ស្ពានដែលព្រួសភ្លើង ផ្ទះបំពង់សង់ណែនតាន់តាប់ វាលស្រែកាំជណ្តើរយ៉ាងល្វឹងល្វើយ -- ទាំងនេះគ្រាន់តែជាទស្សនីយភាពដ៏អស្ចារ្យ និងស័ក្តិសមសម្រាប់ការថតរូបមួយចំនួនដែលអ្នកនឹងបានឃើញនៅក្នុងប្រទេសវៀតណាម។ ធ្វើដំណើរជាមួយកាមេរ៉ាមែនទេ? ខាងក្រោមនេះជាទីតាំងប្រចាំចិត្តរបស់យើងសម្រាប់ចុចថតរូបនៅក្នុងប្រទេសវៀតណាម ព្រមទាំងគន្លឹះពិសេសអំពីកន្លែងដែលត្រូវរកមុំថតរូបល្អបំផុត។
ភាគខាងជើងប្រទេសវៀតណាម
ជំពូក 01 —
ផ្លូវរថភ្លើងហាណូយ
នៅចំកណ្តាលតំបន់ចាស់នៃទីក្រុងហាណូយ អ្នកនឹងប្រទះឃើញផ្លូវរថភ្លើងដ៏ស្ងប់ស្ងាត់មួយខ្សែ ដែលរត់កាត់តាមចន្លោះផ្ទះសម្បែង និងអាផាតមិនយ៉ាងកកកុញ។ ផ្លូវចូលដែលងាយស្រួលបំផុតគឺតាមផ្លូវ Trần Phú។ អ្នកអាចថតរូបរថភ្លើងដែលកំពុងបើកយឺតៗតាមដងផ្លូវ ថតរូបសែលហ្វីនៅលើផ្លូវរថភ្លើង ឬក្រែបកាហ្វេនៅតាមហាងកាហ្វេជាច្រើននៅតាមបណ្តោយផ្លូវរថភ្លើងនេះ។ រថភ្លើងរត់ឆ្លងកាត់នៅម៉ោង ៣ រសៀល និងម៉ោង ៧ យប់ ជារៀងរាល់ថ្ងៃ។
ជំពូក 02 —
ស្ពាន Long Biên
ត្រូវបានសាងសង់ឡើងក្នុងឆ្នាំ ១៩០២ ដោយស្ថាបត្យករជនជាតិប៉ារីស Daydé & Pillé ស្ពាន Long Biên លាតសន្ធឹងកាត់ទទឹងនៃទន្លេក្រហមដ៏លូនកាត់របស់ទីក្រុងហាណូយ។ រថភ្លើង ម៉ូតូ និងអ្នកដើរជើង នៅតែបន្តឆ្លងកាត់ស្ពានដែកប្រវត្តិសាស្ត្រនេះចូលទៅកាន់តំបន់ចាស់ Old Quarter ជារៀងរាល់ថ្ងៃ។ សូមមកទស្សនានៅពេលព្រឹកព្រលឹម ឬមុនពេលថ្ងៃលិចបន្តិច ដើម្បីផ្តិតយករូបថតដ៏អស្ចារ្យនៃស្ពាន និងកោះ Banana Island នៅខាងក្រោម។
គន្លឹះ៖ ហាងកាហ្វេ Sirin Cafe ដែលស្ថិតនៅទល់មុខច្រកចូលស្ពាន ផ្តល់ជូនអ្នកថតរូបនូវទិដ្ឋភាពពីលើអាកាស និងកាហ្វេទឹកដោះគោទឹកកករចនាប័ទ្មហាណូយ (cà phê sữa đá)។
ជំពូក 03 —
ភ្នំ Bài Thơ
ទោះបីជាការដើរឡើងទៅកាន់ទីនោះប្រហែលជាមិនសូវជាអស្ចារ្យប៉ុន្មានក៏ដោយ ប៉ុន្តែទិដ្ឋភាពទូទៅដ៏ធំល្វឹងល្វើយនៃឆ្នេរសមុទ្រ Ha Long ដែលមើលពីកំពូលភ្នំ Bài Thơ គឺជាទិដ្ឋភាពដ៏ទាក់ទាញបំផុតមួយសម្រាប់ថតរូបលើ Instagram នៅប្រទេសវៀតណាម។ ចូរដើរឆ្លងកាត់ព្រៃដែលមានសំណើមដើម្បីទៅដល់កំពូលភ្នំ ហើយត្រូវប្រាកដថាយកទឹកតាមខ្លួនឱ្យបានច្រើន!
