ហេតុផល ១០ យ៉ាងដែលនាំឲ្យស្រឡាញ់កោះភូកុក

ឆ្នេរសមុទ្រមានភាពស្រស់ស្អាតស្រាប់ទៅហើយ ប៉ុន្តែសមុទ្រជុំវិញកោះភូកុកមានការទាក់ទាញដោយឡែកមួយទៀត។ ទឹកសមុទ្រនៅទីនេះមានរលកស្ងប់ស្ងាត់ និងថ្លាដូចកញ្ចក់ពណ៌បៃតង។ កោះជាច្រើននៅក្នុងប្រជុំកោះនេះត្រូវបានព័ទ្ធជុំវិញដោយប្រព័ន្ធផ្កាថ្មដ៏ក្រាស់ និងចម្រើនលូតលាស់យ៉ាងល្អ ទាំងប្រភេទផ្កាថ្មទន់ និងផ្កាថ្មរឹង។ ទឹកសមុទ្រដ៏បរិសុទ្ធ និងថ្លាឆ្វង់នេះគឺប្រៀបដូចជាបង្អួចមើលទៅកាន់ពិភពក្រោមទឹកដែលមានពណ៌ស្រស់ឆើតឆាយ ធ្វើឱ្យភូកុកក្លាយជាកន្លែងដ៏ល្អបំផុតមួយនៅក្នុងប្រទេសវៀតណាម ដើម្បីសាកល្បងកីឡាលើទឹក និងសកម្មភាពក្រោមទឹកដូចជាការមុជទឹកមើលផ្កាថ្ម (snorkeling និង diving)។

ច្រើនជាងពាក់កណ្តាលនៃកោះភូកុកត្រូវបានការពារជាតំបន់ជម្រកជីវមណ្ឌល UNESCO។ ដើរភ្នំឆ្លងកាត់ឧទ្យានជាតិភូកុក ដើម្បីជ្រមុជខ្លួនអ្នកនៅក្នុងធម្មជាតិលើគោក ឬជិះទូកដើម្បីទទួលបទពិសោធន៍នៅតំបន់ការពារសមុទ្រ UNESCO។ ប្រសិនបើអ្នកចង់បានបទពិសោធន៍ដែលប្រឈមជាងនេះ អ្នកអាចឡើងទៅកាន់កំពូលភ្នំមួយនៃជួរភ្នំដែលរត់ពីត្បូងទៅជើងដូចជាឆ្អឹងខ្នងឆ្លងកាត់ឧទ្យាន។ ប្រសិនបើអ្នកមិនចង់ប្រើកម្លាំងបាយខ្លាំង អ្នកក៏មិនបាត់បង់ឱកាសដែរ -- ទឹកធ្លាក់ សួយត្រាញ់ (Suoi Tranh Waterfall) អាចទៅដល់បានក្នុងរយៈពេលត្រឹមតែប៉ុន្មាននាទីប៉ុណ្ណោះពីក្លោងទ្វារឧទ្យាន។

កោះភូកុកល្បីល្បាញលើពិភពលោកខាងទឹកត្រី និងអាហារសមុទ្រ។ ទស្សនាផ្សាររាត្រីភូកុកដ៏មមាញឹក ដើម្បីភ្លក្សរសជាតិមុខម្ហូបអាហារសមុទ្រឱ្យបានច្រើនតាមដែលអ្នកអាចធ្វើបាន ដែលមុខម្ហូបជាច្រើនជាមេកានិងរូបមន្តពិសេសប្រចាំតំបន់ មានតែនៅលើកោះភូកុកប៉ុណ្ណោះ។ អ្នកចូលចិត្តអាហារមិនអាចរំលងទឹកត្រីភូកុកបានឡើយ។ ចូលរួមទស្សនារោងចក្រផលិត ដើម្បីស្វែងយល់ពីការផលិតរតនសម្បត្តិដែលគេទទួលស្គាល់ជាអន្តរជាតិនេះ ព្រមទាំងភ្លក្សរសជាតិប្រភេទផ្សេងៗគ្នា ដូចជាអ្នកជំនាញភ្លក្សស្រាស្រង់រសជាតិត្រីកាតាំងសង្កត់។

វាមានភាពងាយស្រួលក្នុងការធ្វើដំណើរទៅកាន់ភូកុកពីក្នុងប្រទេសវៀតណាម និងពីបរទេស។ ជើងហោះហើរផ្ទាល់និងខ្លីៗរាប់សិបជើងចេញជារៀងរាល់ថ្ងៃពីទីក្រុងហូជីមិញ ហាណូយ កឹងថើ (Can Tho) និងដាណាំង (Da Nang)។ ប្រសិនបើអ្នកចង់ធ្វើដំណើរតាមផ្លូវទឹកដើម្បីទស្សនាទេសភាព នោះមានកាណូតចម្លងជារៀងរាល់ថ្ងៃចេញពី រ៉ាចយ៉ា (Rach Gia) និង ហាទៀន (Ha Tien)។

