ការរត់ម៉ារ៉ាតុងដ៏ពិសេស ១០ នៅវៀតណាម

អមដោយសណ្ឋាគារ និងរីសតថ្មីៗដ៏ស្រស់ស្អាត ទីក្រុងដាណាំង គឺជាទីតាំងនៃព្រឹត្តិការណ៍រត់ប្រណាំងដ៏ស្អាតបំផុតមួយនៅក្នុងតំបន់អាស៊ីអាគ្នេយ៍ទាំងមូល គឺ Manulife Danang International Marathon។ ការរត់ប្រណាំងប្រចាំឆ្នាំនេះមានចម្ងាយខុសៗគ្នាជាច្រើន ចាប់ពីការរត់ចម្ងាយ ១ គីឡូម៉ែត្រ រហូតដល់ការរត់ម៉ារ៉ាតុងពេញលេញដ៏លំបាក។ សម្រាកនៅលើកៅអីឆ្នេរសមុទ្រដែលមានស្រមោលត្រជាក់ ឬផ្ដល់រង្វាន់ដល់ខ្លួនអ្នកនៅភោជនីយដ្ឋានអាហារសមុទ្រដ៏ច្រើនរាប់មិនអស់របស់ទីក្រុងដាណាំង បន្ទាប់ពីអ្នករត់ឆ្លងកាត់ខ្សែជ័យលាភី។  

កាលបរិច្ឆេទ៖ ថ្ងៃទី២០ ខែមីនា ឆ្នាំ២០២២

ទីក្រុងហាឡុងមានឆ្នេរសមុទ្រដ៏ស្រស់ស្អាតបំផុតមួយនៅក្នុងតំបន់។ ដោយមាន ជួរភ្នំថ្មកំបោរ ដែលត្រូវបានការពារដោយអង្គការ UNESCO ជាផ្ទាំងទស្សនីយភាពខាងក្រោយ អ្នកអាចប្រកួតប្រជែងជាមួយអ្នករត់ប្រណាំងដ៏មានថាមពលផ្សេងទៀតនៅក្នុងព្រឹត្តិការណ៍ Halong Bay International Heritage Marathon។ អាកាសធាតុដ៏ស្រួល និងទិដ្ឋភាពដ៏អស្ចារ្យនៃទីក្រុងហាឡុង នឹងធានាបាននូវការរត់ប្រកបដោយភាពរីករាយ។ ជាមួយនឹងជម្រើសចម្ងាយដ៏សម្បូរបែប ចាប់ពីការរត់កម្សាន្ត ១០ គីឡូម៉ែត្រ រហូតដល់ការរត់ម៉ារ៉ាតុងពេញលេញ អ្នកអាចជ្រើសរើសកម្រិតភាពលំបាករបស់អ្នកបាន។ បន្ទាប់មក ស្វែងយល់ពីតំបន់ទាក់ទាញនានានៃទីក្រុងហាឡុង ឬសម្រាកកាយនៅលើនាវាកម្សាន្តលំដាប់ព្រីមៀមស្នាក់នៅមួយយប់។

កាលបរិច្ឆេទ៖ ថ្ងៃទី១៣ ខែវិច្ឆិកា ឆ្នាំ២០២២

ភ្នំគ្របដណ្តប់ដោយអ័ព្ទនៃទីក្រុងសាប៉ា ផ្ដល់ជូននូវការប្រកួតប្រជែងដ៏ស័ក្តិសមនៅក្នុងព្រឹត្តិការណ៍ Vietnam Mountain Marathon នេះ។ តំបន់ដីដែលមានជម្រាលចោទភាគច្រើន ផ្ដល់ជូននូវទិដ្ឋភាពដ៏អស្ចារ្យ ព្រមទាំងការរត់ដ៏លំបាក។ មានចម្ងាយជាច្រើនចាប់ពី ៥ គីឡូម៉ែត្រ រហូតដល់ស៊ុបពើម៉ារ៉ាតុង ១០០ គីឡូម៉ែត្រដ៏គួរឱ្យភ្ញាក់ផ្អើល។ មិនថាតើអ្នកចូលចិត្តការរត់កម្សាន្តខ្លីៗឆ្លងកាត់វាលស្រែ ឬការប្រកួតប្រជែងកាយសម្បទាពេញមួយជីវិតនោះទេ អ្នកប្រាកដជាបង្កើតអនុស្សាវរីយ៍មិនអាចបំភ្លេចបាននៅទីក្រុងសាប៉ា។

