ຟານທຽດ (Phan Thiet) ເປັນເມືອງເອກຂອງແຂວງ ບິ່ງທ້ວນ (Binh Thuan), ເຊິ່ງເປັນແຂວງແຄມຝັ່ງທະເລຢູ່ພາກກາງຕອນໃຕ້ຂອງຫວຽດນາມ. ມັນເປັນເມືອງທ່າເຮືອທີ່ມີທ່າເຮືອອັນມີຊີວິດຊີວາ. ເຮືອສີສັນສົດໃສລອຍລ່ອງຢູ່ໃນນ້ຳ ລໍຖ້າພາຊາວປະມົງທ້ອງຖິ່ນອອກສູ່ທະເລ. ໃນຕອນເຊົ້າໆ ອາຫານທະເລທີ່ຫາໄດ້ໃນມື້ນັ້ນຈະຖືກດຶງຂຶ້ນມາຈາກແຫດາງຂະໜາດໃຫຍ່ ແລະ ຂົນສົ່ງໄປຍັງຕະຫຼາດ ເຊິ່ງມີແມ່ຄ້າຜູ້ມີຊີວິດຊີວາຟ້າວຟັງຂາຍອາຫານທະເລດິ້ນໄປມາຫຼາກຫຼາຍຊະນິດຈາກຖັງ ທ່າມກາງສຽງຕໍ່ຮອງລາຄາ ແລະ ສຽງສົນທະນາຢ່າງຄຶກຄື້ນ.
ຟານທຽດ ມີຊື່ສຽງໃນເລື່ອງອາຫານທະເລທຸກປະເພດ ລວມທັງນ້ຳປາ ແຕ່ຖ້າເປັນນ້ຳປາທອງຄຳແຫຼວທີ່ມີກິ່ນຫອມເປັນເອກະລັກນັ້ນ ທ່ານອາດຈະຕ້ອງໄປທີ່ ຟູກວົກ (Phu Quoc). ໃນຖານະທີ່ເປັນທາງຜ່ານໄປຍັງແຫຼ່ງທ່ອງທ່ຽວຊາຍຮາດ ມຸຍເນ (Mui Ne) ນັກທ່ອງທ່ຽວຫຼາຍຄົນຈຶ່ງພຽງແຕ່ຜ່ານ ຟານທຽດ ໄປເລີຍ. ແຕ່ຢ່າລືມແວ່ພັກຢ່າງນ້ອຍໜຶ່ງມື້ ເພື່ອລິ້ມລອງອາຫານທ້ອງຖິ່ນຈານເດັດຫຼາກຫຼາຍຊະນິດທີ່ປຸງແຕ່ງສົດໆ ຢູ່ເມືອງນີ້. ຢູ່ໃກ້ກັບຂົວ ເຈິ່ນຮຶງດ່າວ (Tran Hung Dao) ມີແຖວຮ້ານອາຫານທະເລທີ່ເສີບສັດທະເລທຸກຊະນິດທີ່ທ່ານຈະຈິນຕະນາການໄດ້ໃນທຸກຮູບແບບການປຸງແຕ່ງ. ທ່ານສາມາດເລືອກອາຫານຄ່ຳທີ່ຍັງລອຍຢູ່ໃນຕູ້ປາ ແລະ ່າຍຕາມນ້ຳໜັກ ກ່ອນທີ່ຈະເລືອກວິທີປຸງແຕ່ງ. ລອງຊິມເມນູທີ່ຫຼາກຫຼາຍ – ຕົ້ມອົບໃສ່ຂີງ ແລະ ຫົວສິງໄຄ, ຜັດຊອດໝາກຂາມ ຫຼື ປີ້ງກະທຽມ – ກ່ອນທີ່ຈະເລືອກເມນູໂປດຂອງທ່ານ.
ເຖິງວ່າອາຫານທຸກຈານຈະອະລ່ອຍ ແຕ່ປະກອນນີ້ແມ່ນຄຳແນະນຳກ່ຽວກັບອາຫານທີ່ບໍ່ຄວນພາດຂອງ ບິ່ງທ້ວນ. ຢ່າເລີຍຜ່ານໄປໂດຍບໍ່ໄດ້ລິ້ມລອງອາຫານຈານເດັດເຫຼົ່ານີ້.
