រូងភ្នំ Son Doong - អច្ឆរិយៈធម្មជាតិនៃប្រទេសវៀតណាម ត្រូវបានបង្ហាញនៅលើទំព័រដើម Google នៃ ១៧ ប្រទេស និងដែនដី

 

ប្រទេសវៀតណាម ថ្ងៃទី១៤ ខែមេសា ឆ្នាំ២០២២ - ថ្ងៃនេះ រូងភ្នំ Son Doong នៅខេត្ត Quang Binh ប្រទេសវៀតណាម ដែលត្រូវបានរកឃើញជាផ្លូវការក្នុងឆ្នាំ២០០៩ ជា រូងភ្នំធំបំផុតក្នុងលោក ត្រូវបានបង្ហាញជា Google Doodle នៅលើទំព័រដើម Google នៃ ១៧ ប្រទេស និងដែនដី រួមមាន ប្រទេសវៀតណាម ប្រជុំកោះ Virgin (ដែនដីអាមេរិក) ចក្រភពអង់គ្លេស ស៊ុយអែត ក្រិក សិង្ហបុរី...។ ក្នុងឱកាសនេះ រដ្ឋបាលជាតិទេសចរណ៍វៀតណាម កំពុងសហការជាមួយ Google មន្ទីរទេសចរណ៍ខេត្ត Quang Binh និងក្រុមហ៊ុន Oxalis Adventure ដើម្បីផ្សព្វផ្សាយភាពស្រស់ស្អាតនៃរូងភ្នំ Son Doong និងឧទ្យានជាតិ Phong Nha - Ke Bang ជាការចាប់ផ្តើមនៃការផ្សព្វផ្សាយទេសចរណ៍សម្រាប់ប្រទេសវៀតណាមក្រោយវិបត្តិជំងឺរាតត្បាត។

 

 

រូងភ្នំ Son Doong ដ៏អស្ចារ្យ ត្រូវបានផ្សព្វផ្សាយនៅក្នុង ១៧ ប្រទេស និងដែនដី

ថ្ងៃនេះ រូប Doodle រូងភ្នំ Son Doong ត្រូវបានបង្ហាញនៅលើទំព័រដើមរបស់ Google ដើម្បីប្រារព្ធទិវាដែលរូងភ្នំដ៏ធំជាងគេ និងអស្ចារ្យបំផុតនៅលើផែនដីនេះ ត្រូវបានរកឃើញជាផ្លូវការក្នុងអំឡុងពេលបេសកកម្មរុករកដោយកសិករក្នុងស្រុកឈ្មោះ Ho Khanh និងក្រុមស្រាវជ្រាវរូងភ្នំចក្រភពអង់គ្លេស។ Doodle Son Doong បង្កើតឡើងវិញនូវទិដ្ឋភាពដ៏ល្បីល្បាញនៃរន្ធបាក់ស្រុតដ៏ធំសម្បើមដែលស្ថិតនៅជ្រៅក្នុងរូងភ្នំ។ ទម្រង់ថ្មកំបោរដ៏អស្ចារ្យ និងស្រទាប់ពណ៌បៃតងនៃព្រៃព្រឹក្សា ត្រូវបានបំភ្លឺនៅក្រោមពន្លឺព្រះអាទិត្យ។ រន្ធបាក់ស្រុតដ៏ធំនេះអនុញ្ញាតឱ្យពន្លឺព្រះអាទិត្យ និងទឹកភ្លៀងចិញ្ចឹមប្រព័ន្ធអេកូឡូស៊ីនៃព្រៃបុរាណ ដែលជាជម្រកនៃសត្វធាតុផ្សេងៗដូចជាសត្វប្រជៀវ និងសត្វស្វា។ ព្រៃព្រឹក្សាដើមទាំងមូលដែលកំពុងលូតលាស់យ៉ាងស្រស់បំព្រងនៅចំកណ្តាលរូងភ្នំដ៏អស្ចារ្យនេះ នឹងបន្តធ្វើឱ្យអ្នកទស្សនារូងភ្នំ Son Doong គ្រប់រូបមានការភ្ញាក់ផ្អើល សូម្បីតែអ្នករុករកជំនាញក៏ដោយ។

