ទីកន្លែងសម្រាកកាយដ៏ល្អបំផុតនៅវៀតណាមសម្រាប់គូស្នេហ៍

មានការនិយាយច្រើនអំពីទេសភាពសមុទ្រដ៏ទាក់ទាញចិត្តនៅភាគខាងជើងប្រទេសវៀតណាម ហើយវាពិតជាសមហេតុផលណាស់។ ឆ្នេរសមុទ្រនៃ Ha Long , Bai Tu Long និង Lan Ha មិនដែលធ្វើឱ្យអ្នកធុញទ្រាន់ឡើយ។ កំពង់ផែជិះទូកមានចម្ងាយត្រឹមតែ២ម៉ោងបើកបរពីព្រលានយន្តហោះក្នុងក្រុងហាណូយ។ នាំដៃគូរបស់អ្នកជិះទូកកម្សាន្តដ៏ទំនើប ហើយចំណាយពេលរាប់ម៉ោងទស្សនាភ្នំថ្មកំបោរអណ្តែតឆ្លងកាត់ ជិះទូកកាយ៉ាក់ជុំវិញភូមិបណ្តែតទឹក និងទស្សនាទស្សនីយភាពដ៏អស្ចារ្យពីលើផ្ទៃទូក។ 

កន្លែងស្នាក់នៅ៖ Emperor Cruises ដំណើរការរៀបចំកាលវិភាគធ្វើដំណើរសម្រាករាត្រីដ៏ប្រណីតនៅក្នុងតំបន់ដែលមានអ្នកទៅទស្សនាតិចតួចនៃឈូងសមុទ្រតុងកឹង ដែលល្អឥតខ្ចោះសម្រាប់គូស្នេហ៍ដែលចង់បានទិដ្ឋភាពផ្ទាល់ខ្លួន។

អ្នកធ្វើដំណើរកម្សាន្តមិនច្រើនទេដែលទៅដល់ខេត្តភាគកណ្តាលនៃ Dak Lak ដែលមានន័យថាគូស្នេហ៍ដែលចូលចិត្តភាពស្ងប់ស្ងាត់នឹងស្វែងរកឃើញវានៅទីនេះ។ Dak Lak ល្បីល្បាញដោយសារទឹកធ្លាក់ដ៏គគ្រើន កសិដ្ឋានកាហ្វេ និងភូមិជនជាតិភាគតិច។ បឹង Lak ដ៏ធំល្វឹងល្វើយគឺល្អឥតខ្ចោះសម្រាប់ការជិះទូកកាយ៉ាក់ ឬជិះទូកលេង ហើយទេសចរណ៍ដំរីប្រកបដោយសីលធម៌ដំបូងបង្អស់របស់វៀតណាមឥឡូវនេះបានបើកដំណើរការនៅក្នុងឧទ្យានជាតិ Yok Don ដែលអ្នកក៏អាចចំណាយពេលមួយថ្ងៃមើលសត្វស្លាប និងដើរព្រៃផងដែរ។ 

កន្លែងស្នាក់នៅ៖ ជ្រើសរើសការស្នាក់នៅរបស់អ្នកនៅ Lak Tented Camp។ តង់នីមួយៗគឺជាកន្លែងក្នុងក្តីស្រមៃរបស់អ្នករុករក មានភាពទំនើបប៉ុន្តែពោរពេញដោយភាពនឹកអាឡោះអាឡោះ ដោយមានរានហាលឈើដែលរៀបចំឡើងដើម្បីទទួលបានខ្យល់បឹងយ៉ាងពេញលេញ។ ញ៉ាំអាហារពេលព្រឹកលើផ្ទៃទឹក បន្ទាប់មកជិះកង់ដើម្បីរុករកភូមិជនជាតិភាគតិចនៅក្បែរនោះ។

