ຫວຽດນາມ ຖືກປະກາດໃຫ້ເປັນຈຸດໝາຍປາຍທາງກ໊ອຟທີ່ດີທີ່ສຸດຂອງອາຊີ ປະຈຳປີ 2026

ດ້ວຍພູມສັນຖານທີ່ຫຼາກຫຼາຍ, ຊາຍຝັ່ງທະເລທີ່ກວ້າງຂວາງ, ແລະ ສະພາບອາກາດຕາມພາກພື້ນທີ່ແຕກຕ່າງກັນ, ຫວຽດນາມຈຶ່ງມີເງື່ອນໄຂທຳມະຊາດທີ່ເໝາະສົມສຳລັບການທ່ອງທ່ຽວກ໊ອຟໄດ້ຕະຫຼອດປີ.

ຈາກພູຜາປ່າດົງ ແລະ ເຂດພູສູງ ຈົນເຖິງເຂດທົ່ງພຽງທີ່ຂຽວອຸ່ມທຸ່ມ ແລະ ບັນດາເຂດຊາຍຝັ່ງທະເລ, ສະໜາມກ໊ອຟທົ່ວປະເທດຫວຽດນາມ ໄດ້ຖືກຜະສົມຜະສານເຂົ້າກັບສະພາບແວດລ້ອມທຳມະຊາດຢ່າງລົງຕົວ. ບັນດາສະຖາປະນິກທີ່ມີຊື່ສຽງລະດັບໂລກໄດ້ອອກແບບສະໜາມເຫຼົ່ານີ້ໃຫ້ສອດຄ້ອງກົມກຽວກັບພູມສັນຖານທີ່ເປັນເອກະລັກ, ເຮັດໃຫ້້ນັກກ໊ອຟໄດ້ຮັບປະສົບການການຫຼິ້ນທີ່ຫຼາກຫຼາຍ, ທ້າທາຍ ແລະ ບໍ່ມີມື້ລືມ. ນອກເໜືອຈາກສະໜາມກ໊ອຟແລ້ວ, ຊັບພະຍາກອນທຳມະຊາດ ແລະ ວັດທະນະທຳອັນອຸດົມສົມບູນຂອງຫວຽດນາມ ຍັງຊ່ວຍໃຫ້ນັກທ່ອງທ່ຽວສາມາດຈັບຄູ່ການຫຼິ້ນກ໊ອຟກັບການພັກຜ່ອນເພື່ອສຸຂະພາບ, ການທ່ຽວຊົມທິວທັດ ແລະ ປະສົບການວັດທະນະທຳທ້ອງຖິ່ນຢ່າງເລິກເຊິ່ງໄດ້ຢ່າງກົມກຽວ.

ການຮັກສາຕຳແໜ່ງ "ຈຸດໝາຍປາຍທາງກ໊ອຟທີ່ດີທີ່ສຸດຂອງອາຊີ" ເປັນເວລາໜຶ່ງທົດສະວັດ ຖືເປັນຫຼັກຖານອັນໜັກແໜ້ນເຖິງສະເໜ່ອັນຍາວນານຂອງຫວຽດນາມ ໃນແຜນທີ່ກ໊ອຟລະດັບພາກພື້ນ ແລະ ລະດັບໂລກ. ຄວາມສຳເລັດນີ້ສ້າງໂອກາດສຳຄັນໃນການຍົກລະດັບການສົ່ງເສີມການຕະຫຼາດລະຫວ່າງປະເທດ, ເສີມສ້າງສາຍສຳພັນກັບຊຸມຊົນກ໊ອຟທົ່ວໂລກ, ແລະ ດຶງດູດນັກທ່ອງທ່ຽວທີ່ໃຊ້ຈ່າຍສູງ ແລະ ພັກເຊົາແບບຍາວນານ.

ເພື່ອໃຫ້ໄດ້ປະໂຫຍດສູງສຸດຈາກກະແສນີ້, ຫວຽດນາມສືບຕໍ່ສຸມໃສ່ການຂະຫຍາຍເຄືອຂ່າຍສະຖານທີ່ກ໊ອຟລະດັບພຣີມຽມ, ປັບປຸງການບໍລິການເສີມ, ແລະ ສ້າງຄວາມຮ່ວມມືທີ່ເຂັ້ມແຂງຂຶ້ນລະຫວ່າງສະໜາມກ໊ອຟ, ທີ່ພັກຫຼູຫຼາ, ບໍລິສັດທົວ, ສາຍການບິນ, ແລະ ຈຸດໝາຍປາຍທາງທ້ອງຖິ່ນ. ໂດຍການພັດທະນາແພັກເກດການທ່ອງທ່ຽວກ໊ອຟແບບມືອາຊີບ ແລະ ຄົບວົງຈອນ ທີ່ເໝາະສົມກັບນັກທ່ອງທ່ຽວຕ່າງຊາດ, ຫວຽດນາມມີເປົ້າໝາຍທີ່ຈະເພີ່ມມູນຄ່າ ແລະ ຄວາມມີຊື່ສຽງຂອງຈຸດໝາຍປາຍທາງໃນເວທີໂລກໃຫ້ສູງຂຶ້ນໄປອີກ.

• ການຍ້ອງຍໍຄວາມເປັນເລີດ: ເປີດຕົວໃນປີ 2014, ລາງວັນ World Golf Awards ມີຈຸດປະສົງເພື່ອສະຫຼອງ ແລະ ມອບລາງວັນໃຫ້ແກ່ຄວາມເປັນເລີດໃນດ້ານການທ່ອງທ່ຽວກ໊ອຟ, ສະໜາມລະດັບໂລກ, ແລະ ຈຸດໝາຍປາຍທາງກ໊ອຟຊັ້ນນຳ. ອົງການດັ່ງກ່າວມີເປົ້າໝາຍທີ່ຈະຍົກລະດັບມາດຕະຖານອຸດສາຫະກຳໂດຍການຮັບຮູ້ຜົນງານຂອງຜູ້ນຳທົ່ວທຸກຂະແໜງການ.
• ຂະບວນການລົງຄະແນນສຽງທົ່ວໂລກ: ຜູ້ຊະນະຈະຖືກກຳນົດໂດຍຜ່ານຂະບວນການລົງຄະແນນສຽງຕະຫຼອດປີ ເຊິ່ງກວມເອົາຜູ້ຊ່ຽວຊານດ້ານອຸດສາຫະກຳກ໊ອຟ, ຕົວແທນສື່ມວນຊົນ, ແລະ ຜູ້ມັກຮັກກ໊ອຟທົ່ວໂລກ. ຜູ້ຖືກສະເໜີຊື່ທີ່ໄດ້ຮັບຄະແນນສຽງສູງສຸດໃນແຕ່ລະປະເພດຈະໄດ້ຮັບລາງວັນດັ່ງກ່າວ.