កាលបរិច្ឆេទ៖ ថ្ងៃទី០៩-១១ ខែកញ្ញា ឆ្នាំ២០២១

ក្នុងមួយឆ្នាំម្តង សំឡេងស៊ីផ្លេម៉ូតូត្រូវបានហាមឃាត់នៅលើដងផ្លូវនៃ ទីក្រុងហាណូយ។ ជំនួសមកវិញ អ្នករត់ប្រណាំងរាប់ពាន់នាក់បានបំពេញផ្លូវសម្រាប់ព្រឹត្តិការណ៍ VPBank Hanoi Marathon។ ការរត់នេះឆ្លងកាត់ស្ពាន Long Bien និងបត់បែនតាមទីក្រុង ដោយឆ្លងកាត់ស្ថាបត្យកម្មដ៏ល្អឯក និងទីតាំងសម្គាល់សំខាន់ៗបំផុតមួយចំនួនរបស់ទីក្រុងហាណូយ។ អបអរសាទរនៅបារលើដំបូលអគារទំនើបៗ ឬបារស្ងប់ស្ងាត់របស់ទីក្រុងហាណូយ។ ពិតណាស់ វានឹងមិនមែនជាការកម្សាន្តនៅទីក្រុងហាណូយឡើយ ប្រសិនបើគ្មានការភ្លក្សរសជាតិអាហារតាមផ្លូវដ៏ឆ្ងាញ់ពិសា និងកាហ្វេច្នៃប្រឌិតរបស់រាជធានីមួយនេះ។ 

កាលបរិច្ឆេទ៖ ថ្ងៃទី១៦ ខែតុលា ឆ្នាំ២០២២

Mộc Châu គឺល្បីល្បាញដោយសារចម្ការប៉េស និងចម្ការតែ។ The Vietnam Trail Marathon ដើរតាមផ្លូវដែលបានរៀបចំយ៉ាងយកចិត្តទុកដាក់កាត់តាមបេះដូងកសិកម្មនៃ Mộc Châu ក្នុងអំឡុងពេលកំពូលនៃរដូវផ្កាប៉េសរីកស្កុសស្កាយ។ ផ្កាចម្រុះពណ៌ដ៏ស្រស់ស្អាតនឹងប្រជែងទាក់ទាញខ្សែភ្នែកជាមួយភ្នំក្របដណ្តប់ដោយព្រៃឈើ ព្រមទាំងវាលស្រែ និងចម្ការតែដ៏ល្វឹងល្វើយគ្មានទីបញ្ចប់។ មានចម្ងាយជាច្រើនដែលត្រូវបានផ្តល់ជូននៅក្នុង Vietnam Trail Marathon រួមទាំងការរត់អុលត្រាម៉ារ៉ាតុងសម្រាប់អ្នករត់ប្រណាំងដែលហ៊ានប្រឈមមុខជាងគេ។ 