សូមកុំបារម្ភអំពីឯកសារផ្លូវការអី។ អ្នកទេសចរមកពីគ្រប់ប្រទេសទាំងអស់ក្នុងពិភពលោកមានសិទ្ធិទទួលបានការលើកលែងទិដ្ឋាការ (វីសា) រយៈពេល ៣០ ថ្ងៃដោយឥតគិតថ្លៃដើម្បីធ្វើដំណើរទៅកាន់ភូកុក។

ប្រសិនបើអ្នកចង់យល់ដឹងពីរបៀបរស់នៅរបស់ប្រជាជនក្នុងស្រុក ចំណាយពេលខ្លះជ្រមុជខ្លួននៅក្នុងឧស្សាហកម្មនេសាទ និងកសិកម្ម ដែលជាសសរទ្រទ្រង់សេដ្ឋកិច្ចដ៏ពិតប្រាកដរបស់កោះនេះ។ ចូលទស្សនាភូមិអ្នកនេសាទដូចជា Ham Ninh ដែលនៅទីនោះអ្នកនេសាទប្រមូលផលត្រីស្រស់ៗនៅពេលអរុណរះ និងព្រលប់ ហើយទូកចតផ្ទេរកសិផល និងស្បៀងអាហារពីដីគោកនៃប្រទេសវៀតណាមមកលើកំពង់ផែ។ ប្រសិនបើអ្នកចង់សាកល្បងបទពិសោធន៍ជីវិតនៅក្នុងសហគមន៍នេសាទជំនួសឱ្យការគ្រាន់តែសង្កេតមើល អ្នកអាចឡើងជិះទូកស្ទូចមឹកជាមួយមគ្គុទ្ទេសក៍ ហើយមើលថាតើអ្នកអាចស្ទូចអាហារពេលល្ងាចសម្រាប់ខ្លួនឯងបានដែរឬទេ។

ប្រវត្តិសាស្ត្រដ៏វែងឆ្ងាយ និងរស់រវើកនៃកោះភូកុក (Phu Quoc) អាចសិក្សាបានតាមរយៈវិមាននានាដូចជា គុក Coconut Tree ដែលការរក្សាទុកនូវការចងចាំនៃសង្គ្រាមផ្តល់ជាបរិបទដល់បច្ចុប្បន្នកាល។ ប្រសិនបើប្រវត្តិសាស្ត្រមិនមែនជាចំណង់ចំណូលចិត្តរបស់អ្នកទេ នោះអ្នកអាចឈានជើងចូលទៅកាន់ភាពស្ងប់ស្ងាត់ជំនួសវិញ។ ពុះពារកាំជណ្តើរ ២២២ កាំ ទៅកាន់កំពូលវត្ត Ho Quoc ដើម្បីទស្សនាទិដ្ឋភាពទូទៅនៃមហាសមុទ្រ និងព្រៃឈើនៅពេលព្រះអាទិត្យរះ។ បញ្ចប់ថ្ងៃនៅឯជ្រោយ Dinh Cau ដែលមានកាំជណ្តើរត្រឹមតែ ២៩ កាំ ប៉ុណ្ណោះដើម្បីឡើងទៅកាន់អាស្រម ដែលជាកន្លែងទេពធីតាសមុទ្រតាមថែរក្សាអ្នកនេសាទ។

ដូចជាមិនទាន់មានសកម្មភាពគ្រប់គ្រាន់ត្រូវធ្វើនៅលើកោះភូកុក (Phu Quoc) ផ្ទាល់ នៅក្នុងប្រជុំកោះភូកុកនៅមានកោះ ២១ ផ្សេងទៀត ដែលកោះនីមួយៗមានលក្ខណៈពិសេស និងប្រព័ន្ធអេកូឡូស៊ីប្លែកៗរៀងៗខ្លួន។ ដោយសារកោះជាច្រើនក្នុងចំណោមកោះទាំងនោះគ្មានមនុស្សរស់នៅទាល់តែសោះ កោះទាំងនេះគឺជាកន្លែងដ៏ល្អបំផុតមួយចំនួនដើម្បីស្វែងរកធម្មជាតិពិតៗ។ ចាប់អារម្មណ៍មើលអណ្តើកសមុទ្រពណ៌បៃតង ឬអណ្តើកស្រកា ដែលជួនកាលមកពងកូននៅទីនេះ!