ຮ່າໂນ້ຍ, ຫວຽດນາມ (7 ຕຸລາ 2019) — ເລື່ອງລາວກ່ຽວກັບການເດີນທາງຂອງຫວຽດນາມ ມາຮອດປັດຈຸບັນ ແມ່ນຫົວໃຈຫຼັກຂອງແຄມເປນການຕະຫຼາດໃໝ່ ຈາກອົງການທ່ອງທ່ຽວແຫ່ງຊາດຫວຽດນາມ (VNAT). 

ເຈົ້າໜ້າທີ່ຈາກຄະນະທ່ອງທ່ຽວຫວຽດນາມ ໄດ້ເປີດໂຕ #VietnamNOW ເປັນສ່ວນໜຶ່ງຂອງຍຸດທະສາດການຕະຫຼາດດຶງດູດນັກທ່ອງທ່ຽວຕ່າງປະເທດ ຢູ່ທີ່ ຮ່າໂນ້ຍ ໃນມື້ນີ້. #VietnamNOW, ເຊິ່ງເປັນແນວຄິດການຮ່ວມມືລະຫວ່າງ VNAT ແລະ ຄະນະທີ່ປຶກສາການທ່ອງທ່ຽວຫວຽດນາມ (TAB), ນຳສະເໜີມຸມມອງໃໝ່ ແລະ ທັນສະໄໝ ຂອງຫວຽດນາມ ຕໍ່ນັກທ່ອງທ່ຽວທົ່ວໂລກ. 

ແຄມເປນນີ້ໄດ້ສ່ອງແສງໃຫ້ເຫັນເຖິງປະສົບການທີ່ໜ້າຕື່ນເຕັ້ນຫຼາກຫຼາຍ ແລະ ຜະລິດຕະພັນລະດັບໂລກ ທີ່ຫວຽດນາມ ມອບໃຫ້ກັບຜູ້ມາຢ້ຽມຢາມ, ຄຽງຄູ່ກັບຄວາມງາມທາງທຳມະຊາດທີ່ມີຊື່ສຽງ, ແລະ ແຫຼ່ງທ່ອງທ່ຽວທາງປະຫວັດສາດ ແລະ ວັດທະນະທຳທີ່ຮັ່ງມີ. 

“ຜ່ານ #VietnamNOW ພວກເຮົາມຸ່ງຫວັງທີ່ຈະຂະຫຍາຍພາບະລັກຂອງຫວຽດນາມ ໃນຕ່າງປະເທດ, ໂດຍການສະແດງໃຫ້ເຫັນຕົວເລືອກທີ່ໂດດເດັ່ນຫຼາຍຂຶ້ນ ທີ່ມີຢູ່ໃນຫວຽດນາມ ໃນປັດຈຸບັນ,” ທ່ານ ດິ້ງ ຫງອກ ດຶກ (Dinh Ngoc Duc), ຫົວໜ້າກົມສົ່ງເສີມການຕະຫຼາດການທ່ອງທ່ຽວຂອງ VNAT ກ່າວ. “ຫວຽດນາມ ມີຄວາມເປັນໄປໄດ້ຢ່າງຫຼວງຫຼາຍ ໃຫ້ນັກທ່ອງທ່ຽວໄດ້ເພີດເພີນ ແລະ ຄົ້ນຫາ. ພວກເຮົາມຸ່ງຫວັງທີ່ຈະສະຫຼອງສິ່ງທີ່ດີທີ່ສຸດຂອງການທ່ອງທ່ຽວໃນຫວຽດນາມ ມື້ນີ້ ຜ່ານຂໍ້ຄວາມ #VietnamNOW.”

ເຈົ້າໜ້າທີ່ VNAT ປະກາດວ່າ ນອກຈາກການສົ່ງເສີມອາຫານຂ້າງທາງທີ່ມີຊື່ສຽງຂອງຫວຽດນາມ, ມໍລະດົກໂລກ UNESCO, ຂຸມຊັບທາງວັດທະນະທຳ ແລະ ທັດສະນີຍະພາບທາງທຳມະຊາດແລ້ວ, #VietnamNOW ຍັງຈະເນັ້ນໃສ່ຕົວເລືອກໃໝ່ໆ ສຳລັບນັກທ່ອງທ່ຽວ ເຊັ່ນ: ການທ່ອງທ່ຽວກອຟ, ການພັກຜ່ອນເພື່ອສຸຂະພາບ, ຣີສອດຫຸຼຮາ, ການທ່ອງທ່ຽວແບບຜະຈົນໄພ ແລະ ການພັກຜ່ອນໃນເມືອງ. ງານຕ່າງໆ ເຊັ່ນ: ເທດສະການ, ງານວິ່ງມາຣາທອນ ແລະ ການແຂ່ງຂັນລົດສູດ 1 ປີ 2020 ຢູ່ຮ່າໂນ້ຍ ຈະຖືກນຳໃຊ້ເພື່ອສ້າງຄວາມຮັບຮູ້ກ່ຽວກັບຊັບພະຍາກອນການທ່ອງທ່ຽວທີ່ຫຼາກຫຼາຍຂອງຫວຽດນາມ. 