ບົດທີ 01 —
Banh Re Phan Thiet / ເຂົ້າໜົມ ເຣ ຟານທຽດ
ແຫຼ່ງຂໍ້ມູນ: ອິນເຕີເນັດ
ບັ໋ນເຣ (Banh re) ຫຼື “ເຂົ້າໜົມ ເຣ” ເປັນເຂົ້າໜົມຫວານ ແລະ ກອບ ທີ່ເຮັດຈາກມັນຕົ້ນ ຫຼື ມັນດ້າງ ປະສົມກັບນ້ຳຕານຊາຍ. ມັນເປັນໜຶ່ງໃນອາຫານຈານເດັດທີ່ມີຊື່ສຽງທີ່ສຸດຂອງ ຟານທຽດ. ເຖິງວ່າ ບັ໋ນເຣ ຈະມີຕົ້ນກຳເນີດມາຈາກ ນິງທ້ວນ (Ninh Thuan) ແລະ ມີຂາຍຢູ່ ນະຄອນໂຮ່ຈີມິນ ໃນປັດຈຸບັນ ແຕ່ກໍເປັນທີ່ຍອມຮັບກັນຢ່າງກວ້າງຂວາງວ່າ ບໍ່ມີບ່ອນໃດໃນປະເທດທີ່ເຮັດ ບັ໋ນເຣ ໄດ້ຄືກັບ ບິ່ງທ້ວນ. ຜູ້ຄົນເດີນທາງມາຈາກທົ່ວປະເທດເພື່ອມາຊື້ຢູ່ ບິ່ງທ້ວນ ແລະ ນຳກັບເມືອເຮືອນເປັນຂອງຝາກ.
ຂອງຫວານນີ້ເບິ່ງຄືວ່າຂ້ອນຂ້າງງ່າຍດາຍ ເພາະມີສ່ວນປະສົມພຽງບໍ່ເທົ່າໃດຢ່າງ ແຕ່ຕ້ອງໃຊ້ທັກສະ ແລະ ປະສົບການຢ່າງຫຼວງຫຼາຍເພື່ອຜະລິດ ບັ໋ນເຣ ທີ່ດີເລີດຢ່າງແທ້ຈິງ. ຫົວມັນທີ່ໃຊ້ຕ້ອງໄດ້ຮັບການເລືອກສັນເປັນແຕ່ລະຫົວ, ຄັດເລືອກຄວາມສົດ, ຄວາມຫວານ ແລະ ອາຍຸຂອງມັນ. ຫຼັງຈາກເລືອກຫົວມັນໄດ້ແລ້ວ ພວກມັນຈະຖືກນຳໄປແປຮູບ ແລະ ຂູດເປັນເສັ້ນ, ປະສົມກັບນ້ຳຕານ ແລ້ວນຳໄປທອດຈົນກວ່າຈະຫອມມັນ ແລະ ກອບນອກ ແຕ່ໜຶ້ງນຸ່ມທາງໃນຢ່າງສົມບູນແບບ.
ເພີດເພີນໄປກັບມັນໃນຖານະຂອງຫວານທານຫຼິ້ນງ່າຍໆ ແລະ ຢ່າລືມຊື້ຕິດມືກັບເຮືອນເປັນຂອງຝາກ. ພວກມັນມີຂາຍ ແລະ ອະລ່ອຍທີ່ຈະຮັບປະທານໄດ້ທຸກເວລາຂອງມື້ ແຕ່ລົດຊາດ ແລະ ຄວາມກອບຈະໂດດເດັ່ນແທ້ໆ ເມື່ອທານຄູ່ກັບຊາຮ້ອນໆ ໜຶ່ງແກ້ວໃນມື້ອາກາດເຢັນໆ.
ແຫຼ່ງຂໍ້ມູນ: ອິນເຕີເນັດ
ບົດທີ 02 —
Cha Ca Phan Thiet / ທອດມັນປາ ຟານທຽດ
ແຫຼ່ງຂໍ້ມູນ: ອິນເຕີເນັດ
ຈ໋າກາ (Cha ca) ຫຼື ທອດມັນປາ ເປັນອາຫານຈານເດັດທີ່ມີຊື່ສຽງຂອງຫວຽດນາມ ເຊິ່ງປຸງແຕ່ງໄດ້ຢ່າງແຊບຊ້ອຍເປັນພິເສດຢູ່ ບິ່ງທ້ວນ. ພວກມັນເຮັດຈາກເນື້ອປາຫຼາກຫຼາຍຊະນິດ, ໝັກກັບເຄື່ອງເທດ ແລ້ວນຳໄປທອດ, ນຶ່ງ ຫຼື ຕົ້ມ. ພວກມັນມີລົດຊາດຫອມມັນຂອງປາ ແຕ່ມີຄວາມຊັບຊ້ອນຂອງກິ່ນຫອມ ແລະ ລົດຊາດທີ່ລະອຽດອ່ອນຢ່າງໜ້າປະຫຼາດໃຈ.
