10 ງານແລ່ນມາຣາທອນທີ່ມີເອກະລັກໃນຫວຽດນາມ

ເຕັມໄປດ້ວຍໂຮງແຮມ ແລະ ຣີສອດໃໝ່ທີ່ທັນສະໄໝ, ເມືອງດານັງ ແມ່ນສະຖານທີ່ຈັດການແຂ່ງຂັນທີ່ສວຍງາມທີ່ສຸດແຫ່ງໜຶ່ງໃນອາຊີຕາເວັນອອກສ່ຽງໃຕ້, ນັ້ນຄື Manulife Danang International Marathon. ການແຂ່ງຂັນປະຈໍາປີນີ້ມີຫຼາຍໄລຍະທາງໃຫ້ເລືອກ, ຕັ້ງແຕ່ການແລ່ນ 1 ກິໂລແມັດ ໄປຈົນເຖິງມາຣາທອນເຕັມຮູບແບບທີ່ທ້າທາຍ. ຜ່ອນຄາຍເທິງເກົ້າອີ້ຊາຍຮາດໃນຮົ່ມ, ຫຼື ໃຫ້ລາງວັນຕົວເອງຢູ່ຮ້ານອາຫານທະເລທີ່ມີຢູ່ຫຼວງຫຼາຍຂອງດານັງ ຫຼັງຈາກທີ່ທ່ານເຂົ້າເສັ້ນໄຊແລ້ວ.  

ເມື່ອໃດ: ວັນທີ 20 ມີນາ 2022

ເມືອງຮາລອງມີຊາຍຝັ່ງທະເລທີ່ງົດງາມທີ່ສຸດແຫ່ງໜຶ່ງໃນພູມິພາກ. ດ້ວຍໜ້າຜາຫີນປູນທີ່ໂດດເດັ່ນເຊິ່ງໄດ້ຮັບການປົກປ້ອງຈາກ UNESCO ເປັນສາກຫຼັງ, ເຂົ້າຮ່ວມການແຂ່ງຂັນກັບນັກແລ່ນທີ່ມີຄວາມຫຼົງໄຫຼຄົນອື່ນໆໃນ Halong Bay International Heritage Marathon. ສະພາບອາກາດທີ່ສະບາຍ ແລະ ທິວທັດທີ່ງົດງາມປານຝັນຂອງຮາລອງຈະຮັບປະກັນການແລ່ນທີ່ໜ້າເພີດເພີນ. ດ້ວຍໄລຍະທາງທີ່ຫຼາກຫຼາຍໃຫ້ເລືອກຕັ້ງແຕ່ຟັນຣັນ 10 ກິໂລແມັດ ໄປຈົນເຖິງມາຣາທອນເຕັມຮູບແບບ, ທ່ານສາມາດເລືອກລະດັບຄວາມຍາກຂອງໂຕເອງໄດ້. ຫຼັງຈາກນັ້ນ, ຄົ້ນພົບສະຖານທີ່ທ່ອງທ່ຽວຂອງເມືອງຮາລອງ, ຫຼື ຜ່ອນຄາຍເທິງເຮືອລ່ອງທ່ອງທ່ຽວສຸດຫູຫລາຄ້າງຄືນ.

ເມື່ອໃດ: ວັນທີ 13 ພະຈິກ 2022

ເນີນພູທີ່ຄອບຄຸມດ້ວຍໝອກຂອງຊາປາ ຖືເປັນຄວາມທ້າທາຍທີ່ຄຸ້ມຄ່າໃນ Vietnam Mountain Marathon ນີ້. ພູມປະເທດທີ່ເປັນຊັນສູງສ່ວນໃຫຍ່ຮັບປະກັນທິວທັດທີ່ຕາຕະລຶງລວມເຖິງການແລ່ນທີ່ທ້າທາຍ. ມິໄລຍະທາງຫຼາກຫຼາຍຕັ້ງແຕ່ 5 ກິໂລແມັດ ໄປຈົນເຖິງຊຸບເປີມາຣາທອນ 100 ກິໂລແມັດ. ບໍ່ວ່າທ່ານຈະມັກການແລ່ນໄລຍະສັ້ນຜ່ານທົ່ງນາ, ຫຼື ຄວາມທ້າທາຍທາງຮ່າງກາຍຄັ້ງໜຶ່ງໃນຊີວິດ, ທ່ານຈະໄດ້ຮັບຄວາມຊົງຈໍາທີ່ດີຢູ່ຊາປາຢ່າງແນ່ນອນ.

