ដាណាំង ប្រទេសវៀតណាម (១៥ មករា ២០១៩) – ទីលានវាយកូនគោលដែលបានរចនាឡើងដោយស្ថាបត្យករល្បីៗចំនួនប្រាំពីរនៅភាគកណ្តាលនៃប្រទេសវៀតណាម បានចាប់ដៃគ្នានៅក្នុងការបង្កើតក្រុមផ្សព្វផ្សាយទេសចរណ៍គោលដៅជាក់លាក់សម្រាប់កីឡាវាយកូនគោលថ្មីមួយ ដោយលាតសន្ធឹងចាប់ពីក្រុងដាណាំងដែលកំពុងរីកចម្រើន រហូតដល់ជើងភ្នំ Hue និងឆ្នេរ Hoi An។

Vietnam Golf Coast បានកត់សម្គាល់ការបើកសម្ពោធជាផ្លូវការរបស់ខ្លួននៅដាណាំងនាថ្ងៃនេះ ជាមួយនឹងការប្រកួត ១៨ រន្ធនៅ BRG Danang Golf Resort ព្រមទាំងព្រឹត្តិការណ៍សារព័ត៌មាន និងអាហារពេលល្ងាចប្រគល់រង្វាន់នៅ Sheraton Grand Danang។ តំណាងសារព័ត៌មានអន្តរជាតិ និងក្នុងស្រុក ថ្នាក់ដឹកនាំផ្នែកឧស្សាហកម្ម និងអ្នកស្នេហាកីឡាវាយកូនគោលបានជួបជុំគ្នាក្នុងព្រឹត្តិការណ៍នេះ ដែលកើតឡើងភ្លាមៗបន្ទាប់ពីប្រទេសវៀតណាមបានតែងតាំងកីឡាករវាយកូនគោលកម្រិត 'Hall of Fame' និងជាស្ថាបត្យករទីលានវាយកូនគោលដ៏ល្បីល្បាញលោក Greg Norman ជាទូតសុឆន្ទៈទេសចរណ៍ជាតិ។

នៅពេលចាប់ផ្តើមបង្កើតឡើង អង្គការផ្សព្វផ្សាយគោលដៅទេសចរណ៍ (DMO) ថ្មីនេះបានភ្ជាប់ទំនាក់ទំនងទីលានវាយកូនគោលឆ្នើមៗដែលទទួលបានការវាយតម្លៃខ្ពស់បំផុតចំនួនប្រាំពីរនៅក្នុងតំបន់៖ Laguna Golf Lang Co (រចនាដោយ Sir Nick Faldo), Ba Na Hills Golf Club (រចនាដោយ Luke Donald), Montgomerie Links (រចនាដោយ Colin Montgomerie), BRG Danang Golf Resort (រចនាដោយ Greg Norman និង Jack Nicklaus), Vinpearl Golf Nam Hoi An (IMG Design) -- ព្រមទាំង Hoiana Shores Golf Club ដែលនឹងបើកដំណើរការក្នុងពេលឆាប់ៗនេះ (រចនាដោយ Robert Trent Jones Jr.) -- នៅក្នុងសម្ព័ន្ធភាពមួយដែលសន្យថានឹងទាក់ទាញចាប់អារម្មណ៍ពីអ្នកស្នេហាកីឡាវាយកូនគោលទូទាំងពិភពលោក។

«គោលដៅរបស់ Vietnam Golf Coast គឺដើម្បីលេចត្រដែតឡើងនូវទីលានវាយកូនគោលដ៏អស្ចារ្យនៅទីនេះក្នុងភាគកណ្តាលនៃប្រទេសវៀតណាម» លោក Ben Styles ប្រធានក្រុម Vietnam Golf Coast Group បានមានប្រសាសន៍ថា។ «យើងរួមគ្នាមានឱកាសបង្ហាញពីវីរបុរសនៃកីឡាវាយកូនគោល និងស្ថាបត្យកម្មទីលានវាយកូនគោលនៅក្នុងទីតាំងតែមួយ អមជាមួយនឹងឆ្នេរខ្សាច់ដ៏ស្អាតបរិសុទ្ធ និងសកម្មភាពទេសចរណ៍ដ៏ទាក់ទាញសម្រាប់អ្នករាល់គ្នា»។

