ទីកន្លែងដែលត្រូវទៅដើម្បីទស្សនាវៀតណាមក្នុងជ្រុងដែលមិនសូវមានគេស្គាល់

ទស្សនីយភាពធម្មជាតិដ៏ស្មុកស្មាញ ការជិះម៉ូតូដ៏អស្ចារ្យ និងការជួបប្រាស្រ័យទាក់ទងជាមួយជនជាតិភាគតិច គឺជាហេតុផលមួយចំនួនដែលធ្វើឲ្យអ្នកធ្វើដំណើរជាច្រើនចូលចិត្តពេលវេលារបស់ពួកគេនៅភាគខាងជើងប្រទេសវៀតណាម។ Cao Bằng គឺជាក្រុងចុងក្រោយនៅចុងខាងជើងបំផុតនៃប្រទេស ហើយជាចំណុចចាប់ផ្តើមឆ្ពោះទៅកាន់ទឹកធ្លាក់ធំជាងគេបង្អស់នៅអាស៊ីអាគ្នេយ៍។ ចំណាយពេលមួយរសៀលដើរទស្សនាក្រុង Cao Bằng ភ្លក់ម្ហូបឆ្ងាញ់ៗក្នុងស្រុក និងដើរលេងតាមមាត់ទន្លេ មុនពេលទៅទស្សនាអច្ឆរិយៈធម្មជាតិ និងប្រវត្តិសាស្ត្រនៃតំបន់នេះ៖ ល្អាងភ្នំ Ngườm Ngao ដ៏អាថ៌កំបាំង ប្រព័ន្ធបឹង Thang Hen ដ៏ទាក់ទាញ កន្លែងលាក់ខ្លួនពីមុនរបស់លោក Hồ Chí Minh និងជាពិសេសគឺទឹកធ្លាក់ Bản Giốc ដ៏ប្រណីតអស្ចារ្យ។ 

ដោយសារស្ថិតនៅឆ្ងាយដាច់ស្រយាលពីផ្លូវធ្លាប់ដើរ អ្នកប្រហែលជាមានការភ្ញាក់ផ្អើលនៅពេលដឹងថាទីនេះមានអត្ថិភាព Đắk Lắk គឺជាតំបន់ដាំដុះកាហ្វេធំជាងគេនៅវៀតណាម។ ប៉ុន្តែក្រៅពីកាហ្វេ Đắk Lắk បានថែរក្សាវប្បធម៌នៃជនជាតិភាគតិចដូចជា M’nong និង Ede ដែលនៅតែរស់នៅក្នុងភូមិដាច់ស្រយាលដូចគ្នានឹងរបៀបរស់នៅរាប់សតវត្សមកហើយ។ ចំណាយពេលមួយថ្ងៃឬពីរថ្ងៃស្វែងរកហាងកាហ្វេប្លែកៗ និងទស្សនាសារមន្ទីរនៅ Buôn Ma Thuột ឬឆ្ពោះទៅកាន់បឹង Lắk ដោយផ្ទាល់សម្រាប់ពីរបីយប់នៅក្នុងជុំរុំតង់តាមមាត់ទឹក។ កម្មវិធីទស្សនាចរណ៍នៅ Đắk Lắk ជាទូទៅគ្របដណ្តប់លើទឹកធ្លាក់ដ៏គួរឱ្យចាប់អារម្មណ៍ និងចម្ការកាហ្វេរបស់តំបន់នេះ ទោះជាយ៉ាងណាក៏ដោយ ប្រសិនបើអ្នកចង់មើលសត្វដំរី កន្លែងដែលល្អបំផុតក្នុងការធ្វើបែបនេះគឺនៅឧទ្យានជាតិ Yok Đôn ជាកន្លែងដែលអ្នកអាចចុះឈ្មោះសម្រាប់កម្មវិធីទេសចរណ៍ដំរីប្រកបដោយសីលធម៌ដំបូងគេរបស់វៀតណាម។