ເມື່ອໃດ: ວັນທີ 09-11 ກັນຍາ 2021

ປີລະຄັ້ງ, ສຽງແກໂມເຕີໄຊຈະຖືກຫ້າມຢູ່ຕາມຖະໜົນຫົນທາງຂອງ ຮ່າໂນ້ຍ. ແທນທີ່ຈະເປັນແນວນັ້ນ, ນັກແລ່ນຫຼາຍພັນຄົນຈະມາເຕັມຖະໜົນສໍາລັບການແຂ່ງຂັນ VPBank Hanoi Marathon. ການແລ່ນນີ້ຈະຂ້າມຂົວລອງບຽນ ແລະ ຄົດເຄ້ຽວຜ່ານຕົວເມືອງ, ຜ່ານສະຖາປັດຕະຍະກໍາທີ່ງົດງາມທີ່ສຸດ ແລະ ສະຖານທີ່ສໍາຄັນທີ່ໂດດເດັ່ນທີ່ສຸດຂອງຮ່າໂນ້ຍ. ສະຫຼອງຢູ່ທີ່ບາເທິງດາດຟ້າທີ່ທັນສະໄໝ ຫຼື speakeasy ຂອງຮ່າໂນ້ຍ. ແນ່ນອນວ່າ, ມັນຈະບໍ່ແມ່ນວັນພັກຢູ່ຮ່າໂນ້ຍເລີຍຖ້າບໍ່ໄດ້ຊິມອາຫານຂ້າງທາງທີ່ໜ້າແຊບຊ້ອຍ ແລະ ກາເຟສ້າງສັນຂອງເມືອງຫຼວງแห่งນີ້. 

ເມື່ອໃດ: ວັນທີ 16 ຕຸລາ 2022

ມົກເຈົາ (Mộc Châu) ມີຊື່ສຽງໂດ່ງດັງໃນເລື່ອງສວນດອກທໍ້ ແລະ ສວນຊາ. The Vietnam Trail Marathon ແລ່ນຕາມເສັ້ນທາງທີ່ໄດ້ຮັບການວາງແຜນຢ່າງລະມັດລະວັງຜ່ານໃຈກາງກະສິກໍາຂອງມົກເຈົາ ໃນຊ່ວງທີ່ດອກທໍ້ບານເຕັມທີ. ຄວາມສວຍງາມຂອງດອກໄມ້ທີ່ມີສີສັນຫຼາກຫຼາຍຈະດຶງດູດສາຍຕາແຂ່ງກັບພູເຂົາທີ່ປົກຄຸມດ້ວຍປ່າໄມ້, ແລະ ທົ່ງນາ ແລະ ສວນຊາທີ່ກວ້າງໃຫຍ່ໄພສານ. ມີຫຼາຍໄລຍະທາງໃຫ້ເລືອກໃນ Vietnam Trail Marathon, ລວມທັງອຸລຕຣາມາຣາທອນສໍາລັບນັກແລ່ນທີ່ມັກຄວາມທ້າທາຍ. 