ແທນທີ່ຈະກິນດ່ຽວໆ, ຈ໋າກາ ມັກຈະກິນກັບຊຸບ ແລະ ເມນູເສັ້ນ. ບັ໋ນກັ໋ນຈ໋າກາ (Banh canh cha ca) ຫຼື ເຟີຊຸບທອດມັນປາ ເປັນຕົວເລືອກທີ່ອົດໃຈບໍ່ໄຫວທີ່ສຸດໃນ ຟານທຽດ. ນ້ຳຊຸບເຮັດຈາກກະດູກໝູ, ປາ ແລະ ໝັດ ໂດຍກິນກັບເສັ້ນກ້ວຍຈັບ/ເຟີ ແລະ ເຄື່ອງຄຽງ ເຊັ່ນ ໄຂ່ນົກກະທາ ຄູ່ກັບທອດມັນປາ. ແມ່ຄ້າແຕ່ລະຮ້ານຈະມີເຄື່ອງຄຽງ ແລະ ຕົວເລືອກທອດມັນປາທີ່ຫຼາກຫຼາຍ. ຕື່ມໝາກເພັດສົດຕາມໃຈຊອບ – ຄົນສ່ວນໃຫຍ່ໃນ ບິ່ງທ້ວນ ມັກ ບັ໋ນກັ໋ນຈ໋າກາ ທີ່ມີລົດຊາດຂ້ອນຂ້າງເຜັດ. ຈຸ່ມເຂົາໜົມປັງກອບໆ ບາດໜຶ່ງລົງໃນນ້ຳຊຸບເຂັ້ມຂຸ້ນ ເພື່ອລິ້ມລອງອາຫານສ່ຽງຕອນສາຍຂອງ ບິ່ງທ້ວນ ຢ່າງແທ້ຈິງ.
ບົດທີ 03 —
Banh Can / ເຂົ້າໜົມຄຣົກເຂົ້າເຈົ້າ
ແຫຼ່ງຂໍ້ມູນ: ອິນເຕີເນັດ
ບັ໋ນກັ້ນ (Banh Can) ເປັນອາຫານຈານເດັດຂອງຫວຽດນາມຕອນໃຕ້ ບາງຄັ້ງຖືກອະທິບາຍວ່າເປັນ “ແພນເຄັກເຂົ້າເຈົ້າ.” ຄວາມແຕກຕ່າງລະຫວ່າງ ບັ໋ນກັ້ນ ແລະ ອາຫານອື່ນໆ ທີ່ມີຮູບຮ່າງຄ້າຍຄືກັນ ເຊັ່ນ ບັ໋ນເຊວ (banh xeo) ຫຼື ບັ໋ນແບ່ວ (banh beo) ໄດ້ສະທ້ອນໃຫ້ເຫັນເຖິງຄວາມຫຼາກຫຼາຍຂອງອາຫານຫວຽດນາມ ໂດຍທີ່ແຕ່ລະພູມິພາກໃຊ້ສ່ວນປະສົມດຽວກັນ ແລະ ວິທີການປຸງແຕ່ງທີ່ຄ້າຍຄືກັນ ເພື່ອສ້າງສັນອາຫານທີ່ແຕກຕ່າງກັນຢ່າງສິ້ນເຊີງ.
ແຫຼ່ງຂໍ້ມູນ: ອິນເຕີເນັດ
ບັ໋ນກັ້ນ ເປັນເຂົ້າໜົມຄຣົກແປ້ງເຂົ້າເຈົ້າແຜ່ນນ້ອຍໆ ກອບໆ. ແປ້ງເຂົ້າເຈົ້າປະສົມນ້ຳຈະຖືກເທລົງໃນພິມດິນເຜົາທີ່ຄ້າຍຄືກັບຖາດຄັບເຄັກແປ້ນ. ເມື່ອແປ້ງສຸກ, ເຂົ້າໜົມແຕ່ລະຊິ້ນຈະຖືກໂຣຍດ້ວຍເນື້ອສັດ, ກຸ້ງ, ຫຼື ໝຶກ ລວມທັງຫົວສິງໄຄ/ຫົວຫອມທອດ ເຊິ່ງຈະກາຍເປັນຊັ້ນກອບໆ ຢູ່ເທິງໜ້າ. ຮ້ານອາຫານແຕ່ລະຮ້ານຈະເສີບ ບັ໋ນກັ້ນ ກັບນ້ຳແຈ່ວ ແລະ ເຄື່ອງຄຽງທີ່ແຕກຕ່າງກັນ ຕັ້ງແຕ່ໝາກເຟືອງ ແລະ ໝາກມ່ວງສັບ ໄປຈົນເຖິງປາຕຸ໋ນ ແລະ ບານຊີ້ນ (ລູກຊິ້ນ).
