រឿងរ៉ាវបំផុសគំនិតពីប្រទេសវៀតណាមក្នុងអំឡុងកូវីដ-១៩

នៅពេលដែលគេមើលឃើញច្បាស់ថា ប្រជាជនជាច្រើនមិនមានអាហារគ្រប់គ្រាន់សម្រាប់គ្រួសាររបស់ពួកគេក្នុងអំឡុងពេលរាតត្បាត សហគ្រិនវៀតណាមវ័យក្មេងម្នាក់បានបង្កើត "ទូ ATM អង្ករ" ដោយឥតគិតថ្លៃនៅក្នុងទីក្រុងហូជីមិញ។ មិនយូរប៉ុន្មាន ទូ ATM អង្ករក៏ត្រូវបានបង្កើតឡើងនៅក្នុងទីក្រុងផ្សេងទៀតផងដែរ ដោយចែកជូនស្បៀងអាហារប្រចាំថ្ងៃដ៏សំខាន់នេះដោយមិនគិតថ្លៃ។ នៅខេត្តក្វាងទ្រី (Quảng Trị) ខេត្តប៊ិញធួន (Bình Thuận) និងខេត្តជាច្រើនទៀត ប្រជាជនក្នុងតំបន់បានរៀបចំ 'ផ្សារ' ចុងសប្តាហ៍ ដែលគ្រួសារមានជីវភាពខ្វះខាតអាចមកទិញសម្ភារចាំបាច់ដោយឥតគិតថ្លៃ ហើយម្ចាស់ជំនួយដ៏សប្បុរសបានចែកអាហារនៅតាមកែងផ្លូវ។ ជនជាតិវៀតណាមជាច្រើនបានបរិច្ចាគតាមវិធីផ្សេងៗទៀត។ ជាងដេរនៅក្វាងង៉ាយ (Quảng Ngãi) និងកឹមថើ (Cần Thơ) បានប្រើប្រាស់ម៉ាស៊ីនដេររបស់ពួកគេដើម្បីធ្វើម៉ាស់ចែកជូនដោយឥតគិតថ្លៃ។ អ្នកស្ម័គ្រចិត្តនៅដាណាំង (Đà Nẵng) បានបើកបរពេញមួយយប់ដើម្បីដឹកជញ្ជូនសម្ភារផ្គត់ផ្គង់ទៅកាន់មន្ទីរពេទ្យ។ និស្សិតសកលវិទ្យាល័យបានលះបង់បន្ទប់ស្នាក់នៅរបស់ពួកគេដើម្បីប្រើប្រាស់ជាទីតាំងធ្វើចត្តាឡីស័ក។ រឿងរ៉ាវដូចជាទាំងនេះបានធ្វើឱ្យបេះដូងមនុស្សទូទាំងប្រទេសទទួលបានភាពកក់ក្តៅ។

ទោះបីជាមានស្ថានភាពមិនធម្មតាដែលបង្កឡើងដោយការរាតត្បាតក៏ដោយ ការបដិសណ្ឋារកិច្ចយ៉ាងកក់ក្តៅ និងការយកចិត្តទុកដាក់របស់វៀតណាមចំពោះភ្ញៀវទេសចរបានស្តែងចេញយ៉ាងច្បាស់នៅក្នុងឱកាសជាច្រើន។ នៅពេលដែលអ្នកបើកបរយន្តហោះជនជាតិអង់គ្លេសម្នាក់បានធ្លាក់ខ្លួនឈឺធ្ងន់ធ្ងរ ហើយត្រូវការការប្តូរសួត ជនជាតិវៀតណាមជាង ៦០ នាក់បានស្ម័គ្រចិត្តបរិច្ចាគសួតរបស់ពួកគេសម្រាប់ដំណើរការនេះដើម្បីជួយគាត់ ហើយក្រុមគ្រូពេទ្យឆ្នើមៗរបស់ប្រទេសបានជួបប្រជុំតាមប្រព័ន្ធអនឡាញដើម្បីពិភាក្សាអំពីការជាសះស្បើយរបស់អ្នកជំងឺ។ វាគឺជាជោគជ័យដ៏អស្ចារ្យសម្រាប់ប្រទេសវៀតណាមនៅពេលដែលអ្នកជំងឺលេខ ៩១ បានជាសះស្បើយ និងអាចជិះយន្តហោះត្រឡប់ទៅផ្ទះវិញ។ ក្រុមប្រឹក្សាទេសចរណ៍វៀតណាមក៏បានបង្កើតខ្សែទូរស័ព្ទជំនួយជាភាសាអង់គ្លេសដើម្បីជួយដល់អ្នកធ្វើដំណើរដែលជាប់គាំង ហើយក្រុមហ៊ុនបដិសណ្ឋារកិច្ច Victoria Hotels & Resorts បានផ្តល់បន្ទប់កម្រិតផ្កាយបួនក្នុងតម្លៃ ២០ ដុល្លារក្នុងមួយយប់ដល់អ្នកធ្វើដំណើរដែលត្រូវស្នាក់នៅយូរជាងនេះ។