កាលបរិច្ឆេទ៖ ថ្ងៃទី ២១ ខែឧសភា ឆ្នាំ ២០២២

ទីក្រុងហូជីមិញ ដែលជាមជ្ឈមណ្ឌលពាណិជ្ជកម្មដ៏ធំបំផុតរបស់វៀតណាម គឺជាទីប្រជុំជននៃអគារខ្ពស់ស្កឹមស្កៃ រថយន្តម៉ូតូរាប់លានគ្រឿង និងជាកន្លែងរៀបចំព្រឹត្តិការណ៍កីឡាប្រកួតប្រជែងដ៏ធំបំផុតនៅក្នុងប្រទេសវៀតណាម។ កាលពីឆ្នាំមុន ព្រឹត្តិការណ៍ Techcombank Ho Chi Minh City International Marathon បានទាក់ទាញអ្នករត់ប្រណាំងចំនួន ១៣ ០០០ នាក់មកពី ៦៤ ប្រទេសផ្សេងៗគ្នា។ ផ្លូវរត់ក្នុងក្រុងនេះរត់កាត់ខណ្ឌប្លែកៗចំនួនប្រាំមួយនៃទីក្រុង ព្រមទាំងទីតាំងសម្គាល់ល្បីៗបំផុតមួយចំនួនផងដែរ។ អ្នកអាចជ្រើសរើសចាប់ពីការរត់ម៉ារ៉ាតុងពេញលេញ, ហាហ្វម៉ារ៉ាតុង, ១០គីឡូម៉ែត្រ, ៥គីឡូម៉ែត្រ ឬ KIDSRUN ដែលសម្រាប់កីឡាករវ័យក្មេងអាយុពី ៦ ដល់ ១៤ ឆ្នាំ។

កាលបរិច្ឆេទ៖ ថ្ងៃទី ១១ ខែធ្នូ ឆ្នាំ ២០២២

ព្រឹត្តិការណ៍ Ultra Asia Race គួរតែត្រូវបានចូលរួមដោយអ្នករត់ប្រណាំងដែលមានបទពិសោធន៍ និងចូលចិត្តការផ្សងព្រេងបំផុតប៉ុណ្ណោះ។ ការប្រកួតរត់ប្រណាំងរយៈពេលបីថ្ងៃនេះត្រូវបានបែងចែកជាបួនដំណាក់កាលផ្សេងៗគ្នា ដែលមានចម្ងាយសរុប ១៦០គីឡូម៉ែត្រ។ ផ្លូវរត់ប្រណាំងនេះឆ្លងកាត់ចម្ការស្រែដ៏ស្រស់ស្អាតដូចគំនូរនៅ Mai Châu និងភូមិឋាននៃជនជាតិមឿង (Muong) ដែលជាជនជាតិភាគតិចមានវប្បធម៌ដាច់ដោយឡែក និងឯករាជ្យ។ បេក្ខជនប្រកួតត្រូវស្ពាយកាតាបស្ពាយខ្នងដែលមានស្បៀងអាហារ និងសម្ភារចាំបាច់ទាំងអស់។ 

កាលបរិច្ឆេទ៖ ថ្ងៃទី ០៦-០៩ ខែមីនា ឆ្នាំ ២០២២

ក្នុងមួយឆ្នាំម្តង ការប្រកួតប្រជែងរត់ប្រណាំងដ៏ពិសេសមួយកើតឡើងចេញពីព្រៃក្រាស់នៃ ដែនជម្រកសត្វព្រៃ Pu Luong។ បេក្ខជនប្រកួតនៅក្នុង Vietnam Jungle Marathon ដែលបានរៀបចំផែនទីយ៉ាងសម្រិតសម្រាំង នឹងរត់ឆ្លងកាត់ភូមិតូចៗ ដោយប្រើប្រាស់ផ្លូវរួមគ្នាជាមួយសត្វពាហនៈ និងព្រៃព្រឹក្សា។ អាកាសធាតុត្រជាក់ក្តៅបែបតំបន់ក្ដៅ និងទេសភាពបៃតងស្រស់បំព្រង នាំមកនូវរង្វាន់ និងពេលវេលាដ៏មានន័យដោយឡែក។ មានចម្ងាយជាច្រើនសម្រាប់ជ្រើសរើស រួមទាំងការរត់អុលត្រាម៉ារ៉ាតុងផងដែរ។ គ្រាន់តែជួយកុំភ្លេចទស្សនាទេសភាពជុំវិញផង។ 

កាលបរិច្ឆេទ៖ ថ្ងៃទី ១៥ ខែតុលា ឆ្នាំ ២០២២