អ្នកចូលចិត្តរូងភ្នំ Son Doong អាចមើលឃើញរូប Son Doong Doodle នេះនៅលើទំព័រដើម Google នៅក្នុង ១៧ ប្រទេស និងដែនដី រួមមាន៖ អាសង់ទីន ឈីលី កូស្តារីកា សាធារណរដ្ឋដូមីនីកែន អែលសាល់វ៉ាឌ័រ ក្រិក ហ្គាតេម៉ាឡា សាធារណរដ្ឋហុងឌុយរ៉ាស មិចស៊ិក សាធារណរដ្ឋម៉ុលដាវី រូម៉ានី សិង្ហបុរី ស៊ុយអែត ថៃ ប្រជុំកោះ Virgin (ដែនដីអាមេរិក) និងចក្រភពអង់គ្លេស។ នេះជាវិធីដែល Google បង្ហាញការគាំទ្រចំពោះវប្បធម៌ ម្ហូបអាហារ និងតំបន់ទេសចរណ៍របស់វៀតណាម ព្រមទាំងផ្សព្វផ្សាយពួកគេទៅកាន់ពិភពលោក។  

 

រូងភ្នំ Son Doong - អច្ឆរិយៈធម្មជាតិគ្មានពីរនៅលើពិភពលោក

រូងភ្នំ Son Doong ត្រូវបានទទួលស្គាល់ដោយកំណត់ត្រាពិភពលោក Guinness និងសមាគមកំណត់ត្រាពិភពលោក ថាជា រូងភ្នំធំជាងគេបំផុតនៅលើពិភពលោក ដែលមានទទឹង ១៥០ ម៉ែត្រ កម្ពស់ ២០០ ម៉ែត្រ និងប្រវែងរហូតដល់ ៩ គីឡូម៉ែត្រ។ រូងភ្នំ Son Doong ស្ថិតនៅក្នុងឧទ្យានជាតិ Phong Nha - Ke Bang ដែលជាឧទ្យានជាតិធំជាងគេនៅវៀតណាម មានផ្ទៃដីប្រមាណ ១,២៣៣ គីឡូម៉ែត្រការ៉េ (~៣០៤ ពាន់អាក្រ)។ Phong Nha - Ke Bang ត្រូវបានគេប្រសិទ្ធនាមថាជា 'ព្រះរាជាណាចក្ររូងភ្នំ' ព្រោះក្រៅពីមានរូងភ្នំជាង ៣៥០ ត្រូវបានរកឃើញ នៅទីនេះអ្នកមិនត្រឹមតែអាចរកឃើញរូងភ្នំធំជាងគេបំផុតក្នុងលោកប៉ុណ្ណោះទេ ប៉ុន្តែថែមទាំងមានរូងភ្នំធំជាងគេទី ៣ ក្នុងលោកគឺ រូងភ្នំ En ផងដែរ។ គេអាចចូលទស្សនារូងភ្នំទាំងពីរនៅក្នុងបេសកកម្មដើរព្រៃតែមួយ ពេលដែលរូងភ្នំ En ត្រូវបានជ្រើសរើសជាចំណុចត្រួតពិនិត្យដំបូងនៅថ្ងៃដំបូងនៃដំណើរកម្សាន្តដើរព្រៃ Son Doong រយៈពេល ៤ ថ្ងៃ។ 