ບົດທີ 04 —
ໄວນ໌ໝາກອະງຸ່ນຢູ່ໂຮງໄວນ໌ RD Winery
ທີ່ມາ: ອິນເຕີເນັດ
ເຖິງແມ່ນວ່າໄວນ໌ອະງຸ່ນມັກຈະຖືກເບິ່ງວ່າເປັນຂອງດີຂຶ້ນຊື່ຂອງ ດາລາດ – ຖ້າມັນຖືກເວົ້າເຖິງໃນຫວຽດນາມ — ແຕ່ ຟານທຽດ ກໍໄດ້ສ້າງຊື່ສຽງໃຫ້ກັບຕົນເອງໃນຖານະເມືອງໄວນ໌ຢ່າງແທ້ຈິງ. ປະສົບການໄວນ໌ຂອງ ບິ່ງທ່ວນ ແມ່ນມີສູນກາງຢູ່ທີ່ RD Winery, ປຣາສາດໄວນ໌ທີ່ໄດ້ຮັບແຮງບັນດານໃຈຈາກ Napa Valley ຂອງ ຄາລິຟໍເນຍ ທີ່ກວ້າງຂວາງກວ່າ 12,000 ເຮັກຕາ.
ປຣາສາດນີ້ຖືກສ້າງຂຶ້ນດ້ວຍສະຖາປັດຕະຍະກຳຢູໂຣບບູຮານ ແລະ ປະກອບມີເດີ່ນກາງຂະໜາດໃຫຍ່, ໂດມ, ແລະ ຫໍຄອຍທີ່ສາມາດເບິ່ງເຫັນທັດສະນີຍະພາບຂອງບໍລິເວນໂດຍຮອບ. ປຣາສາດຖືກແບ່ງອອກເປັນສາມຊັ້ນ. ຊັ້ນດາດຟ້າປະກອບມີພິພິທະພັນ, ເຂດຊັອບປິ້ງ, ສວນກ້ວຍໄມ້, ແລະ ບາຣ໌ ແລະ ຄາເຟ ທີ່ສາມາດຊົມວິວໄດ້. ຊັ້ນລຸ່ມໃຫ້ບໍລິການຊິມໄວນ໌ ແລະ ຕະຫຼາດໄວນ໌. ຊັ້ນໃຕ້ດິນແມ່ນພື້ນທີ່ຈັດສະແດງໄວນ໌ບັນຈຸຂວດຫຼາຍກວ່າ 20,000 ຂວດທີ່ຖືກເກັບຮັກສາໄວ້ຢູ່ທີ່ນີ້.
ທີ່ມາ: ອິນເຕີເນັດ
ວັດຖຸດິບສໍາລັບການຜະລິດໄວນ໌ແມ່ນນໍາເຂົ້າມາຈາກສວນອະງຸ່ນ Napa Valley ແລະ ຈາກນັ້ນກໍນໍາມາປຸງແຕ່ງຢູ່ບ່ອນນີ້ໃນ ຟານທຽດ. ແຂກທີ່ມາຢ້ຽມຢາມ RD Winery ຈະສາມາດຮັບຊົມຂະບວນການຜະລິດໄວນ໌ຢູ່ທີ່ນີ້ ແລະ ຊິມລົດຊາດຂອງໄວນ໌ທີ່ຜະລິດໄດ້. ເຖິງແມ່ນວ່າອະງຸ່ນທີ່ໃຊ້ເຮັດໄວນ໌ຈະຖືກນໍາເຂົ້າມາ, ແຕ່ກໍມີອະງຸ່ນຫຼາຍກວ່າ 13 ສາຍພັນທີ່ແຕກຕ່າງກັນຖືກປູກຢູ່ທີ່ນີ້, ລວມທັງສາຍພັນທີ່ໃຊ້ສໍາລັບ Cabernet Sauvignon, Chenin Blanc, ແລະ Syrah.
ໃນຊ່ວງລະດູເກັບກ່ຽວ, ທ່ານສາມາດຮ່ວມເຮັດວຽກກັບຄົນສວນ ແລະ ເກັບອະງຸ່ນສໍາລັບການເຮັດໄວນ໌, ຮຽນຮູ້ກ່ຽວກັບການຄວບຄຸມສັດຕູພືດ, ການໃສ່ຝຸ່ນ, ແລະ ເງື່ອນໄຂທີ່ປ່ຽນອະງຸ່ນທີ່ດີໃຫ້ກາຍເປັນໄວນ໌ທີ່ຍອດຢ້ຽມ. ໃນທຸກໆລະດູ, ມັນເປັນເລື່ອງທີ່ດີຫຼາຍທີ່ຈະໄດ້ຍ່າງເລາະຊົມສວນໃນ "ເມືອງໄວນ໌" ຂອງຫວຽດນາມ.
