ហាណូយ ប្រទេសវៀតណាម (ថ្ងៃទី ២២ ខែមករា ឆ្នាំ ២០២១) – កាលពីម្សិលមិញ Google Arts & Culture បានដាក់សម្ពោធ Wonders of Vietnam — ដែលជាគម្រោងអនឡាញបង្ហាញពីចំណុចលេចធ្លោជាច្រើននៃបេតិកភណ្ឌ UNESCO របស់វៀតណាមជាលើកដំបូង រួមទាំងតំបន់ធម្មជាតិ និងបេតិកភណ្ឌរូបី និងអរូបី។ ដោយបានបញ្ចប់ក្រោមកិច្ចសហការជាមួយក្រសួងវប្បធម៌ កីឡា និងទេសចរណ៍ អគ្គនាយកដ្ឋានទេសចរណ៍វៀតណាម  មន្ទីរទេសចរណ៍ក្នុងស្រុកនៃក្រុងដាណាំង ខេត្តក្វាងណាម ធឿធៀនហ្វេ និងក្វាងប៊ិញ អ្នកថតរូបដែលឈ្នះរង្វាន់ National Geographic គឺលោក Tran Tuan Viet និងក្រុមហ៊ុន Oxalis Adventure គម្រោងថ្មីនេះមានគោលបំណងផ្តិតយក និងថែរក្សាសម្ផស្សរបស់វៀតណាមសម្រាប់ទស្សនិកជននៅទូទាំងពិភពលោក។ 

គម្រោងអនឡាញនេះមានការតាំងពិព័រណ៍ចំនួន ៣៥ និងរូបភាពដ៏ស្រស់ស្អាតចំនួន ១.៣៦៩ សន្លឹក ដោយផ្តល់នូវទស្សនវិស័យដ៏សម្បូរបែបនៃប្រទេសវៀតណាម សម្រាប់មនុស្សគ្រប់គ្នាក្នុងការតភ្ជាប់ទាំងក្នុងអំឡុងពេល និងក្រោយពេលមានវិបត្តិជំងឺរាតត្បាត។ ចំណុចលេចធ្លោរួមមាន ការតាំងពិព័រណ៍អំពីល្អាងសើនដូង (Son Doong Cave) ពិធីបុណ្យគោមហូយអាន (Hoi An Lantern Festival) និងតន្ត្រីញ៉ាញាក់ (Nha Nhac) ព្រមទាំងមុខងារអន្តរកម្មដែលអនុញ្ញាតឱ្យភ្ញៀវទេសចរបានបទពិសោធន៍ពីអច្ឆរិយវត្ថុនៃប្រទេសវៀតណាមតាមរបៀបថ្មី។ មនុស្សអាចរុករកចំណុចលេចធ្លោនៃការតាំងពិព័រណ៍តាមរយៈពណ៌ ទស្សនាវីដេអូនៃតំបន់ទេសចរណ៍ដែលអមដោយតន្ត្រីប្រពៃណីវៀតណាម ឬមើលទិដ្ឋភាពពីលើអាកាសនៃទីតាំងល្បីៗតាមរយៈរូបភាពប៉ាណូរ៉ាម៉ា។ គម្រោងនេះគឺជាផ្នែកមួយដ៏សំខាន់នៃការគាំទ្រសរុបរបស់ Google ដល់ឧស្សាហកម្មទេសចរណ៍ក្នុងស្រុក ដែលបានរងផលប៉ះពាល់យ៉ាងធ្ងន់ធ្ងរដោយសារការកម្រិតការធ្វើដំណើរក្នុងអំឡុងពេលជំងឺរាតត្បាត។ តាមរយៈការបង្ហាញពីអច្ឆរិយវត្ថុនៃប្រទេសវៀតណាម ជាពិសេសមកពីភូមិភាគកណ្តាល យើងសង្ឃឹមថានឹងបង្កើនការយល់ដឹងអំពីការថែរក្សាទីតាំងដែលរងផលប៉ះពាល់ដោយទឹកជំនន់នាពេលថ្មីៗនេះផងដែរ។ 