ត្រូវបានគេស្គាល់ថាជា “ស្តេចនៃរូងភ្នំ” លោក Howard Limbert - សមាជិកដំបូងគេម្នាក់នៃ BCRA ដែលបានរកឃើញរូងភ្នំ Son Doong ក្នុងឆ្នាំ២០០៩ បានថ្លែងថា៖ “ខ្ញុំមានសំណាងណាស់ដែលបានរុករករូងភ្នំចំនួន ៧០០ នៅទូទាំងប្រទេសវៀតណាម ហើយ ៣៥០ ក្នុងចំណោមនោះស្ថិតនៅក្នុងខេត្ត Quang Binh។ ហើយវាពិតជាអស្ចារ្យណាស់ដែលបានរកឃើញរូងភ្នំធំជាងគេបំផុតនៅលើពិភពលោកនៅក្នុងសតវត្សរ៍ទី ២១ នេះ។ សាកស្រមៃមើលថាលោកអ្នកបានរកឃើញភ្នំមួយដែលខ្ពស់ជាងភ្នំ Everest។ [..] ខ្ញុំជឿជាក់ថា Son Doong គឺវិសេសវិសាល ហើយមិនទាន់ត្រូវបានសិក្សាស្រាវជ្រាវពេញលេញនៅឡើយទេ។ រូងភ្នំធំៗមានពពកនៅក្នុងលំហធំៗ ប៉ុន្តែមានព្រៃឈើនៅក្នុងរូងភ្នំ និងប្រព័ន្ធអាកាសធាតុផ្ទាល់ខ្លួន - ខ្ញុំគិតថា Son Doong គឺពិតជាពិសេសណាស់។ មានប្រភេទទ្រង់ទ្រាយជីវិតថ្មីៗដែលត្រូវរង់ចាំអ្នកវិទ្យាសាស្ត្ររកឃើញ... យើងសង្ឃឹមថានៅពេលឆាប់ៗខាងមុខនេះ នឹងនាំយកអ្នកជំនាញខាងរុក្ខជាតិ និងសត្វប្រជៀវមកសិក្សា ព្រោះនៅមានការងារជាច្រើនទៀតដែលត្រូវធ្វើ។ ផ្នែកក្រោមទឹកចុងក្រោយនៅតែមិនទាន់បានរុករកចប់សព្វគ្រប់នៅឡើយ។”

ដើម្បីរុករក និងធ្វើជាសាក្សីនៃអច្ឆរិយៈធម្មជាតិដ៏អស្ចារ្យនៃពិភពលោកនេះ 'អ្នករុករក' នឹងទទួលបានបទពិសោធន៍នៃការរួមបញ្ចូលគ្នានៃកីឡាប្រថុយប្រថាននៅក្នុងបេសកកម្មតែមួយ ដូចជាការដើរព្រៃ ការដើរកាត់អូរ ការឡើងភ្នំ និងសូម្បីតែការជិះទូកកាយ៉ាក់ក្នុងរដូវវស្សា... ដែលតម្រូវឱ្យមានកម្លាំងកាយសម្បទាសមរម្យ និងបទពិសោធន៍ដើរព្រៃ។ ក្នុងរយៈពេល ៥ ឆ្នាំកន្លងមកនេះ រូងភ្នំ Son Doong បានស្វាគមន៍ភ្ញៀវទេសចរចំនួន ៣,៥០០ នាក់ ឱ្យមករុករករូងភ្នំនេះ នេះបើយោងតាមការបង្ហាញពីក្រុមហ៊ុន Oxalis Adventure ដែលជាក្រុមហ៊ុនរៀបចំដំណើរកម្សាន្តរុករក Son Doong តែមួយគត់។

 

ភាពធំស្កឹមស្កៃ និងភាពដើមនៃធម្មជាតិបង្កើតបានជាសម្រស់ដ៏កម្រនៃរូងភ្នំ Son Doong ( រូបថតដោយ Oxalis Adventure )

 