រហូតទាល់តែមានការរកឃើញដោយគួរឲ្យភ្ញាក់ផ្អើលនៃល្អាងភ្នំដ៏ធំជាងគេមួយក្នុងពិភពលោក Phong Nha ស្ទើរតែមិនត្រូវបានរៀបរាប់នៅក្នុងសៀវភៅមគ្គុទ្ទេសក៍ទេសចរណ៍ឡើយ។ ចាប់តាំងពី Sơn Đoòng ទទួលបានការចាប់អារម្មណ៍ខ្លាំងមក Phong Nha បានទទួលអ្នកស្វែងរកការផ្សងព្រេងជាហូរហែ។ ទោះជាយ៉ាងណាក៏ដោយ ជាទូទៅ ទីក្រុង និងតំបន់ជុំវិញនៅតែមានភាពស្ងប់ស្ងាត់ និងធម្មជាតិដើមយ៉ាងស្រស់ស្អាត។ កន្លែងស្នាក់នៅបែបកសិដ្ឋានដ៏មានរបៀបរៀបរយបានសង់បឹងកឡូនៅចន្លោះវាលស្រែ និងចម្ការបន្លែ ហើយផ្ទះស្នាក់លក្ខណៈគ្រួសារផ្តល់ជូននូវខ្ទមឫស្សី និងអាងហែលទឹកដែលមានទិដ្ឋភាពស្រស់ស្អាត។ ក្រៅពីការរុករកល្អាងភ្នំ Phong Nha តាមទូក និងការដើរដោយជើង អ្នកអាចចូលជ្រៅទៅក្នុងធម្មជាតិជាមួយនឹងការជិះកង់ ដំណើរកម្សាន្តតាមទូកកាយ៉ាក់ និងការមើលសត្វព្រៃនៅក្នុងឧទ្យានជាតិ។

រៀបចំផែនការវិស្សមកាលប្រកបដោយចីរភាពនៅវៀតណាមជាមួយនឹង មគ្គុទ្ទេសក៍ទេសចរណ៍បៃតង របស់យើង។

ជាតំបន់មួយក្នុងចំណោមតំបន់ដែលមានភាពរាក់ទាក់ និងសម្បូរបែបបំផុតរបស់ប្រទេសវៀតណាម តំបន់ដីសណ្តទន្លេមេគង្គ នៅតែធ្វើឱ្យអ្នកធ្វើដំណើរមានភាពស្រឡាំងកាំងដោយសារទំហំដ៏ធំ និងការខ្វះខាតសេវាកម្មទេសចរណ៍ដែលរៀបចំស្រាប់។ ប៉ុន្តែម៉្យាងវិញទៀត នេះធ្វើឱ្យទីនេះក្លាយជាគោលដៅដ៏អស្ចារ្យសម្រាប់អ្នកធ្វើដំណើរដែលចូលចិត្តការផ្សងព្រេង ជាពិសេសអ្នកដែលចង់រុករកតាមរយៈការជិះយានយន្តពីរផ្លង់។ ចាប់ផ្តើមដំណើរទស្សនារបស់អ្នកនៅ Cái Bè ដែលជាទីក្រុងតូចមួយតាមដងទន្លេ ពោរពេញទៅដោយកោះតូចៗដ៏ខៀវស្រងាត់។ ចំណាយពេលពីរបីថ្ងៃនៅផ្ទះស្នាក់ក្នុងស្រុក (homestay) ញ៉ាំផ្លែឈើស្រស់ និងត្រីទន្លេ ព្រមទាំងជិះកង់កាត់កសិដ្ឋាន និងចម្ការផ្លែឈើ មុនពេលបន្តដំណើរទៅកាន់ Sa Đéc។ វិឡាដ៏ស្អាតប្រណីតនាសម័យអាណានិគម ផ្សារតាមដងទន្លេដ៏អ៊ូអរ និងស៊ុបមីដ៏ឈ្ងុយឆ្ងាញ់របស់ Sa Đéc ធ្វើឱ្យទីនេះក្លាយជាកន្លែងដ៏ងាយស្រួលក្នុងការចំណាយពេលសម្រាកលំហែកាយមួយថ្ងៃឬពីរថ្ងៃ។ នៅពេលអ្នកត្រៀមខ្លួនរួចរាល់ សូមបន្តដំណើរទៅកាន់ Châu Đốc ជាទីដែលអ្នកនឹងចង់ក្រោកពីព្រលឹមដើម្បីទស្សនាផ្សារអណ្តែតទឹក និងទស្សនាតាមវត្តអារាម និងប្រាសាទដ៏គួរឱ្យចាប់អារម្មណ៍របស់ជនជាតិភាគតិចដែលបានមកតាំងទីលំនៅក្នុងតំបន់នេះ។   