ເພື່ອເລີ່ມຕົ້ນແຄມເປນໃໝ່, VNAT ກຳລັງຈັດການປະກວດຮູບພາບ #VietnamNOW Photo Contest ຢູ່ເທິງໜ້າ Facebook ຂອງຕົນ (@vietnamtourismboard). ຜູ້ສະໝັກໄດ້ຮັບການຊຸກຍູ້ໃຫ້ສົ່ງຮູບພາບທີ່ດີທີ່ສຸດຂອງເຂົາເຈົ້າກ່ຽວກັບ #VietnamNOW ເພື່ອມີໂອກາດຊະນະທຣິບພັກຜ່ອນໃນຫວຽດນາມ ແລະ ຊຸດຂອງຂວັນແບຣນເນມ ເພື່ອນຳກັບເຮືອນ. ລາງວັນສຳລັບຮູບພາບທີ່ຊະນະສອງຮູບ ແມ່ນ ທຣິບພັກຜ່ອນຢູ່ InterContinental Phu Quoc Long Beach Resort ລະດັບ 5 ດາວ ພ້ອມຕົ໋ວເຄື່ອງບິນພາຍໃນປະເທດໄປຍັງ ຟູ໋ກວກ (Phu Quoc), ແລະ ທຣິບລ່ອງເຮືອຄ້າງຄືນ ພ້ອມທົວໄຮໂດຣເພຼນຊົມວິວໃນອ່າວ ຮາລອງ (Ha Long Bay) ຈາກ L'Azalée Ha Long Bay Cruises ແລະ Hai Au Aviation. ການປະກວດເປີດຮັບຜົນງານຈົນຮອດວັນທີ 30 ຕຸລາ 2019.

ການປະກວດຮູບພາບນີ້ ແມ່ນກິດຈະກຳທຳອິດໃນຊຸດກິດຈະກຳທີ່ VNAT ແລະ TAB ຈະດຳເນີນການພາຍໃຕ້ແຄມເປນ #VietnamNOW. ນັກທ່ອງທ່ຽວສາມາດຊອກຫາແຮງບັນດານໃຈ ແລະ ຂໍ້ມູນກ່ຽວກັບຫວຽດນາມ ໄດ້ທີ່ເວັບໄຊການທ່ອງທ່ຽວແຫ່ງຊາດ, www.vietnam.travel. ຜູ້ຕິດຕາມ @vietnamtourismboard ເທິງ Facebook ແລະ Instagram ສາມາດລໍຖ້າການແຈກຂອງລາງວັນປະຈຳເດືອນ ຈາກແບຣນຊັ້ນນຳຂອງຫວຽດນາມ, ແລະ ສະມາດໃຊ້ແຮຊແທັກ ແລະ ສະຕິກເກີ #VietnamNOW ເພື່ອແບ່ງປັນເລື່ອງລາວຈາກການເດີນທາງຂອງເຂົາເຈົ້າ.

VNAT ພ້ອມທີ່ຈະເປີດໂຕແນວຄິດ #VietnamNOW ໃນງານ World Travel Market ທີ່ລອນດອນ ໃນເດືອນພະຈິກ 2019 ທີ່ຈະມາເຖິງນີ້. ນອກຈາກນີ້, VNAT ຈະເປີດໂຕວິດີໂອຕົວຢ່າງ #VietnamNOW ຊຸດ 5 ຕອນ ທີ່ນຳສະເໜີຊັບພະຍາກອນການທ່ອງທ່ຽວທີ່ດີທີ່ສຸດຂອງປະເທດ, ການປະກວດ 'I Wish I Was in #VietnamNOW' ທີ່ມີລາງວັນຕົ໋ວເຄື່ອງບິນຟຣີໄປຫວຽດນາມ, ພ້ອມທັງຄູ່ມື #VietnamNOW ທີ່ສາມາດດາວໂຫຼດໄດ້ ສຳລັບນັກທ່ອງທ່ຽວທີ່ມາຢ້ຽມຢາມປະເທດເປັນຄັ້ງທຳອິດ. 

 

---