ជំពូក 04 —
រូងភ្នំ Múa
មានកាំជណ្ដើរប្រមាណ ៥០០ កាំ រវាងអ្នក និងទីតាំងមើលទេសភាព Tam Cốc ដ៏គួរឱ្យចាប់អារម្មណ៍នៅរូងភ្នំ Múa។ រូបចម្លាក់នាគលាតសន្ធឹង និងវត្តកំពូលច្រើនជាន់ ត្រូវបានសង់ឡើងយ៉ាងខ្ពស់នៅលើកំពូលភ្នំកំបោរ។ នៅពេលបូកផ្សំជាមួយទេសភាពដ៏អស្ចារ្យនៃប្រព័ន្ធទន្លេ និងវាលស្រែដែលលិចទឹកនៅខាងក្រោម អ្នកនឹងទទួលបានរូបថតដ៏ល្អឥតខ្ចោះសម្រាប់ Instagram។ សូមមកដល់ឱ្យបានព្រលឹម ដើម្បីចៀសវាងកម្ដៅថ្ងៃ និងហ្វូងមនុស្ស។
ជំពូក 05 —
វត្ត Bích Động
វត្ត Bích Động មានទេសភាពស្រស់ស្អាតដូចគំនូរ ប៉ុន្តែច្រកចូលដ៏ល្អប្រណីតនោះហើយដែលអ្នកនឹងចងចាំជាងគេបំផុត។ ទ្វារច្រកចូលពណ៌ចម្រុះ និងស្ពានថ្មតូចចង្អៀត ហាក់លាតសន្ធឹងឆ្លងកាត់សមុទ្រផ្កាឈូកដ៏ស្គុះស្គាយ។ នៅពីក្រោយខ្នង ផ្ទាំងទស្សនីយភាពនៃភ្នំក្របដណ្ដប់ដោយព្រៃឈើ បង្កើតបានជាទិដ្ឋភាពមួយដែលដាស់អារម្មណ៍ចង់ធ្វើដំណើរផ្ទុះឡើងក្នុងចិត្តមនុស្សគ្រប់រូប។
គន្លឹះ៖ មកទស្សនាវត្ត Bích Động នៅពេលផ្កាឈូករីកស្គុះស្គាយនាដើមខែកក្កដា ដើម្បីទទួលបានរូបថតកាន់តែមានមន្តស្នេហ៍អស្ចារ្យ។
ជំពូក 06 —
ទឹកជ្រោះ Bản Giốc
ស្ថិតនៅឆ្ងាយពីតំបន់ទេសចរណ៍ទូទៅនាព្រំដែនភាគខាងជើងនៃប្រទេសវៀតណាម អ្នកនឹងបានឃើញទឹកធ្លាក់ Bản Giốc ដ៏គ្រហឹម។ ទឹកធ្លាក់ច្រើនថ្នាក់ដ៏មានថាមពលទាំងនេះ ដែលហ៊ុមព័ទ្ធដោយកំពូលភ្នំលេចត្រដែត បានក្លាយជាផ្ទាំងទស្សនីយភាពដ៏ទាក់ទាញអារម្មណ៍បំផុតមួយរបស់ប្រទេសវៀតណាម។ កុំភ្លេចយកលិខិតឆ្លងដែនរបស់អ្នកមកជាមួយ ព្រោះទឹកធ្លាក់ទាំងនេះស្ថិតនៅលើព្រំដែនរវាងប្រទេសវៀតណាម និងប្រទេសចិន។
ជំពូក 07 —
ច្រកភ្នំ Mã Pí Lèng
ការជិះម៉ូតូគឺជាការទាក់ទាញដ៏សំខាន់មួយនៅក្នុងខេត្តភាគខាងជើងតំបន់ភ្នំ Hà Giang។ បន្ថែមពីលើភាពរំភើបនៃផ្លូវកោងបត់បែន អ្នកនឹងបានទស្សនាទេសភាពដ៏អស្ចារ្យ ជាពិសេសនៅពេលអ្នកទៅដល់ច្រកភ្នំ Mã Pí Lèng។ ទន្លេ Nho Quế ពណ៌បៃតងត្បូងមរកតហូរកាត់ចន្លោះជ្រលងភ្នំដ៏ចោត និងវាលស្រែថ្នាក់ៗ បង្កើតបានជាជ្រលងភ្នំដ៏គួរឱ្យស្ញប់ស្ញែង។
គន្លឹះ៖ សម្រាប់ការថតរូបដ៏ពិសេស សូមមកទស្សនានៅខែតុលា ឬខែវិច្ឆិកា នៅពេលដែលផ្កា buckwheat រីកស្កុសស្កាយពេញលេញ។
