សម្រាកកាយសម្រួលអារម្មណ៍! យើងកំពុងស្ថិតនៅក្នុងប្រទេសវៀតណាម - គោលដៅស្ប៉ាល្អបំផុតនៅអាស៊ី

គោលដៅទេសចរណ៍ទាំងនេះល្បីល្បាញដោយសារកម្មវិធីទេសចរណ៍ស្តារសុខភាព និងព្យាបាលផ្លូវចិត្ត។ ស្ប៉ា យូហ្គាព្យាបាល ការសមាធិបែបស្មារតីរលឹក ការសមាធិដើរ កន្លែងលំហែកាយថែទាំសុខភាព ទឹកក្ដៅ/រ៉ែធម្មជាតិ និងជំរំហ្វឹកហាត់សុខភាព ការសមាធិបែបបណ្ដែតអារម្មណ៍តាមធម្មជាតិ ស្ដាប់ទៅប្រៀបដូចជាតន្ត្រីដ៏ពីរោះបំបាត់ការនឿយហត់។ ភាពប្រណីតនៃការព្យាបាលបែបស្ងប់ស្ងាត់ត្រូវបានពិពណ៌នាថាជាមាគ៌ាឆ្ពោះទៅរកភាពស្ងប់ស្ងាត់ក្នុងចិត្ត ដែលស័ក្តិសមសម្រាប់មនុស្សគ្រប់ស្រទាប់វណ្ណៈ ហើយស័ក្តិសមសម្រាប់កុមារ មនុស្សពេញវ័យ និងសូម្បីតែមនុស្សចាស់។ មាគ៌ានេះនឹងជួយសម្អាតរាងកាយរបស់អ្នក និងលួងលោមព្រលឹងរបស់អ្នក។ វាមិនមែនជាការផ្សងព្រេងបែបសេរីនៅក្នុងធម្មជាតិនោះទេ ប៉ុន្តែជាដំណើរដើម្បីស្វែងរកខ្លួនឯងខាងក្នុង។

ប្រទេសវៀតណាមត្រូវបានគ្រងតំណែងជា គោលដៅស្ប៉ាល្អបំផុតរបស់អាស៊ី ដោយពានរង្វាន់ World Spa Awards 2023 ដោយសារហេតុផលជាច្រើន។ ដោយមានទេសភាពធម្មជាតិដ៏ស្រស់ស្អាត ឆ្នេរសមុទ្រវែង ឆ្នេរខ្សាច់ដ៏ស្រស់ស្អាត និងការកើនឡើងនៃរមណីយដ្ឋាន និងសណ្ឋាគារកម្រិតខ្ពស់ ប្រទេសវៀតណាមត្រូវបានវាយតម្លៃខ្ពស់ចំពោះសក្តានុពលអភិវឌ្ឍន៍នៃទេសចរណ៍សុខុមាលភាព។ ដាណាំង ហូយអាន ញ៉ាត្រាង ហ្វូក្វុក មានភាពទាក់ទាញដោយសារឆ្នេរសមុទ្រវែង ម្ហូបអាហារដ៏សម្បូរបែប អាកាសធាតុអំណោយផល និងកន្លែងកម្សាន្ត ដើម្បីស្តារថាមពលរបស់ភ្ញៀវទេសចរឡើងវិញ។

នៅដាណាំង ទីក្រុងនេះមានកត្តាជាច្រើនដែលឆ្លើយតបនឹងតម្រូវការរបស់ភ្ញៀវទេសចរសម្រាប់ដំណើរលំហែកាយ។ ទស្សនាវដ្តីសេដ្ឋកិច្ចអាមេរិកដ៏ល្បីល្បាញ Forbes បានបោះឆ្នោតឲ្យឆ្នេរ My Khe នៃទីក្រុងដាណាំង ជាឆ្នេរមួយក្នុងចំណោមឆ្នេរដែលទាក់ទាញបំផុតទាំង ៦ នៅលើភពផែនដី។ Spa Lagoon Villas, InterContinental Danang Sun Peninsula (ដាណាំង) ក៏ត្រូវបានពានរង្វាន់ World Spa Awards 2023 ប្រគល់ជ័យលាភីជា World's Best Private Spa Villas ផងដែរ។

InterContinental Danang Sun Peninsula (ដាណាំង)

តារារះថ្មីៗផ្សេងទៀតរបស់វៀតណាមនៅក្នុងពិភពស្ប៉ា រួមមាន Legacy Yen Tu MGallery (ក្វាងនិញ); TIA Wellness Resort (ដាណាំង); Victoria Hoi An Beach Resort & Spa (ហូយអាន); Kawara My An Onsen Resort (ហ្វេ); Banyan Tree Lang Co (ហ្វេ); Evason Ana Mandara Resort (ញ៉ាត្រាង); Amanoi Ninh Thuan (និញថ្វៀន); Minera Hot Springs Binh Chau (បារៀ-វូងតាវ);...

Legacy Yen Tu MGallery (ក្វាងនិញ)

ប្រទេសវៀតណាមមានបញ្ជីគោលដៅទេសចរណ៍សុខុមាលភាពយ៉ាងច្រើនដែលអាចឆ្លើយតបនឹងចំណង់ចំណូលចិត្តរបស់ភ្ញៀវទេសចរមកពីជុំវិញពិភពលោក។ វាអាចជាទីក្រុងបុរាណហូយអាន ដែលមានសម្រស់បុរាណដ៏មានតម្លៃ ភាពស្ងប់ស្ងាត់គ្របដណ្ដប់ដោយស្លែនៅលើដំបូលក្បឿងនីមួយៗ ឬអាចជា «គ្រាប់ពេជ្រនៃបូព៌ាទិព្វ» ញ៉ាត្រាង ជាកន្លែងដែលមានឆ្នេរសមុទ្រប្រកបដោយមន្តស្នេហ៍ និងវីឡាដែលលាក់ខ្លួននៅក្នុងព្រៃ ឬហ្វូក្វុក - កោះកែវមរកត ជាកន្លែងដែលរមណីយដ្ឋានទាំងអស់ផ្តល់ជូននូវសេវាកម្មហែលទឹក និងមុជទឹកមើលផ្កាថ្ម។

Victoria Hoi An Beach Resort & Spa (ហូយអាន)

ដូចដែលសៀវភៅ «Eat, Pray, Love» របស់លោកស្រី Elizabeth Gilbert បានសរសេរថា «កន្លែងសម្រាកនៃចិត្តគឺបេះដូង។ អ្វីតែមួយគត់ដែលចិត្តឮពេញមួយថ្ងៃគឺសំឡេងជួង និងសំឡេងរំខាន និងការជជែកដេញដោល ហើយអ្វីដែលវាត្រូវការគឺភាពស្ងប់ស្ងាត់។ កន្លែងតែមួយគត់ដែលចិត្តនឹងរកឃើញសន្តិភាពគឺស្ថិតនៅក្នុងភាពស្ងប់ស្ងាត់នៃបេះដូង»។ ថ្ងៃរះថ្មីចាប់ផ្តើមពីប្រទេសវៀតណាម ហើយអ្វីដែលអ្នកត្រូវធ្វើគឺផ្តោតលើការថែទាំសុខភាព និងការសម្រាកកាយ ដើម្បីទទួលបទពិសោធន៍នៅប្រទេសវៀតណាមឱ្យបានពេញលេញបំផុត ហើយលើសពីអ្វីៗទាំងអស់ និងសំខាន់បំផុតគឺដើម្បីស្វែងរកបេះដូង ចិត្ត និងព្រលឹងដ៏ស្ងប់ស្ងាត់របស់យើង។