ស្ថិតនៅចម្ងាយជើងហោះហើរដ៏ខ្លី និងមានទេសភាពស្រស់ស្អាតចេញពីភាពអ៊ូអរនៃទីក្រុងហូជីមិញ ប្រជុំកោះ Côn Đảo បង្កើតបានជាប្រជុំកោះចំនួន ១៥ ដ៏ស្រស់ស្អាត ដែលភាគច្រើននៅតែគ្របដណ្តប់ដោយព្រៃឈើខៀវស្រងាត់ និងព័ទ្ធជុំវិញដោយឆ្នេរសមុទ្រដ៏ស្ងប់ស្ងាត់។ Côn Đảo ស្ថិតនៅដាច់ស្រយាលល្មម ដែលធ្លាប់ត្រូវបានប្រើប្រាស់សម្រាប់ឃុំឃាំងអ្នកទោសក្នុងកំឡុងសម័យអាណានិគមបារាំង និងសង្គ្រាមអាមេរិក។ បច្ចុប្បន្ននេះ អ្នកធ្វើដំណើរដែលបានទៅដល់ Côn Đảo នឹងមានអារម្មណ៍ជក់ចិត្តជាមួយនឹងភាពដើមដែលមិនទាន់មានការអភិវឌ្ឍច្រើន និងភាពស្រស់ស្អាតបែបធម្មជាតិ ព្រមទាំងខ្យល់អាកាសបរិសុទ្ធនៃកោះទាំងនេះ ដែលជាជម្រកនៃឧទ្យានជាតិ និងប្រជុំផ្កាថ្ម។ ចំណាយពេលរបស់អ្នកជិះម៉ូតូតាមដងផ្លូវឆ្នេរសមុទ្រ ស្វែងរកហាងកាហ្វេតូចៗដ៏គួរឱ្យស្រឡាញ់ និងញ៉ាំអាហារសមុទ្រក្នុងទីក្រុងតូចមួយនេះ ព្រមទាំងដើរលេងកម្សាន្តតាមឆ្នេរខ្សាច់លាតសន្ធឹងវែងនៃកោះនេះ។ 

តើអ្នកកំពុងស្វែងរកវាលស្រែថ្នាក់ៗដ៏ខៀវស្រងាត់ ការជួបប្រស្រ័យទាក់ទងជាមួយជនជាតិភាគតិច និងផ្ទះស្នាក់ដ៏កក់ក្តៅមែនទេ? Pù Luông បើកទ្វារយ៉ាងអស្ចារ្យទៅកាន់ជីវិតជនបទក្នុងសហគមន៍ជនជាតិភាគតិចនៃប្រទេសវៀតណាម។ ចំណាយពេលត្រឹមតែបួនម៉ោងប៉ុណ្ណោះពីហាណូយ តំបន់ការពារធម្មជាតិនេះពោរពេញទៅដោយវាលស្រែ ជ្រោះ និងទឹកធ្លាក់ ហើយមានភ្ញៀវទេសចរតិចតួចប៉ុណ្ណោះបើប្រៀបធៀបនឹងតំបន់ជិតខាង។ ភូមិកសិកម្ម និងវាលទំនាបជម្រាលបន្តិចៗរបស់ Pù Luông គឺស័ក្តិសមបំផុតសម្រាប់ការដើររុករកដោយផ្ទាល់។ កក់ផ្ទះស្នាក់ (homestay) ដែលមានទិដ្ឋភាពស្អាត ហើយចំណាយពេលរបស់អ្នកដើរកម្សាន្តទៅកាន់អាងហែលទឹកធម្មជាតិនៃទឹកធ្លាក់ Thác Hiêu ស្វែងយល់ពីជនជាតិភាគតិច និងញ៉ាំអាហារដែលដាំដុះនៅក្នុងកសិដ្ឋាន។ 

តើអ្នកចង់បានគំនិតធ្វើដំណើរនៅវៀតណាមបន្ថែមទៀតទេ? ចុះឈ្មោះទទួលព្រឹត្តិបត្រព័ត៌មានរបស់យើង ដើម្បីទទួលបានអត្ថបទល្អៗបំផុតរបស់យើងនៅក្នុងប្រអប់សាររបស់អ្នក