វៀតណាមភាគកណ្តាល
ជំពូក 08 —
Trần Phú, ទីក្រុងបុរាណ Hội An
ផ្លូវដើរអមដោយដើមឈើ និងលម្អដោយចង្កៀងគោមនៅហុយអាន (Hội An) នេះ គឺជាទីតាំងថតរូបដ៏ល្អប្រណិតមួយ។ នៅលើផ្លូវ Trần Phú រាល់ធាតុផ្សំជានិមិត្តរូបនៃក្រុង Hội An ត្រូវបានរួមបញ្ចូលយ៉ាងរៀបរយ៖ ផ្កាក្រដាសកំពុងរីកស្ពៃ ចង្កៀងគោមសូត្រ និងផ្ទះល្វែងលាបពណ៌លឿងទុំ រៀបចំបញ្ចូលគ្នាយ៉ាងមានមន្តស្នេហ៍។ ពេលព្រឹកព្រលឹមមុនម៉ោង ៨ ព្រឹក គឺជាពេលវេលាដ៏ល្អបំផុត ប្រសិនបើអ្នកចង់រីករាយនឹងបរិយាកាសលើដងផ្លូវដោយខ្លួនឯង។
ជំពូក 09 —
ស្ពានដៃមាស
ដៃដ៏អស្ចារ្យដូចក្នុងសុបិននៃស្ពានមាស (Golden Bridge) នៅលើភ្នំបាណា (Bà Nà Hills) ផ្ដល់ជូននូវឱកាសថតរូបដ៏ប្លែកអារម្មណ៍បំផុតមួយរបស់ប្រទេសវៀតណាម។ ដៃយក្សដ៏ធំសម្បើមទាំងនេះបានទ្រស្ពានថ្មើរជើងពណ៌មាស ដែលមានទស្សនីយភាពមើលទៅឃើញជួរភ្នំបាណា និងឆ្នេរសមុទ្រដ៏ល្វឹងល្វើយនៅខាងក្រោម។ អមដោយផ្កាស៊ូរីកស្គុះស្គាយ និងពេញដោយមុំថតរូបដ៏ប្លែកៗ ស្ពាននេះគឺជាកន្លែងដែលមិនអាចរំលងបានសម្រាប់អ្នកចូលចិត្តថតរូបបង្ហោះ Instagram។
ជំពូក 10 —
ព្រះរាជផ្នូរ Khải Định
នៅពេលឡើងតាមកាំជណ្ដើរពណ៌សដ៏ចោតនៃ ផ្នូរ Khải Định អ្នកនឹងត្រូវបានទទួលស្វាគមន៍ដោយការរួមបញ្ចូលគ្នារវាងស្ថាបត្យកម្មវៀតណាម និងបារាំង។ អ្នកប្រាកដជាចង់ថតរូបពីរបីសន្លឹកនៅត្រង់ច្រកទ្វារ និងលានមុខមុនពេលចូលទៅក្នុងផ្នូរផ្ទាល់។ នៅខាងក្នុង ព័ត៌មានលម្អិតគឺពិតជាអស្ចារ្យណាស់ ចាប់ពីផ្ទាំងក្បឿងប៉សឺឡែននៅលើជញ្ជាំង រហូតដល់គំនូរនាគប្រាំបួននៅលើពិដាន។
ជំពូក 11 —
ស្ពាននាគ Da Nang
ក្នុងនាមជាសត្វពិសិដ្ឋមួយក្នុងចំណោមសត្វពិសិដ្ឋទាំងបួនរបស់វៀតណាម នាគគឺជា និមិត្តរូបដ៏សំខាន់នៃរឿងព្រេងប្រជាប្រិយវៀតណាមជាយូរយារណាស់មកហើយ។ នាពេលបច្ចុប្បន្ន នៅទីក្រុងដាណាំងដែលកំពុងមានការរីកចម្រើនយ៉ាងឆាប់រហ័ស សត្វក្នុងទេវកថាមួយនេះទទួលបានការច្នៃប្រឌិតបែបទំនើប។ សូមទស្សនាកម្សាន្តនៅពេលអ្នកធ្វើដំណើរឆ្លងកាត់ស្ពានដ៏អស្ចារ្យនេះ ឬទស្សនាពីមាត់ទន្លេ -- ទោះតាមវិធីណាក៏ដោយ អ្នកច្បាស់ជាមិនខកបំណងឡើយ!