ទោះបីជាមានអារម្មណ៍ថានៅឆ្ងាយដាច់ស្រយាលក៏ដោយ កោះនៃ Con Dao គឺស្ថិតនៅចម្ងាយហោះហើរយ៉ាងខ្លីប៉ុណ្ណោះពីទីក្រុងហូជីមិញ។ ព័ទ្ធជុំវិញដោយឆ្នេរសមុទ្រដែលមានខ្យល់បក់រលឹម និងគ្របដណ្តប់ដោយព្រៃតំបន់ក្តៅ ចង្វាក់ជីវិតដ៏សែនមនោរម្យ និងបរិយាកាសទីក្រុងតូចមួយនៃ Con Dao គឺល្អឥតខ្ចោះសម្រាប់ការសម្រាកលំហែកាយដោយគ្មានភាពតានតឹង។ ចូលរួមដំណើរទេសចរណ៍មុជទឹកមើលផ្កាប្រឡាយជុំវិញកោះក្នុងប្រជុំកោះ ជិះកង់ជុំវិញផ្លូវដែលមានស្រមោលដើមឈើ ឬគ្រាន់តែជ្រើសរើសកន្លែងមួយនៅលើឆ្នេរខ្សាច់ ហើយមិនបាច់ធ្វើអ្វីសោះ។

កន្លែងស្នាក់នៅ៖ Six Senses Con Dao គឺជាផ្ទះសំណាក់ផ្កាយប្រាំតែមួយគត់នៅលើកោះនេះ ហើយបឹងហ្គាឡូឆ្នេរខ្សាច់ធ្វើពីឈើទាំងស្រុងដ៏ស្ងប់ស្ងាត់ និងវីឡាស្ប៉ាដែលបែរមុខទៅសមុទ្រ គឺជាជម្រកនៃភាពស្ងប់ស្ងាត់។

តំបន់ វាលទំនាបទន្លេមេគង្គ គឺជាអ្វីដែលមនុស្សភាគច្រើនគិតដល់នៅពេលពួកគេគិតពីប្រទេសវៀតណាម។ ផ្នែកនៃប្រទេសមួយនេះពោរពេញទៅដោយទិដ្ឋភាពដ៏ទាក់ទាញ៖ ផ្សារបណ្តែតទឹកដ៏មមាញឹក ក្មេងៗជិះកង់ ទូកសំប៉ានតូចៗអណ្តែតតាមប្រឡាយទឹកដែលមានដើមឈើបៃតង ស្រែចម្ការដែលត្រូវពន្លឺព្រះអាទិត្យ និងវត្តអារាមដ៏ស្អាតបាត។ តំបន់ជុំវិញ Chau Doc, Cai Be, និង Can Tho ពិតជាមានភាពទាក់ទាញជាពិសេស។ នៅទីនេះ ជីវិតប្រព្រឹត្តទៅយ៉ាងស្ងប់ស្ងាត់ក្រោមស្រមោលដើមឈើហូបផ្លែ ហើយអាហារតែងតែស្រស់ៗ និងមានជីវជាតិ។ ប្រញាប់ភ្ញាក់ពីព្រលឹម ហើយជិះទូកទៅកាន់ផ្សារបណ្តែតទឹកដែលជិតបំផុត ដើម្បីញ៉ាំគុយទាវ hủ tiếu មួយចានដែលមិនអាចបំភ្លេចបាន។

កន្លែងស្នាក់នៅ៖ ព័ទ្ធជុំវិញដោយសួនផ្កានិងស្រះទឹក Mekong Rustic បានបង្កើតបឹងហ្គាឡូធម្មជាតិយ៉ាងស្រស់ស្អាតនៅខាងក្រៅ Cai Be និង Can Tho។ ចូលរួមដំណើរទេសចរណ៍ផ្អែកលើសហគមន៍ដើម្បីស្វែងយល់បន្ថែមអំពីជីវិតក្នុងស្រុកនៅក្នុងតំបន់ ហើយរាប់អានមិត្តភក្តិជាមួយម្ចាស់ផ្ទះរបស់អ្នកតាមរយៈការពិសារតែ និងផ្លែឈើ។ 

