ហាណូយ ប្រទេសវៀតណាម (ថ្ងៃទី ៥ ខែកក្កដា ឆ្នាំ ២០១៨) -- អ្នកទេសចរមកកាន់ប្រទេសវៀតណាមឥឡូវនេះមានប្រភពធនធានកម្រិតពិភពលោកនៅចុងម្រាមដៃរបស់ពួកគេ តាមរយៈការដាក់ឱ្យដំណើរការនូវ www.vietnam.travel ដែលជាគេហទំព័រទេសចរណ៍ផ្លូវការរបស់ប្រទេសនេះ។ 

ថ្លែងនៅក្នុងសន្និសីទសារព័ត៌មានមួយនៅទីក្រុងហាណូយនាថ្ងៃទី ៥ ខែកក្កដា ឆ្នាំ ២០១៨ ថ្នាក់ដឹកនាំផ្នែកទេសចរណ៍បានថ្លែងថា គេហទំព័រនេះត្រូវបានរចនាឡើងដើម្បីផ្តល់នូវព័ត៌មានដែលមានគុណភាព និងការបំផុសគំនិតសម្រាប់អ្នកធ្វើដំណើរ ហើយនឹងប្រើប្រាស់យុទ្ធសាស្ត្រទីផ្សារឌីជីថលចុងក្រោយបង្អស់ដើម្បីចែករំលែកទ្រព្យសម្បត្តិទេសចរណ៍របស់ប្រទេសវៀតណាមជាមួយទស្សនិកជនទូទាំងពិភពលោក។

ដែនគេហទំព័រនេះ ដែលបានបង្ហាញខ្លួនជាលើកដំបូងកាលពីថ្ងៃទី ១៥ ខែមិថុនា ត្រូវបានគ្រប់គ្រងដោយក្រុមប្រឹក្សាប្រឹក្សាទេសចរណ៍ (TAB) ក្នុងកិច្ចសហការយ៉ាងជិតស្និទ្ធជាមួយអគ្គនាយកដ្ឋានទេសចរណ៍ជាតិវៀតណាម (VNAT)។ តាមរយៈកម្រងរឿងរ៉ាវគួរឱ្យចាប់អារម្មណ៍ ការសម្ភាសន៍ វីដេអូ ការទស្សនាតាមបច្ចេកវិទ្យានិម្មិត និងរូបថតអាជីព គេហទំព័រនេះមានគោលបំណងទាក់ទាញអ្នកប្រើប្រាស់ឱ្យមកស្វែងយល់ពីប្រទេសវៀតណាម ក្នុងនាមជាគោលដៅវិស្សមកាលដ៏រស់រវើក និងងាយស្រួលចូលទៅកម្សាន្ត។ 

នៅលើដែនគេហទំព័រថ្មីនេះ ក៏មានផ្ទុកនូវអត្ថបទអនុវត្តជាក់ស្តែងផងដែរ -- ដោយផ្តល់នូវការណែនាំដ៏គួរឱ្យទុកចិត្តលើគ្រប់កិច្ចការទាំងអស់ ចាប់ពីការស្នើសុំទិដ្ឋាការ រហូតដល់ពិធីបុណ្យផ្សេងៗរបស់វៀតណាម -- ដើម្បីជួយគាំទ្រដល់អ្នកធ្វើដំណើរក្នុការរៀបចំផែនការវិស្សមកាល។ ទំព័រ Facebook និង Instagram ផ្លូវការរបស់ទេសចរណ៍វៀតណាម ត្រូវបានភ្ជាប់ទៅកាន់គេហទំព័រនេះ ក្នុងនាមជាវេទិកាសម្រាប់អ្នកធ្វើដំណើរក្នុងការស្វែងយល់បន្ថែមអំពីប្រទេសវៀតណាម និងចែករំលែកបទពិសោធន៍ពីដំណើរទេសចរណ៍របស់ពួកគេ។