គន្លឹះ៖ សូមប្រាកដថាបានទៅទស្សនាស្ពាននេះនៅចុងសប្តាហ៍វេលាម៉ោង ៩ យប់ ដោយសារនាគលោហធាតុនេះនឹងបាញ់ភ្លើង និងបាញ់ទឹកក្នុងការសម្តែងដ៏អស្ចារ្យ។
ជំពូក 12 —
កំពែងក្រុងហ្វេ
blockquote>ជាមួយនឹងទន្លេដ៏គួរឱ្យស្រមៃ ស្រះឈូក និងភ្នំគ្របដណ្ដប់ដោយព្រៃឈើនៅជុំវិញ មិនចម្លែកទេដែលព្រះមហាក្សត្ររជ្ជកាលង្វៀនបានជ្រើសរើសទីក្រុង Huế ធ្វើជាទីតាំងរាជធានីសក្តិភូមិរបស់ពួកអង្គ។ បុរីអធិរាជដែលមានកស្សិណទឹកព័ទ្ធជុំវិញនៅចំកណ្ដាលទីក្រុង គឺពេញទៅដោយជ្រុងថតរូបដ៏ស្រស់ស្អាតជាច្រើន។ ខ្លោងទ្វារកោងបុរាណ និងចម្លាក់ម៉ូសៃយ៉ាងប្រណីត បានរំលេចលើស្ថាបត្យកម្មដ៏អស្ចារ្យដែលនៅរាយប៉ាយនៅក្នុងរាជវាំងនេះ។
វាលខ្សាច់ Mũi Né
វាលខ្សាច់មាត់សមុទ្រ វាលខ្សាច់នៃ Mũi Né គឺជាការផ្លាស់ប្តូរទេសភាពដ៏គួរឱ្យទាក់ទាញនៅក្នុងប្រទេសវៀតណាមតំបន់ត្រូពិក ប៉ុន្តែវាថែមទាំងធ្វើឱ្យរូបថតកាន់តែលេចធ្លោជាងមុនទៅទៀត។ ធ្វើការរុករកយ៉ាងស្ទាយ៍ជាមួយនឹងដំណើរកម្សាន្តជិះរថយន្ត Jeep មានមគ្គុទ្ទេសក៍ ឬជ្រើសរើសការដើរជើងទទេនៅពេលព្រះអាទិត្យរះ។ ទោះតាមវិធីណាក៏ដោយ រូបថតដែលទទួលបានពិតជាស័ក្តិសមបំផុត! Fairy Stream នៅជិតនោះ ដែលជាកន្លែងវាលខ្សាច់ពណ៌ក្រហម និងពណ៌សជួបគ្នា គឺជាចំណុចដ៏ពិសេសមួយទៀតដែលអ្នកថតរូបចូលចិត្ត។
ភាគខាងត្បូងប្រទេសវៀតណាម
ព្រះវិហារ Tân Định
ព្រះវិហារ Tân Định នៅ ទីក្រុងហូជីមិញ នាំមកនូវភាពស្រស់ស្អាតពណ៌ផ្កាឈូកដល់កម្រិតថ្មីស្រឡាងមួយ។ នៅឆ្នាំ ១៨៧៧ Tân Định ធ្លាប់ជាមណ្ឌលកុមារកំព្រា និងសាលារៀនស្នាក់នៅសម្រាប់យុវជនជាង ៣០០ នាក់របស់ទីក្រុង។ បច្ចុប្បន្ន ព្រះវិហារនេះបម្រើសាសនិកជននៅក្នុងទីក្រុងចាប់ពីម៉ោង ៥ ព្រឹក ដល់ម៉ោង ៥:៣០ ល្ងាច ហើយជាទីតាំងដ៏ពេញនិយមសម្រាប់ថតរូបនៅលើ Instagram។
គន្លឹះ៖ ទិដ្ឋភាពល្អបំផុតនៃផ្នែកខាងមុខពណ៌ផ្កាឈូកនេះ អាចមើលឃើញពីម្ខាងទៀតនៃផ្លូវ -- គ្រាន់តែប្រយ័ត្នចរាចរណ៍!