ទីលានវាយកូនគោលរបស់ប្រទេសវៀតណាមទទួលបានពានរង្វាន់ជាច្រើនក្នុងប៉ុន្មានឆ្នាំថ្មីៗនេះ។ ប្រទេសនេះត្រូវបានជ្រើសរើសជា 'គោលដៅទេសចរណ៍កីឡាវាយកូនគោលល្អបំផុតនៅអាស៊ី' នៅក្នុងកម្មវិធី World Golf Awards ក្នុងឆ្នាំ ២០១៧ និង ២០១៨។  

Golf Digest បានដាក់ឈ្មោះ Laguna Lang Co Golf Resort ស្ថិតក្នុងចំណោម 'តំបន់រមណីយដ្ឋានវាយកូនគោលល្អបំផុតនៅអាស៊ី' ហើយ BRG Danang Golf Resort ត្រូវបានជាប់ក្នុងបញ្ជី 'ទីលានវាយកូនគោលល្អបំផុតទាំង ១០០ ក្នុងពិភពលោក' របស់ទស្សនាវដ្តីនេះក្នុងឆ្នាំ ២០១៨។ Ba Na Hills Golf Club បានទទួលពានរង្វាន់ជា 'ក្លឹបវាយកូនគោលល្អបំផុតនៅអាស៊ី' នៅក្នុងកម្មវិធី World Golf Awards ឆ្នាំ ២០១៨ ខណៈដែល Montgomerie Links ទទួលបានជ័យលាភី 'ទីលានវាយកូនគោលល្អបំផុតនៅវៀតណាម' នៅក្នុងកម្មវិធី Asian Golf Awards ឆ្នាំ ២០១៨។ Vinpearl Golf Nam Hoi An កាលពីពេលថ្មីៗនេះបានធ្វើជាម្ចាស់ផ្ទះនៃការប្រកួតជុំជម្រុះនៃ Vinpearl World Amateur Golfers Championship ដែលបន្ទាប់មកក្រុមវាយកូនគោលវៀតណាមបានការពារជើងឯក WAGC 2018 ដោយជោគជ័យនៅប្រទេសម៉ាឡេស៊ី។

លោក Nguyen Xuan Binh អនុប្រធាននាយកដ្ឋានទេសចរណ៍ដាណាំង បានសង្កត់ធ្ងន់លើការទាក់ទាញកាន់តែខ្លាំងឡើងនៃភាគកណ្តាលប្រទេសវៀតណាមសម្រាប់អ្នកវាយកូនគោល។ «ជាមួយនឹងទីលានវាយកូនគោលដ៏ល្បីល្បាញជាអន្តរជាតិទាំងអស់នេះនៅកន្លែងតែមួយ វាជាឱកាសដ៏ល្អសម្រាប់អ្នកវាយកូនគោលមកពីទូទាំងពិភពលោកមកកម្សាន្ត និងសម្រេចចិត្តថាតើទីលានមួយណាជាទីប្រាថ្នារបស់ពួកគេ» លោកបានមានប្រសាសន៍។

សម្រាប់ព័ត៌មានបន្ថែមអំពី Vietnam Golf Coast សូមចូលទៅកាន់ www.vietnamgolfcoast.vn

 

###

 

បង្កើតឡើងក្នុងឆ្នាំ ២០១៩ Vietnam Golf Coast គឺជាអង្គការផ្សព្វផ្សាយគោលដៅទេសចរណ៍ដែលប្តេជ្ញាចិត្តចំពោះការលូតលាស់នៃទេសចរណ៍កីឡាវាយកូនគោលនៅភាគកណ្តាលនៃប្រទេសវៀតណាម។ អង្គការនេះនាពេលបច្ចុប្បន្នមានទីលានចំនួនប្រាំពីរ៖ Laguna Golf Lang Co, Ba Na Hills Golf Club, Montgomerie Links, BRG Danang Golf Resort, BRG Danang Nicklaus Course, Vinpearl Golf Nam Hoi An និង Hoiana Shores Golf Club។ សមាជិកនៃ Vietnam Golf Coast មានគោលបំណងរួមគ្នាក្នុងការផ្សព្វផ្សាយឆ្នេរភាគកណ្តាលនៃប្រទេសវៀតណាមជាគោលដៅកម្រិតពិភពលោកសម្រាប់កីឡាវាយកូនគោល និងវប្បធម៌ បង្កើតការងារក្នុងសហគមន៍មូលដ្ឋាន និងលើកកម្ពស់ស្តង់ដារនៃកីឡាវាយកូនគោលនៅក្នុងប្រទេសវៀតណាម។

---