សុខភាព និងសុវត្ថិភាព

ប្រទេសវៀតណាមត្រូវបានគេចាត់ថ្នាក់ជាប្រទេសមួយក្នុងចំណោមប្រទេសដែលមានសុវត្ថិភាពបំផុតក្នុងពិភពលោកសម្រាប់អ្នកទេសចរ ប៉ុន្តែការត្រៀមខ្លួនទុកជាមុនគឺតែងតែមានប្រយោជន៍។ គន្លឹះសុខភាព និងសុវត្ថិភាពទាំងនេះនឹងជួយអ្នកធ្វើដំណើរកម្សាន្តនៅវៀតណាមដោយភាពស្ងប់ចិត្តកាន់តែខ្លាំង។ ខាងក្រោមនេះក៏មានបញ្ជីមន្ទីរពេទ្យរដ្ឋ និងឯកជនសម្រាប់ងាយស្រួលយោងផងដែរ។

គន្លឹះសុខភាពសម្រាប់ការធ្វើដំណើរកម្សាន្តនៅវៀតណាម

សុខភាព និងសុវត្ថិភាពនៅវៀតណាម

មុនពេលអ្នកចេញដំណើរ

មុនពេលធ្វើដំណើរទៅកាន់ប្រទេសវៀតណាម សូមប្រាកដថាបានទិញការធានារ៉ាប់រងសម្រាប់ការធ្វើដំណើររបស់អ្នក។ ពីរខែមុនពេលអ្នកចេញដំណើរ អ្នកក៏គួរតែពិគ្រោះជាមួយវេជ្ជបណ្ឌិត ឬគ្លីនិកធ្វើដំណើរក្នុងតំបន់របស់អ្នក ដើម្បីទទួលបានព័ត៌មានចុងក្រោយបំផុតអំពីហានិភ័យសុខភាពនៅប្រទេសវៀតណាម និងចាក់ថ្នាំបង្ការ ដែលអ្នកអាចត្រូវការ។

ស្ត្រីមានផ្ទៃពោះគួរតែពិគ្រោះជាមួយវេជ្ជបណ្ឌិតរបស់ពួកគេសម្រាប់ព័ត៌មានលម្អិត និងការណែនាំឯកទេស។ ថ្នាំប្រឆាំងគ្រុនចាញ់ និងការព្យាបាលជំងឺរាកជាច្រើន មិនមានសុវត្ថិភាពទាំងស្រុងនោះទេក្នុងអំឡុងពេលមានផ្ទៃពោះ។

ប្រសិនបើអ្នកមានជំងឺ ឬប្រតិកម្មអាលែហ្វស៊ីដែលត្រូវការការយកចិត្តទុកដាក់ជាពិសេស សូមយកលិខិតបញ្ជាក់ពីវេជ្ជបណ្ឌិតតាមខ្លួន ដែលពិពណ៌នាអំពីស្ថានភាពជំងឺ និងការព្យាបាលដែលត្រូវការ។ យើងក៏សូមណែនាំឲ្យអ្នករៀបចំកញ្ចប់ប្រអប់ថ្នាំសង្គ្រោះបឋមដែលមាន៖

ថ្នាំការពារសត្វល្អិតដែលមានធាតុផ្សំ DEET
ថ្នាំប៉ារ៉ាសេតាម៉ូល ឬអ៊ីប៊ុយប្រូហ្វែន សម្រាប់បំបាត់ការឈឺចាប់
ថ្នាំលាបបំបាត់ការរមាស់ ដូចជា hydrocortison
ថ្នាំការពារកម្តៅថ្ងៃ
ថ្នាំ Antihistamine សម្រាប់ព្យាបាលអាលែហ្វស៊ី ដូចជា zertec, benadryl
ថ្នាំ Bacitracin សម្រាប់ថែទាំមុខរបួស, ដូចជា neosporin
ថ្នាំព្យាបាលជំងឺរាក ដូចជា imodium

ថ្នាំមួយចំនួនអាចពិបាកស្វែងរកនៅប្រទេសវៀតណាម៖ សូមប្រាកដថាអ្នកធ្វើដំណើរដោយមានថ្នាំតាមវេជ្ជបញ្ជាដែលអ្នកត្រូវការយ៉ាងគ្រប់គ្រាន់។

