វៀតណាម - គោលដៅដែលមានសុវត្ថិភាពបំផុតក្នុងការទស្សនានៅអាស៊ី

នៅក្នុងអត្ថបទ “This Is The Safest Country To Visit In Asia For 2024” ដោយ Travel Off Path ដែលជាគេហទំព័រព័ត៌មានទេសចរណ៍ដ៏ធំបំផុតមួយរបស់អាមេរិកខាងជើង ប្រទេសវៀតណាមត្រូវបានចាត់ទុកថាជា គោលដៅដែលមានសុវត្ថិភាពបំផុតនៅអាស៊ី។

យោងតាមរបាយការណ៍ចុងក្រោយបង្អស់នៃសន្ទស្សន៍ច្បាប់ និងសណ្តាប់ធ្នាប់សកល (Global Law and Order Index) វៀតណាមមិនត្រឹមតែជាប្រទេសដែលមានសន្តិភាពបំផុតនៅអាស៊ីប៉ុណ្ណោះទេ ប៉ុន្តែថែមទាំងឈរនៅចំណាត់ថ្នាក់លេខ ៧ នៅលើពិភពលោកផងដែរ។ ប្រទេសនេះជាប្រទេសដែលមានចំណាត់ថ្នាក់ខ្ពស់ជាងគេនៅអាស៊ី ដោយទទួលបានពិន្ទុគួរឱ្យស្ញប់ស្ញែង ៩២ ក្នុងចំណោមពិន្ទុអតិបរមា ១០០ ក្នុងចំណោមប្រទេសកំពូលទាំង ១០ ដែលភាគច្រើនគ្រប់គ្រងដោយប្រទេសនៅអឺរ៉ុប។

ទីក្រុងបុរាណហូយអាន (Hoi An Ancient Town)

អ្នកធ្វើដំណើរលោកខាងលិចកំពុងត្រលប់មកកាន់ទ្វីបនៃស្នាមញញឹមដ៏រាក់ទាក់យ៉ាងកកកុញ ហើយការចាប់អារម្មណ៍ទាំងអស់ត្រូវបានតម្រង់ទៅរកប្រទេសវៀតណាម ដែលជាគ្រាប់ពេជ្រនៃអាស៊ីអាគ្នេយ៍បន្ទាប់ពីវិបត្តិនៃជំងឺកូវីដ-១៩។ វៀតណាមបានបង្ហាញថាជាទីកន្លែងដែលមានសុវត្ថិភាព និងគួរឱ្យទុកចិត្តយ៉ាងខ្លាំងសម្រាប់ទេសចរដែលប្រាថ្នាចង់ដាក់អាស៊ីចូលក្នុងបញ្ជីបំណងធ្វើដំណើររបស់ពួកគេ។ ដោយបន្សល់ទុកនូវប្រវត្តិសាស្ត្រសង្គ្រាមទាំងស្រុង វៀតណាមក្នុងសម័យទំនើបគឺ មានភាពរុងរឿង និងសន្តិភាព ដោយមានអត្រាឧក្រិដ្ឋកម្មទាប និងស្ថិរភាពនយោបាយយ៉ាងគួរឱ្យកត់សម្គាល់ នេះបើយោងតាមការលើកឡើងរបស់ Travel Off Path។

ប្រសិនបើអ្នកកំពុងស្វែងរកដំណើរកម្សាន្តដើម្បីសម្រាកលំហែកាយ និងភ្ជាប់ទំនាក់ទំនងឡើងវិញជាមួយធម្មជាតិ វៀតណាមគឺជាប្រទេសដ៏ស័ក្តិសមសម្រាប់អ្នក។ អ្នកដែលចូលចិត្តវប្បធម៌នឹងចូលចិត្តប្រទេសវៀតណាម ដោយសារប្រទេសនេះផ្តល់នូវតម្លៃវប្បធម៌ដ៏សម្បូរបែប រួមជាមួយនឹងបេតិកភណ្ឌពិភពលោកដែលនៅរាយប៉ាយចាប់ពីភាគខាងជើងរហូតដល់ភាគខាងត្បូង។

ភ្ញៀវទេសចរអាចដើរកម្សាន្តតាមដងផ្លូវពណ៌លឿងដ៏គួរឱ្យទាក់ទាញនៃទីក្រុងបុរាណហូយអាន ដែលជាកំពង់ផែបុរាណ និងជាបេតិកភណ្ឌពិភពលោករបស់ UNESCO ដែលត្រូវបានទទួលស្គាល់ដោយសារប្រាសាទបុរាណជាច្រើន និងស្ថាបត្យកម្មសម័យអាណានិគមបារាំង។

ទីក្រុង Hue ដែលនៅជិតខាង ដែលជាបុរីរាជធានីបុរាណក្នុងរជ្ជកាលស្តេច ង្វៀន (Nguyen Dynasty) ឬស្ពានមាស (Golden Bridge) ដ៏ធំសម្បើមនៃទីក្រុងដាណាង សុទ្ធតែជាកន្លែងដែលគួរសិក្សាស្វែងយល់។ តើអ្នកត្រូវការវីតាមីនសមុទ្រដែរឬទេ? ធ្វើដំណើរបន្តចុះតាមឆ្នេរសមុទ្រ រករីករាយជាមួយឆ្នេរខ្សាច់ ព្រមទាំងទស្សនាវាលខ្សាច់ពណ៌មាសនៃតំបន់ Mui Ne។

ឆ្នេរ Mui Ne ក្រុង Phan Thiet

ស្ពានមាស (The Golden Bridge) ទីក្រុងដាណាង

ចាប់ពីទីក្រុងដ៏មមាញឹកហូជីមិញ ឆ្នេរសមុទ្រដ៏ស្រស់ស្អាតនៅ Nha Trang រហូតដល់ទីក្រុងហាណូយ ដែលជារាជធានីនៃប្រទេសវៀតណាម ការរត់គេចទៅរកធម្មជាតិនៅ Ninh Binh ដែលជាដីល្បីល្បាញដោយសារវាលស្រែ និងរមណីយដ្ឋានទេសភាព Trang An អ្នកពិតជាមិនដែលអស់បញ្ជីសកម្មភាព ‘ត្រូវធ្វើ’ នោះឡើយ នៅពេលរុករកប្រទេសនេះ។

ជាមួយនឹងគោលនយោបាយទិដ្ឋាការអេឡិចត្រូនិក (e-visa) ថ្មី ដែលអនុញ្ញាតឱ្យភ្ញៀវទេសចរអន្តរជាតិស្នាក់នៅក្នុងប្រទេសវៀតណាមបានរហូតដល់ ៩០ ថ្ងៃ Travel Off Path បានកោតសរសើរប្រទេសវៀតណាមយ៉ាងខ្លាំងថា “វាជារឿងដ៏ល្អមួយដែលអាជ្ញាធរមូលដ្ឋានកំពុងស្វាគមន៍ទេសចរដោយបើកដៃចំហ”។ នេះជាឱកាសដ៏ល្អសម្រាប់ភ្ញៀវទេសចរក្នុងការធ្វើឱ្យដំណើរកម្សាន្តរបស់ពួកគេកាន់តែវែងឆ្ងាយ ដើម្បីរីករាយជាមួយប្រទេសវៀតណាមឱ្យបានពេញលេញ!