ເມື່ອໃດ: 21 ພຶດສະພາ 2022

ນະຄອນໂຮ່ຈີມິນ, ສູນກາງການຄ້າທີ່ໃຫຍ່ທີ່ສຸດຂອງຫວຽດນາມ, ເປັນບ່ອນຕັ້ງຂອງຕຶກຟ້າຮາມຮອນຂະໜາດໃຫຍ່, ຮົົດຈັກນັບລ້ານຄັນ, ແລະ ງານແຂ່ງຂັນກິລາທີ່ໃຫຍ່ທີ່ສຸດໃນຫວຽດນາມ. ປີຜ່ານມາ, Techcombank Ho Chi Minh City International Marathon ໄດ້ດຶງດູດນັກແລ່ນ 13,000 ຄົນຈາກ 64 ປະເທດທີ່ແຕກຕ່າງກັນ. ເສັ້ນທາງແລ່ນໃນເມືອງຜ່ານຫົກເມືອງທີ່ມີເອກະລັກຂອງນະຄອນ ລວມທັງສະຖານທີ່ສໍາຄັນທີ່ເປັນສັນຍາລັກທີ່ສຸດບາງແຫ່ງ. ເລືອກໄດ້ຈາກມາຣາທອນໄລຍະເຕັມ, ຮາຟມາຣາທອນ, 10 ກິໂລແມັດ, 5 ກິໂລແມັດ ຫຼື KIDSRUN, ໃກ້ສໍາລັບນັກກິລາເຍົາວະຊົນອາຍຸ 6-14 ປີ.

ເມື່ອໃດ: 11 ທັນວາ 2022

Ultra Asia Race ຄວນເຂົ້າຮ່ວມໂດຍນັກແລ່ນທີ່ມີປະສົບການ ແລະ ມັກການຜະຈົນໄພຫຼາຍທີ່ສຸດເທົ່ານັ້ນ. ງານແລ່ນ 3 ວັນນີ້ຖືກແບ່ງອອກເປັນ 4 ຊ່ວງທີ່ແຕກຕ່າງກັນ ເຊິ່ງມີໄລຍະທາງລວມ 160 ກິໂລແມັດ. ເສັ້ນທາງແລ່ນຜ່ານທົ່ງນາທີ່ງົດງາມຂອງ ໄມເຈົາ (Mai Châu), ແລະ ໝູ່ບ້ານຂອງຊົນເຜົ່າມ່ວງ—ຊົນກຸ່ມນ້ອຍທີ່ມີເອກະລັກທາງວັດທະນະທໍາ ແລະ ເປັນອິດສະຫຼະ. ຜູ້ເຂົ້າຮ່ວມແຂ່ງຂັນຕ້ອງພາຍກະເປົາເປ້ທີ່ມີເສບສະບຽງທີ່ຈໍາເປັນທັງໝົດ. 

ເມື່ອໃດ: 06-09 ມີນາ 2022

ປີລະຄັ້ງ ຄວາມທ້າທາຍທີ່ເປັນເອກະລັກຂອງນັກແລ່ນຈະເກີດຂຶ້ນຈາກປ່າດົງດຶບຂອງ ເຂດອານຸລັກທໍາມະຊາດ ປູຫລວງ (Pu Luong Nature Reserve). ຜູ້ເຂົ້າຮ່ວມແຂ່ງຂັນໃນ Vietnam Jungle Marathon ທີ່ໄດ້ຮັບການວາງແຜນເສັ້ນທາງຢ່າງລະມັດລະວັງ ຈະແລ່ນຜ່ານໝູ່ບ້ານນ້ອຍໆ, ຮ່ວມເສັ້ນທາງກັບສັດລ້ຽງ ແລະ ປ່າໄມ້. ພາວະອາກາດເຂດຮ້ອນ ແລະ ທັດສະນີຍະພາບທີ່ຂຽວສົດຊື່ນຈະນໍາພາຄວາມປະທັບໃຈ ແລະ ຄວາມຊົງຈໍາທີ່ດີ. ມີຫຼາຍໄລຍະທາງໃຫ້ເລືອກ, ລວມທັງອຸລຕຣາມາຣາທອນ. ພຽງແຕ່ຢ່າລືມເພີດເພີນກັບວິວທິວທັດ. 

ເມື່ອໃດ: 15 ຕຸລາ 2022