កាំរ៉ាញ (Cam Ranh) នៅតែមិនទាន់ជាទីចាប់អារម្មណ៍ខ្លាំងសម្រាប់ភ្ញៀវទេសចរច្រើននៅឡើយទេ ប៉ុន្តែជាមួយនឹងអាកាសយានដ្ឋានដ៏ប្រណីត និងឆ្នេរខ្សាច់ស្អាតបរិសុទ្ធបំផុតមួយចំនួនក្នុងប្រទេសវៀតណាម នោះអ្វីៗប្រាកដជាផ្លាស់ប្តូរ។ នាពេលឥឡូវនេះ វាពិតជាងាយស្រួលក្នុងការធ្វើដំណើរសម្រាកកាយទៅកាន់ផ្នែកដ៏ស្ងប់ស្ងាត់នៃភាគកណ្តាលប្រទេសវៀតណាមនេះ ដែលជាកន្លែងមានឆ្នេរសមុទ្រវែងៗ (វែងមែនទែន!) ទូកនេសាទឃ្លោងឃ្លាត និងដើមដូងរំភើបតាមខ្យល់បក់ជាទិដ្ឋភាពធម្មតា។ រីសតលំដាប់ផ្កាយប្រាំថ្មីៗមួយចំនួនធ្វើឱ្យការសម្រាកវិស្សមកាលនៅកាំរ៉ាញកាន់តែមានភាពទាក់ទាញសម្រាប់គូស្នេហ៍។ កក់វីឡាផ្ទាល់ខ្លួនដែលមានអាងហែលទឹកតូច ញ៉ាំអាហារសមុទ្រស្រស់ៗ និងបណ្តោយឱ្យភាពតានតឹងរបស់អ្នករលាយបាត់ក្រោមពន្លឺព្រះអាទិត្យតំបន់ក្ដៅ។ 

កន្លែងស្នាក់នៅ: ជា រីសតស៊េរីទំនើបបែបវៀតណាមយ៉ាងមានវិសេសវិសាល The Anam ផ្តល់ភាពរីករាយដល់ភ្ញៀវជាមួយនឹងសួនច្បារដ៏ស្រស់ស្អាត និងអាងហែលទឹកដ៏អស្ចារ្យ។ ចំណាយលើ Seaview Villa ដើម្បីមើលឃើញ និងចូលទៅកាន់សមុទ្រដោយផ្ទាល់ ហើយចំណាយពេលវេលាដ៏មានន័យសម្រាកនៅលើរានហាល ចូលស្ប៉ា ឬដើរកម្សាន្តនៅលើឆ្នេរខ្សាច់។

ការវារ ការដើរកាត់ទឹក និងការតោងឡើងតាមល្អាងងងឹតៗ អាចនឹងមិនមែនជាគំនិតនៃវិស្សមកាលរ៉ូមែនទិកសម្រាប់មនុស្សគ្រប់គ្នានោះទេ ប៉ុន្តែសម្រាប់អ្នកដែលចូលចិត្តការផ្សងព្រេង Phong Nha ផ្តល់ជូននូវ ដំណើរកម្សាន្តដ៏អស្ចារ្យមួយក្នុងជីវិត។ ហេតុអ្វីមិនចែករំលែកទិដ្ឋភាពដ៏ភ្ញាក់ផ្អើល និងខណៈពេលដ៏មានន័យនីមួយៗជាមួយមនុស្សជាទីស្រឡាញ់របស់អ្នក? ដំណើរកម្សាន្តច្រើនថ្ងៃនឹងនាំអ្នកឱ្យឆ្លងកាត់រូងក្រោមដី និងហែលទឹកក្នុងអាងថ្មនៅពេលថ្ងៃ ហើយបោះជំរុំនៅជិតទន្លេ និងក្នុងជម្រកល្អាងដ៏ធំសម្បើមនៅពេលយប់។  

កន្លែងស្នាក់នៅ៖ កក់បទពិសោធន៍ Phong Nha របស់អ្នកជាមួយ Oxalis ដែលជាភ្នាក់ងារដ៏មានកេរ្តិ៍ឈ្មោះរៀបចំដំណើរកម្សាន្តទៅកាន់ល្អាងសំខាន់ៗនៅ Phong Nha។ បទពិសោធន៍ល្អាង Tu Lan រយៈពេលបួនថ្ងៃរបស់ពួកគេ គឺជាបទពិសោធន៍ដ៏អស្ចារ្យដែលមិនអាចបំភ្លេចបាន។ 