ចំណុចលេចធ្លោមួយចំនួនដែលអ្នកប្រើប្រាស់អាចជួបប្រទះនៅលើគេហទំព័ររួចហើយនោះគឺ ការទស្សនា ៣៦០ ដឺក្រេនៃបេតិកភណ្ឌពិភពលោក UNESCO កំពូលៗ ទំព័រព័ត៌មានលម្អិតអំពីគោលដៅទេសចរណ៍វៀតណាមចំនួន ១៨ កន្លែង និង ‘Vietnam Starter Kit’ ដែលអាចទាញយកបានសម្រាប់អ្នកធ្វើដំណើរលើកដំបូង។ អ្នកប្រឹក្សាផ្នែកទីផ្សារ TAB កញ្ញា Dieu Anh Phung បានឱ្យដឹងថា ប្រភពធនធានលំដាប់ថ្នាក់ឆ្នើមជាច្រើនទៀតសម្រាប់អ្នកធ្វើដំណើរកំពុងត្រូវបានរៀបចំសម្រាប់ឆ្នាំនេះ រួមទាំងយុទ្ធនាការវីដេអូ និងវីដេអូខ្លីផ្សព្វផ្សាយការធ្វើដំណើរនៅវៀតណាមសម័យទំនើប។

«ទំព័រ www.vietnam.travel មានគោលបំណងផ្តល់ព័ត៌មាន និងផ្តល់ការបំផុសគំនិតដល់អ្នកធ្វើដំណើរនៅគ្រប់ដំណាក់កាលនៃដំណើរទេសចរណ៍របស់ពួកគេ» កញ្ញា Phung បានមានប្រសាសន៍ថា។ «TAB បានស្នើសុំជំនួយពីអ្នកជំនាញផ្នែកទីផ្សារឌីជីថលឈានមុខគេ ដើម្បីប្រឹក្សាយោបល់លើខ្លឹមសារ និងយុទ្ធសាស្ត្រ ហើយយើងពិតជារំភើបយ៉ាងខ្លាំងចំពោះសក្តានុពលនៃគេហទំព័រនេះ និងលទ្ធភាពជាច្រើននៅខាងមុខ»។

ដែនគេហទំព័រថ្មី យុទ្ធនាការវីដេអូ និងគណនីបណ្តាញសង្គមរបស់វា ត្រូវបានឧបត្ថម្ភដោយសមាជិកនៃវិស័យទេសចរណ៍ឯកជនរបស់ប្រទេសវៀតណាម រួមមាន Thien Minh Group, HG Holdings, Saigon Tourist, Hanoi Tourist, Vingroup, Sungroup, Muong Thanh Hospitality និង Vingroup។ ភាគីនីមួយៗបានចូលរួមវិភាគទានដល់ «មូលនិធិទេសចរណ៍វៀតណាមឆ្នាំ ២០២០» ដែលត្រូវបានគ្រប់គ្រងដោយ TAB ក្នុងគោលបំណងលើកកម្ពស់វិស័យទេសចរណ៍នៅក្នុងប្រទេស។ 

 

###

 

អំពី TAB

ក្រុមប្រឹក្សាប្រឹក្សាទេសចរណ៍វៀតណាម (TAB) គឺជាសម្ព័ន្ធនៃថ្នាក់ដឹកនាំឧស្សាហកម្ម និងភាគីពាក់ព័ន្ធមកពីវិស័យធ្វើដំណើរ និងទេសចរណ៍ឯកជន។ ដៃគូបច្ចុប្បន្នរួមមាន Thien Minh Group, SunGroup, Vietnam Airlines, VinGroup, Saigon Tourist, Hanoi Tourist, Muong Thanh Group និង HG Holdings។ TAB បានចូលរួមក្នុងកិច្ចព្រមព្រៀងដៃគូជាមួយអគ្គនាយកដ្ឋានទេសចរណ៍ជាតិវៀតណាម (VNAT) ដើម្បីលើកកម្ពស់ការអភិវឌ្ឍទេសចរណ៍ប្រកបដោយចីរភាពនៅក្នុងប្រទេស។ TAB មានទីស្នាក់ការនៅរាជធានីហាណូយ ហើយបច្ចុប្បន្នគ្រប់គ្រងគេហទំព័រទេសចរណ៍ផ្លូវការរបស់ប្រទេសវៀតណាម និងវេទិកាបណ្តាញសង្គមរបស់ខ្លួនក្នុងនាម VNAT។

---