លោក  Amit Sood នាយក Google Arts & Culture បានប្រសាសន៍ថា៖ «ដោយសារតែឧស្សាហកម្មទេសចរណ៍នៅទូទាំងពិភពលោក និងជាពិសេសនៅវៀតណាមបានរងផលប៉ះពាល់យ៉ាងធ្ងន់ធ្ងរដោយសារជំងឺរាតត្បាត យើងដឹងថាវារឹតតែសំខាន់ក្នុងការធ្វើឱ្យ Wonders of Vietnam អាចចូលទស្សនាបានសម្រាប់ពិភពលោក ដើម្បីឱ្យមនុស្សកាន់តែច្រើនអាចទទួលបានបទពិសោធន៍អំពីអ្វីៗគ្រប់យ៉ាងនៃប្រទេសវៀតណាម»។ «ខ្ញុំពិតជាថ្លែងអំណរគុណដល់ដៃគូរបស់យើងដែលបានធ្វើការជាមួយយើង ដើម្បីបង្ហាញពីទិដ្ឋភាពដ៏សម្បូរបែបនៃទីតាំង និងវប្បធម៌របស់ប្រទេសវៀតណាម»។ 

លោក Ha Van Sieu អគ្គនាយករងនៃអគ្គនាយកដ្ឋានទេសចរណ៍បានប្រសាសន៍ថា៖ «ការលើកកម្ពស់ការផ្លាស់ប្តូរឌីជីថល ការពន្លឿនការអនុវត្តបច្ចេកវិទ្យាក្នុងការផ្សព្វផ្សាយពាណិជ្ជកម្ម គឺជាទិសដៅដ៏សំខាន់នៃឧស្សាហកម្មទេសចរណ៍វៀតណាម ដើម្បីចូលទៅជិតដោយបុរ៉េសកម្ម និងចូលរួមយ៉ាងមានប្រសិទ្ធភាពក្នុងបដិវត្តន៍ឧស្សាហកម្មទី ៤។ អគ្គនាយកដ្ឋានទេសចរណ៍វាយតម្លៃខ្ពស់ចំពោះគំនិតផ្តួចផ្តើមរបស់ Google ក្នុងការអនុវត្តគម្រោងពិព័រណ៍អនឡាញ Wonders of Vietnam ដែលបង្ហាញពីលក្ខណៈពិសេសលេចធ្លោនៃបេតិកភណ្ឌ វប្បធម៌ និងម្ហូបអាហាររបស់វៀតណាម។ ក្នុងនាមជាវេទិកាអនឡាញសកល Google Arts & Culture នឹងក្លាយជាស្ពានជួយផ្សព្វផ្សាយភាពស្រស់ស្អាតរបស់វៀតណាមឱ្យកាន់តែទូលំទូលាយ ទៅកាន់ទស្សនិកជន និងភ្ញៀវទេសចរទាំងអស់ជុំវិញពិភពលោក។ ខ្ញុំសង្ឃឹមថាគម្រោងនេះនឹងត្រូវបានផ្សព្វផ្សាយយ៉ាងទូលំទូលាយ និងពង្រីកបន្ថែមទៀតនៅក្នុងដំណាក់កាលបន្ទាប់»។

### 

អំពី Google Arts & Culture 

Google Arts & Culture នាំយកការប្រមូលផ្តុំនៃសារមន្ទីរច្រើនជាង ២.០០០ នៅចុងម្រាមដៃរបស់អ្នក។ វាជាវិធីសាស្ត្រដ៏ស៊ីជម្រៅក្នុងការរុករកសិល្បៈ ប្រវត្តិសាស្ត្រ និងអច្ឆរិយវត្ថុនានានៃពិភពលោក ចាប់ពីគំនូរបន្ទប់គេងរបស់ Van Gogh រហូតដល់ចលនាសិទ្ធិនារី និងតាសម៉ាហាល (Taj Mahal)។  កម្មវិធី Google Arts & Culture គឺឥតគិតថ្លៃ និងមាននៅលើបណ្តាញអនឡាញសម្រាប់ iOS និង Android។  ក្រុមការងារបានក្លាយជាដៃគូនវានុវត្តន៍សម្រាប់គ្រឹះស្ថានវប្បធម៌តាំងពីឆ្នាំ ២០១១។ ពួកគេអភិវឌ្ឍបច្ចេកវិទ្យាដែលជួយរក្សាទុក និងចែករំលែកវប្បធម៌ ព្រមទាំងអនុញ្ញាតឱ្យអ្នករៀបចំការតាំងពិព័រណ៍បង្កើតការតាំងពិព័រណ៍ដ៏ទាក់ទាញទាំងលើបណ្តាញអនឡាញ និងក្រៅបណ្តាញ នៅខាងក្នុងសារមន្ទីរ។ 

---