ដោយសារតែជនជាតិវៀតណាមជាច្រើនបានពាក់ម៉ាស់នៅពេលជិះម៉ូតូរួចជាស្រេចទៅហើយនោះ ប្រទេសនេះមានម៉ាស់យ៉ាងច្រើនសន្ធឹកសន្ធាប់សម្រាប់ប្រើប្រាស់។ ប៉ុន្តែមិនយូរប៉ុន្មាន គេបានដឹងច្បាស់ថា ប្រទេសជិតខាងមួយចំនួនរបស់យើងមិនមានគ្រប់គ្រាន់នោះទេ។ ជាការឆ្លើយតបទៅនឹងវិបត្តិ វៀតណាមបានបញ្ជូនម៉ាស់ និងបរិក្ខារពេទ្យដែលមានតម្លៃ ៤២០.០០០ ដុល្លារអាមេរិក ទៅកាន់ប្រទេសអូស្ត្រាលី ឥណ្ឌា សិង្ហបុរី ថៃ ព្រមទាំងប្រទេសផ្សេងៗទៀត។ ម៉ាស់ដែលផលិតនៅវៀតណាមជាង ៧០០.០០០ ម៉ាស់ត្រូវបានបរិច្ចាគទៅកាន់ប្រទេសអាល្លឺម៉ង់ បារាំង អ៊ីតាលី អេស្ប៉ាញ ចក្រភពអង់គ្លេស និងសហរដ្ឋអាមេរិក។ ក្នុងកម្រិតតូចជាងនេះ កុមារពីរនាក់មកពីហាណូយ បានប្រើប្រាស់ប្រាក់អាំងប៉ាវចូលឆ្នាំចិនដែលសន្សំបានជាច្រើនឆ្នាំ ដើម្បីទិញម៉ាស់ចំនួន ២០.០០០ ម៉ាស់ បញ្ជូនទៅកាន់អ្នកជំងឺនៅចក្រភពអង់គ្លេស។ ឯកអគ្គរាជទូតអង់គ្លេសប្រចាំនៅវៀតណាម លោក Gareth Ward បានសរសេរសំបុត្រថ្លែងអំណរគុណផ្ទាល់ខ្លួនជូនដល់កុមារទាំងពីរចំពោះទឹកចិត្តសប្បុរសរបស់ពួកគេ។

បន្ទាប់ពីធ្វើការរួមគ្នារាប់ខែដើម្បីប្រយុទ្ធប្រឆាំងនឹងវីរុស ប្រទេសវៀតណាមទទួលបានការកោតសរសើរយ៉ាងខ្លាំងពីប្រជាជនក្នុងស្រុក និងជនបរទេសដែលបានវាយតម្លៃខ្ពស់ចំពោះការដោះស្រាយស្ថានការណ៍យ៉ាងមានប្រសិទ្ធភាព។ នៅខែមេសា ឆ្នាំ២០២០ ជនបរទេសម្នាក់បានចាប់ផ្តើមយុទ្ធនាការ ‘Vietnam We Thank You’ ដើម្បីផ្តល់កិត្តិយសដល់គ្រូពេទ្យ គិលានុបដ្ឋាយិកា កងកម្លាំងនគរបាល ទាហាន និងអ្នកស្ម័គ្រចិត្តរបស់វៀតណាម សម្រាប់កិច្ចខិតខំប្រឹងប្រែងរបស់ពួកគេក្នុងការរក្សាសុវត្ថិភាព និងសុខភាពរបស់ប្រជាជន។ ជនបរទេសដែលរស់នៅក្នុងប្រទេសវៀតណាម និងអ្នកធ្វើដំណើរដែលបានទទួលការព្យាបាលក្នុងអំឡុងពេលធ្វើចរ្តាឡីស័កបានបង្ហោះសារថ្លែងអំណរគុណនៅលើបណ្តាញសង្គម ដោយបានលើកទឹកចិត្តដល់ប្រទេសវៀតណាម។ 

ជាលទ្ធផលនៃការរាតត្បាតនៃជំងឺនេះ ស្មារតីសហគមន៍របស់វៀតណាមកាន់តែរឹងមាំជាងពេលណាៗទាំងអស់ ហើយប្រទេសទាំងមូលកំពុងរង់ចាំយ៉ាងអន្ទះសារនូវថ្ងៃដែលនឹងស្វាគមន៍ភ្ញៀវទេសចរមកកម្សាន្តជាថ្មីម្តងទៀត។

ចង់បានគំនិតធ្វើដំណើរនៅវៀតណាមបន្ថែមទៀតទេ? ចុះឈ្មោះទទួលព្រឹត្តិបត្រព័ត៌មានរបស់យើង ដើម្បីទទួលបានអត្ថបទល្អៗបំផុតរបស់យើងនៅក្នុងប្រអប់សាររបស់អ្នក។