រួមដៃគ្នាផ្សព្វផ្សាយប្រទេសវៀតណាម - រស់នៅយ៉ាងពេញលេញក្នុងប្រទេសវៀតណាម

លោក Nguyen Le Phuc – អនុប្រធានរដ្ឋបាលជាតិទេសចរណ៍វៀតណាម បានមានប្រសាសន៍ថា៖ "រូងភ្នំ Son Doong ដែលត្រូវបានផ្តល់កិត្តិយសនៅលើទំព័រដើមរបស់ Google នាថ្ងៃនេះ គឺជាមោទនភាពរបស់ខេត្ត Quang Binh និងឧស្សាហកម្មទេសចរណ៍វៀតណាមទាំងមូល។ ក្នុងនាមជារូងភ្នំធំជាងគេនៅលើពិភពលោក ប្រាកដណាស់ថាភាពធំស្កឹមស្កៃ ទម្រង់ដីដ៏វិសេសវិសាល និងទេសភាពដ៏ស្រស់ស្អាតនៃ Son Doong នឹងផ្តល់ឱ្យអ្នកទស្សនានូវបទពិសោធន៍យ៉ាងជ្រាលជ្រៅ និងអស្ចារ្យ។ ខ្ញុំសូមជម្រាបថា ប្រទេសវៀតណាមបានបើកទ្វារឡើងវិញជាផ្លូវការសម្រាប់ទេសចរណ៍អន្តរជាតិ ជាមួយនឹងការអនុម័តការចូលប្រទេស និងវិធានការតេស្តដ៏សាមញ្ញ ហើយយើងក៏បានបន្តគោលការណ៍ផ្តល់ទិដ្ឋាការធម្មតាឡើងវិញផងដែរ។ អ្វីៗគ្រប់យ៉ាងត្រូវបានរៀបចំរួចរាល់ដើម្បីស្វាគមន៍អ្នកធ្វើដំណើរមកពីជុំវិញពិភពលោក ឱ្យមកទទួលយកបទពិសោធន៍យ៉ាងពេញលេញនៅក្នុងប្រទេសវៀតណាម។" 

អ្នកទស្សនាដែលមានបំណងចង់ស្វែងយល់អំពីរូងភ្នំ Son Doong ក៏អាចរីករាយជាមួយទិដ្ឋភាព ៣៦០ ដឺក្រេ និងកោតសរសើរសម្រស់របស់វានៅលើ Wonders of Vietnam - ដែលជាការពិព័រណ៍អនឡាញនៅលើ Google Arts & Culture (GAC) ដែលត្រូវបានដាក់ឱ្យដំណើរការនៅដើមឆ្នាំ ២០២១។ នៅទីនេះ ការពិព័រណ៍ចំនួន ៣៥ និងរូបថត ព្រមទាំងវីដេអូរាប់ពាន់សន្លឹកអំពីប្រទេសវៀតណាម អាចចូលមើលបានដោយគ្រាន់តែចុចពីរបីឃ្លីក ដើម្បីនាំមកនូវបទពិសោធន៍ពិតប្រាកដនៃវប្បធម៌ ប្រវត្តិសាស្ត្របុរាណ សិល្បៈ និងម្ហូបអាហាររបស់ប្រទេសវៀតណាមសម្រាប់អ្នកទស្សនាអនឡាញ។ នេះក៏ជាគម្រោងមួយក្នុងចំណោមគម្រោងដែលអគ្គនាយកដ្ឋានទេសចរណ៍វៀតណាមបានសហការជាមួយ Google ដើម្បីផ្សព្វផ្សាយតំបន់ទេសចរណ៍ និងទេសចរណ៍វៀតណាមផងដែរ។

«ក្នុងប៉ុន្មានឆ្នាំថ្មីៗនេះ រូងភ្នំ Son Doong បានក្លាយជាតំបន់ទាក់ទាញដ៏ល្បីល្បាញមួយ ដើម្បីផ្សព្វផ្សាយទេសចរណ៍ខេត្ត Quang Binh និងប្រទេសវៀតណាមទៅកាន់ពិភពលោក។ ប្រជាជនខេត្ត Quang Binh និងរូបខ្ញុំផ្ទាល់ មានមោទនភាពយ៉ាងខ្លាំងដែលបានឃើញ Son Doong ត្រូវបានបង្ហាញនៅលើទំព័រដើមរបស់ Google ដើម្បីទទួលស្គាល់សម្រស់ និងតម្លៃរបស់វា ព្រមទាំងណែនាំវាទៅកាន់ពិភពលោក។ ដោយសារតែការអភិវឌ្ឍផែនការទេសចរណ៍ និងការអភិរក្ស Son Doong នៅក្នុងឧទ្យានជាតិ Phong Nha - Ke Bang វាបានបង្កើតឱកាសការងារជាច្រើនសម្រាប់ប្រជាជនក្នុងស្រុក រួមចំណែកដល់ការកែទម្រង់រចនាសម្ព័ន្ធសេដ្ឋកិច្ច លើកកម្ពស់គុណភាពជីវិតនៅទីនេះ និងដាក់បញ្ចូល Phong Nha- Ke Bang នៅលើផែនទីរបស់អ្នកធ្វើដំណើរជុំវិញពិភពលោក។» លោក Ho An Phong - អនុប្រធានគណៈកម្មាធិការប្រជាជនខេត្ត Quang Binh