មន្ទីរពេទ្យនៅប្រទេសវៀតណាម

ទីក្រុងធំៗដូចជា ហូណូយ, ដាណាំង, និង ទីក្រុងហូជីមិញ មានមន្ទីរពេទ្យរដ្ឋ និងឯកជនជាច្រើនដែលមានបុគ្គលិកនិយាយភាសាអង់គ្លេស។ ខណៈពេលដែលឱសថស្ថានតូចៗមានច្រើននៅស្ទើរតែគ្រប់ទីក្រុងក្នុងប្រទេសវៀតណាម ប៉ុន្តែនៅតំបន់ជនបទ អ្នកអាចនឹងនៅឆ្ងាយពីឱសថស្ថាន ឬមន្ទីរពេទ្យដែលនៅជិតបំផុត។

បញ្ហាសុខភាពទូទៅនៅប្រទេសវៀតណាម

ការបំពុលបរិស្ថាននៅប្រទេសវៀតណាម

សារធាតុបំពុលខ្យល់អាចធ្វើឱ្យរោគសញ្ញាហឺត និងអាលែហ្វស៊ីកាន់តែធ្ងន់ធ្ងរ។ រោគសញ្ញារួមមានការរមាស់បំពង់ក និងហៀរសំបោរ។ សម្រាប់នរណាម្នាក់ដែលមានជំងឺផ្លូវដង្ហើម សូមទិញម៉ាសតូចមួយពាក់នៅពេលធ្វើដំណើរកម្សាន្តជុំវិញតំបន់ក្រុង ឬរៀបចំផែនការចំណាយពេលបន្ថែមនៅតាមជនបទប្រសិនបើអាចធ្វើទៅបាន។

ជំងឺបង្កដោយមូស

ហានិភ័យនៃការឆ្លងជំងឺគ្រុនចាញ់មានកម្រិតខ្ពស់នៅតំបន់ខ្ពង់រាបជនបទ។ សូមពិចារណាប្រើប្រាស់ថ្នាំប្រឆាំងគ្រុនចាញ់ ប្រសិនបើអ្នកមានផែនការធ្វើដំណើរទៅកាន់តំបន់ដាច់ស្រយាលណាមួយក្នុងប្រទេសវៀតណាម។ ជំងឺគ្រុនឈាមបានក្លាយជាបញ្ហាកើនឡើងជាលំដាប់នៅអាស៊ីអាគ្នេយ៍ ហើយកើតឡើងភាគច្រើននៅតំបន់វាលទំនាបទន្លេមេគង្គ រួមទាំងទីក្រុងហូជីមិញផងដែរ។ ដោយសារមិនទាន់មានវ៉ាក់សាំងការពារ វិធានការបង្ការដ៏ល្អបំផុតគឺត្រូវបាញ់ថ្នាំការពារសត្វល្អិតក្នុងអំឡុងពេលព្រះអាទិត្យរះ និងព្រះអាទិត្យលិច។

ក្តីកង្វល់អំពីសុវត្ថិភាពនៅវៀតណាម

បញ្ហាកម្តៅថ្ងៃ

ប្រទេសវៀតណាមមានអាកាសធាតុក្តៅ និងសើមពេញមួយឆ្នាំ។ កុំមើលស្រាលកម្តៅថ្ងៃឱ្យសោះ។ ការរលាកកម្តៅថ្ងៃ អាចកើតឡើងយ៉ាងឆាប់រហ័ស៖ ជម្រើសល្អបំផុតគឺត្រូវលាបថ្នាំការពារកម្តៅថ្ងៃពេញមួយថ្ងៃ។ ត្រូវយកចិត្តទុកដាក់លាបឡើងវិញឱ្យបានញឹកញាប់ ជាពិសេសនៅតំបន់ឆ្នេរសមុទ្រ។ ការខ្វះជាតិទឹកគឺជាកង្វល់មួយទៀត ព្រមទាំងការអស់កម្លាំងដោយសារកម្តៅ ដែលអាចបង្ហាញជារោគសញ្ញាដូចជាឈឺក្បាល និងមួរម៉ៅ។ ពិសាទឹកឱ្យបានច្រើន។ ការស៊ូកកម្តៅគឺជាផលវិបាកធ្ងន់ធ្ងរជាងនេះនៃការត្រូវកម្តៅថ្ងៃខ្លាំងពេក ហើយអាចតម្រូវឱ្យមានការព្យាបាលនៅមន្ទីរពេទ្យ។ ប្រសិនបើអ្នកមានអារម្មណ៍ថាអស់កម្លាំង វិលមុខ ចង់ក្អួត និងមានសីតុណ្ហភាពលើសពី ៤១°C សូមស្វែងរកជំនួយវេជ្ជសាស្ត្រភ្លាមៗ។