អាងហែលទឹក Shell Pool, JW Marriott Phu Quoc
សម្រាប់អ្នកចូលចិត្តដ្រូនដែលកំពុងសម្រាកលំហែកាយនៅ JW Marriott’s Phú Quốc Emerald Bay Resort and Spa ការថតយក «រូបភាពដ៏ល្អឥតខ្ចោះ» នៃអាងហែលទឹក Shell Pool របស់រីសត គឺជាអ្វីដែលមិនអាចរំលងបានឡើយ។ អាងហែលទឹកដ៏ប្លែកទាក់ទាញនេះ បន្ថែមភាពស្រស់ស្រាយ និងសប្បាយរីករាយដល់រូបភាពសណ្ឋាគារប្រណីតទូទៅដែលគេតែងតែឃើញនៅលើ Instagram។ ចំណែកផ្នែកផ្សេងទៀតនៃសណ្ឋាគារក៏មានភាពស្រស់ស្អាតទាក់ភ្នែកខ្លាំងណាស់ដែរ។
អាផាតមិនលេខ 42, Nguyen Hue
អគារអាផាតមិនចាស់មួយនេះទទួលបានជីវិតថ្មី ដោយក្លាយជាកន្លែងលក់រាយទាន់សម័យបំផុតមួយក្នុងទីក្រុងហូជីមិញ។ ហាងកាហ្វេទាន់សម័យ ភោជនីយដ្ឋានហ្វ៊ុយហ្សិន និងហាងប៊ូទិកតូចៗបានបើកអាជីវកម្មនៅលើគ្រប់ជាន់ ធ្វើឱ្យទីនេះក្លាយជាចំណុចឈប់សម្រាកដ៏ស័ក្តិសមបំផុតសម្រាប់ការថតរូប និងញ៉ាំអាហារសម្រន់។ ទិញតែគុជនៅ ShareTea ដែលនៅទល់មុខ Apartment 42 ហើយឡើងទៅជាន់ទីពីរដើម្បីថតរូបផ្នែកខាងមុខអគារអាផាតមិនដែលឥឡូវនេះមានឈ្មោះល្បីល្បាញនេះ។
តំបន់ដីសណ្តទន្លេមេគង្គ
ជិះទូកអណ្ដែតកាត់តាមចម្ការដូង និងធ្វើដំណើរតាមព្រៃកោងកាង៖ វិធីល្អបំផុតក្នុងការទស្សនាតំបន់ដីសណ្ដទន្លេមេគង្គ គឺពិតជាការជិះទូកសំប៉ាន។ អ្នកអាចចំណាយពេលពេញមួយថ្ងៃយ៉ាងងាយស្រួលដើម្បីស្វែងយល់អំពីប្រព័ន្ធអេកូឡូស៊ីដ៏រស់រវើកនៃតំបន់ដីសណ្ដ និងរុករកប្រឡាយទឹកពណ៌ការ៉ាមែលរបស់វា។ កុំភ្លេចយកមួក nón lá របស់អ្នកទៅជាមួយ សម្រាប់ថតរូបដ៏ជានិមិត្តរូបនោះ។
កន្ត្រកខ្សែកាប Hòn Thơm
ខ្សែរថខ្សែកាបបំបែកកំណត់ត្រារបស់ Sunworld ហោះរំលងទូកនេសាទ កោះដណ្តប់ដោយព្រៃព្រឹក្សា និងផ្ទៃសមុទ្រដ៏ចែងចាំង ក្នុងដំណើរឆ្ពោះទៅកាន់កោះ Hòn Thơm (កោះម្នាស់) នៃកោះ Phú Quốc។ អ្នកនឹងមានពេល ២០ នាទីសម្រាប់ការធ្វើដំណើរតាមជើងនីមួយៗ ដើម្បីទស្សនាទស្សនីយភាពដ៏អស្ចារ្យនៅខាងក្រោម និងថតរូបថតព្រមទាំងវីដេអូឱ្យបានច្រើនតាមដែលអាចធ្វើទៅបាន។ គ្រាន់តែអង្គុយលំហែកាយ និងរីករាយជាមួយការធ្វើដំណើរប៉ុណ្ណោះ។
ចែករំលែករឿងរ៉ាវរបស់អ្នកអំពីប្រទេសវៀតណាមជាមួយយើងនៅលើ Instagram ដោយថែគ @vietnamtourismboard ឬប្រើប្រាស់ហាសថេក #VietnamNOW។