ប្រសិនបើអាហារគឺជាមូលហេតុចម្បងលេខមួយរបស់អ្នកក្នុងការធ្វើដំណើរ សូមទុកពេលពីរបីថ្ងៃដើម្បីរុករកពិភពម្ហូបអាហារដ៏អស្ចារ្យ និងកាហ្វេតូចៗដ៏ទាក់ទាញនៅក្នុង ទីក្រុងហូជីមិញ។ ភ្លក្សរសជាតិម្ហូបភាគខាងត្បូងដូចជា cơm tấm — ដែលជាអាហារពេលព្រឹកពេញនិយមរបស់អ្នកស្រុក ដើរតាមដានជើងរបស់ Anthony Bourdain ទៅកាន់មីក្តៅៗមួយចានពី Lunch Lady និងរីករាយជាមួយរាត្រីដ៏រំភើបនៅ Anan Saigon ដោយសាកល្បងស្រា wormwood និងអាហារតាមផ្លូវដែលកែច្នៃថ្មីដូចជា banh xeo tacos ជាដើម។

កន្លែងស្នាក់នៅ៖ គូស្នេហ៍នឹងពេញចិត្តស្តូក Hotel des Arts ដែលជាសណ្ឋាគារដ៏ប្រណីតដូចប្រអប់គ្រឿងអលង្ការ មានបន្ទប់ដ៏ស្អាតអស្ចារ្យមើលឃើញចុងឈើនៃខណ្ឌ ៣ រួមទាំងបារលើដំបូលដ៏ស៊ីវិល័យបំផុតមួយនៅក្នុងក្រុង។

នៅប្រទេសវៀតណាម ឈ្មោះ Da Lat ត្រូវបានគេចាត់ទុកជាផ្នែកមួយនៃភាពរ៉ូមែនទិក។ មេឃស្រឡះនាវស្សានរដូវ ព្រៃស្រល់បក់បក និងវិមានស្ថាបត្យកម្ម French art deco ធ្វើឱ្យ Da Lat ក្លាយជាកន្លែងសម្រាកកាយដ៏ពេញនិយមសម្រាប់គូស្នេហ៍។ កសិដ្ឋានផ្កាដ៏ស្រស់ស្អាតរបស់ Da Lat គឺស័ក្តិសមបំផុតសម្រាប់ថតរូប Instagram ដូចគ្នានឹងបឹងដ៏ស្ងប់ស្ងាត់ និងហាងកាហ្វេលាក់ខ្លួនរបស់វាដែរ។ ដើរបណ្ដើរដៃគ្នានៅជុំវិញបឹង Xuan Huong ឈប់ញ៉ាំតែមើលទេសភាព និងពិសាអាហារធ្វើពីផលដំណាំដ៏ស្រស់ៗមកពីកសិដ្ឋាន និងទន្លេនៅតំបន់ខ្ពង់រាប Da Lat។ 

កន្លែងស្នាក់នៅ៖ យកចិត្តមនុស្សជាទីស្រឡាញ់របស់អ្នកនៅ Ana Mandara Dalat ដែលជាផ្ទះវីឡារចនាប័ទ្មបារាំងដែលបានកែប្រែថ្មី ស្ថិតនៅលើកូនភ្នំគ្របដណ្តប់ដោយដើមស្រល់។ ចំណាយពេលវេលាដ៏មានន័យនៅក្នុងអាងហែលទឹកក្រៅផ្ទះដែលមានប្រព័ន្ធកម្ដៅ និងគេងអោបគ្នាយ៉ាងកក់ក្តៅក្នុងវីឡាដែលមានបំពាក់គ្រែមានគ្រប អាងងូតទឹកបែបបុរាណ និងចង្ក្រានកម្តៅ។ 

ចង់បានគំនិតធ្វើដំណើរកម្សាន្តនៅវៀតណាមបន្ថែមទៀតទេ? ចុះឈ្មោះសម្រាប់ព្រឹត្តិបត្រព័ត៌មានរបស់យើង ដើម្បីទទួលបានអត្ថបទល្អៗបំផុតរបស់យើងនៅក្នុងប្រអប់សំបុត្ររបស់អ្នក។