ហាណូយ ប្រទេសវៀតណាម (ថ្ងៃទី ២៣ ខែកញ្ញា ឆ្នាំ ២០២០) -- ក្រុមហ៊ុនអាកាសចរណ៍ Vietnam Airlines បានបើកការកក់សំបុត្រជាផ្លូវការសម្រាប់ជើងហោះហើរ VN417 ពីទីក្រុងសេអ៊ូល ប្រទេសកូរ៉េ មកកាន់ទីក្រុងហាណូយ នៅថ្ងៃទី ២៥ ខែកញ្ញា ឆ្នាំ ២០២០ ដែលជាជើងហោះហើរពាណិជ្ជកម្មអន្តរជាតិ តាមកាលវិភាគដំបូងបង្អស់មកកាន់ប្រទេសវៀតណាមពីប្រទេសកូរ៉េ ចាប់តាំងពីស្ថានភាពជំងឺកូវីដ-១៩ មានភាពស្ងប់ស្ងាត់ឡើងវិញនៅប្រទេសវៀតណាម។

ជើងហោះហើរនេះនឹងត្រូវប្រតិបត្តិការដោយយន្តហោះ Airbus A350 ដែលមានកៅអីច្រើនជាង ៣០០ កៅអី។ ដោយសារតែតម្រូវការពិសេសលើនីតិវិធីឆ្លើយតបនឹងជំងឺរាតត្បាត សំបុត្រសម្រាប់ជើងហោះហើរនេះមិនត្រូវបានលក់នៅលើគេហទំព័ររបស់ Vietnam Airlines នោះទេ។ អតិថិជនអាចទិញសំបុត្របាននៅតាមការិយាល័យ និងភ្នាក់ងារផ្លូវការរបស់ Vietnam Airlines នៅក្នុងប្រទេសកូរ៉េ និងវៀតណាម។

ជើងហោះហើរនេះអនុវត្តបទបញ្ជាគ្រប់គ្រងជំងឺយ៉ាងតឹងរ៉ឹងបំផុត។ ដើម្បីធ្វើដំណើរ អ្នកដំណើរត្រូវបំពេញតាមលក្ខខណ្ឌជាក់លាក់ ដូចជាមានលិខិតបញ្ជាក់តេស្តអវិជ្ជមាន SARS-CoV-2 តាមវិធីសាស្ត្រ Realtime PCR ក្នុងរយៈពេល ៣ ថ្ងៃមុនពេលចេញដំណើរ ការបញ្ជាក់ទីតាំងធ្វើចត្តាឡីស័កនៅប្រទេសវៀតណាម ការដំឡើងកម្មវិធីតាមដានលើទូរស័ព្ទដៃ និងការបំពេញរបាយការណ៍សុខភាព។ បច្ចុប្បន្ន អ្នកដំណើរដែលប្តូរជើងហោះហើរពីប្រទេសទីបី នឹងមិនត្រូវទទួលបានការដឹកជញ្ជូនឡើយ។ បន្ទាប់ពីត្រឡប់មកប្រទេសវៀតណាមវិញ បុគ្គលិកបម្រើការលើជើងហោះហើរ នឹងត្រូវទទួលការពិនិត្យសុខភាព និងធ្វើចត្តាឡីស័កតាមបទប្បញ្ញត្តិ។ យន្តហោះទាំងមូលនឹងត្រូវធ្វើការសម្លាប់មេរោគ រួមទាំងកាប៊ីនអ្នកដំណើរ និងកាប៊ីនអ្នកបើកបរ ស្របតាមស្តង់ដារអន្តរជាតិ។

កាលពីមុន ក្រុមហ៊ុន Vietnam Airlines បានប្រតិបត្តិការដោយសុវត្ថិភាពនូវជើងហោះហើរពាណិជ្ជកម្មអន្តរជាតិ តាមកាលវិភាគដំបូងពីទីក្រុងហាណូយ ទៅកាន់ទីក្រុងតូក្យូ ប្រទេសជប៉ុន ដោយមានអ្នកដំណើរជិត ៦០ នាក់ ដែលភាគច្រើនជាសិស្ស និស្សិត និងពលករវៀតណាម ព្រមទាំងជនជាតិជប៉ុន។

បន្ថែមលើផ្លូវហោះហើរទៅកាន់ប្រទេសជប៉ុន និងកូរ៉េខាងត្បូង ក្រុមហ៊ុន Vietnam Airlines គ្រោងនឹងចាប់ផ្ដើមជើងហោះហើរឡើងវិញរវាងប្រទេសវៀតណាម និងចិន តៃវ៉ាន់ (ចិន) ឡាវ និងកម្ពុជា នាពេលខាងមុខឆាប់ៗនេះ នៅពេលទទួលបានការអនុញ្ញាតពីរាជរដ្ឋាភិបាល និងអាជ្ញាធរពាក់ព័ន្ធ។ នៅពេលនេះ ប្រទេសវៀតណាមអនុញ្ញាតឱ្យចូលស្រុកតែចំពោះអ្នកទូត អ្នកជំនាញ វិនិយោគិន និងសមាជិកគ្រួសាររបស់ពួកគេ ព្រមទាំងប្រជាជនវៀតណាមដែលត្រឡប់មកស្រុកវិញប៉ុណ្ណោះ។ ការចាប់ផ្តើមជើងហោះហើរពាណិជ្ជកម្មអន្តរជាតិ តាមកាលវិភាគឡើងវិញនេះ បង្ហាញពីការរំពឹងទុកនៃការស្តារឡើងវិញដ៏វិជ្ជមានសម្រាប់ក្រុមហ៊ុនអាកាសចរណ៍វៀតណាមនាពេលខាងមុខ។

###

សម្រាប់ការសាកសួរព័ត៌មានប្រព័ន្ធផ្សព្វផ្សាយ សូមទាក់ទង៖

Vietnam Airline JSC
200 Nguyen Son, ខណ្ឌ Long Bien, ទីក្រុងហាណូយ, ប្រទេសវៀតណាម
Hotline PR: +84 903242577
Email: public-relations@vietnamairlines.com

 

---