«ឆ្នាំ ២០១៣ គឺជាសំគាល់ចំណុចរបត់ដ៏សំខាន់មួយសម្រាប់ Oxalis នៅពេលដែលសំណើបេសកកម្មរុករករូងភ្នំ Son Doong ត្រូវបានស្នើសុំជាផ្លូវការទៅកាន់គណៈកម្មាធិការប្រជាជនខេត្ត Quang Binh ដើម្បីអនុម័ត។ រហូតមកដល់ពេលនេះ រូងភ្នំ Son Doong បានរួមចំណែកយ៉ាងធំធេងដល់វិស័យទេសចរណ៍នៃខេត្ត Quang Binh ជួយបង្កើតការងារដែលមានស្ថិរភាពសម្រាប់ប្រជាជនក្នុងស្រុក និងការអភិវឌ្ឍសេដ្ឋកិច្ចនៃខេត្ត។ ជាពិសេសនៅក្នុងឆ្នាំ ២០១៩ រូងភ្នំ Son Doong ត្រូវបានណែនាំដល់ផលិតករភាពយន្ត អ្នកដឹកនាំរឿង និងអ្នកដឹកនាំប្លង់ជិត ១០០ នាក់ នៅឯរាជធានីភាពយន្តពិភពលោក Hollywood ជាទីតាំង «សោភ័ណភាពដ៏ល្អឥតខ្ចោះ» សម្រាប់ការថតភាពយន្ត។ យើងបន្តរចនាប្រភេទទេសចរណ៍ពិសេសៗ ដើម្បីទាក់ទាញទេសចរណ៍ខេត្ត Quang Binh នាពេលអនាគត។» លោក Chau A Nguyen - នាយកក្រុមហ៊ុន Oxalis Adventure Tour បានចែករំលែក។

ក្រៅពី Son Doong doodle ក្រុមហ៊ុន Google ធ្លាប់បានផ្សព្វផ្សាយវប្បធម៌ ម្ហូបអាហារ និងតំបន់ទេសចរណ៍ល្បីៗរបស់ប្រទេសវៀតណាមកាលពីអតីតកាល ដូចជា Banh Mi doodle, Phở doodle, Hoi An ancient town doodle ជាការប្តេជ្ញាចិត្តក្នុងការផ្សព្វផ្សាយប្រទេសវៀតណាមទៅកាន់ពិភពលោក។

*) Doodles គឺជាការផ្លាស់ប្តូរប្លែកៗ សប្បាយៗ និងជួនកាលកើតឡើងដោយចៃដន្យ ដែលត្រូវបានធ្វើឡើងនៅលើឡូហ្គោរបស់ Google ដើម្បីប្រារព្ធពិធីបុណ្យ ថ្ងៃខួប និងជីវិតរបស់អ្នកសិល្បៈ អ្នកត្រួសត្រាយផ្លូវ និងអ្នកវិទ្យាសាស្ត្រល្បីៗ។ ចាប់តាំងពីឆ្នាំ ២០០៣ មក ទំព័រដើម Google ប្រទេសវៀតណាម (Google.com.vn) បានដាក់ស្នាដៃ Doodle ជាច្រើន ដែលជាវិធីរបស់ Google ក្នុងការផ្តល់កិត្តិយសដល់វប្បធម៌ដ៏ពិសេសនៅក្នុងប្រទេសវៀតណាម ក៏ដូចជាប្រារព្ធពិធីបុណ្យប្រពៃណីផ្សេងៗ ដូចជាទិវាគ្រូបង្រៀនវៀតណាម ពិធីបុណ្យសែនព្រះខែ បុណ្យចូលឆ្នាំចិន ទិវាជាតិ ព្រមទាំងឥស្សរជនពិសេសៗដូចជាអ្នកនិពន្ធបទចម្រៀង Trinh Cong Son កវី Xuan Quynh សិល្បករ Bui Xuan Phai...