។