ជំងឺពាក់ព័ន្ធនឹងចំណីអាហារ

ជំងឺរាករូសរបស់អ្នកធ្វើដំណើរគឺជាកង្វល់ទូទៅនៅពេលទៅដល់ប្រទេសថ្មី។ ត្រូវពិសាទឹកដប និងចៀសវាងទឹកកកនៅតំបន់ជនបទ។ ដើម្បីចៀសវាងការឆ្លងបាក់តេរី សូមស្វែងរកភោជនីយដ្ឋានដែលមានអតិថិជនច្រើន និងហាងដែលចម្អិនអាហារស្រស់ៗថ្មីៗ។ ជាទូទៅ អាហារតាមផ្លូវនៅប្រទេសវៀតណាមគឺមានសុវត្ថិភាពគួរសម ប៉ុន្តែត្រូវប្រកបដោយការប្រុងប្រយ័ត្នផ្ទាល់ខ្លួនជានិច្ចនៅពេលជ្រើសរើសអ្នកលក់។ ប្រសិនបើអ្នកមានអាការចុកពោះ ឬរាករូស សូមពិសាអំបិលខ្សោះជាតិទឹក និងរក្សាជាតិទឹកក្នុងរាងកាយ។ ប្រសិនបើបញ្ហានៅតែបន្តកើតមាន សូមស្វែងរកការព្យាបាលពីវេជ្ជបណ្ឌិត។

ការខាំពីសត្វល្អិត

បញ្ហាទាំងនេះជួនកាលកើតមាននៅពេលស្នាក់នៅផ្ទះសំណាក់ និងបន្ទប់គេងរួមគ្នា ហើយជួនកាលថែមទាំងនៅតាមសណ្ឋាគារទៀតផង។ ស្វែងរកជំនួយនៅគ្លីនិកដែលជិតបំផុត ប្រសិនបើអ្នករងការខាំពីចៃឆ្កែ, ចៃគ្រែ, និង/ឬ ចៃ។ ត្រូវប្រុងប្រយ័ត្នចំពោះជំងឺឆ្កែឆ្កួត នៅពេលប៉ះពាល់ជាមួយសត្វ មិនថាសត្វព្រៃ ឬសត្វស្រុកនោះទេ។ ចៀសវាងសត្វស្វានៅកោះ Cat Ba នៅពេលទស្សនាតំបន់ Ha Long Bay។ នៅពេលដើរកម្សាន្តក្នុងព្រៃ ត្រូវប្រុងប្រយ័ត្នចំពោះដង្កែ ឈ្លើង និងពស់ពិសដែលលាក់ខ្លួនក្នុងព្រៃ។ ស្វែងរកជំនួយវេជ្ជសាស្ត្រភ្លាមៗប្រសិនបើត្រូវសត្វខាំ។

គន្លឹះសុវត្ថិភាពសម្រាប់ការធ្វើដំណើរកម្សាន្តនៅវៀតណាម

តើប្រទេសវៀតណាមមានសុវត្ថិភាពសម្រាប់អ្នកទេសចរដែរឬទេ

អំពើចោរកម្មតូចតាច

ប្រទេសវៀតណាមជាប្រទេសដែលមានសុវត្ថិភាពគួរសម ប៉ុន្តែអំពើចោរកម្មបន្តិចបន្តួចនៅតែជាកង្វល់មួយ ជាពិសេសនៅក្នុងទីក្រុងធំៗ។ ចៀសវាងការលើកកាមេរ៉ា និងទូរស័ព្ទដៃនៅតាមដងផ្លូវ និងកែងផ្លូវដែលមានចរាចរណ៍ខ្វាត់ខ្វែង៖ ការឆក់ប្លន់ភាគច្រើនគឺ ការជិះម៉ូតូឆក់។ នៅពេលថតរូបនៅលើចិញ្ចើមផ្លូវ សូមកាន់កាមេរ៉ារបស់អ្នកឲ្យជិតរាងកាយ និងឆ្ងាយពីចរាចរណ៍ផ្លូវគោក។

ជាពិសេសស្ត្រីគួរតែត្រូវបានរំលឹកឱ្យ កាន់កាបូបយួរ និងកាបូបប្រាក់របស់ខ្លួនឲ្យបានជាប់ នៅពេលដើរនៅក្នុងទីក្រុងហូជីមិញ។ នៅពេលជិះម៉ូតូ សូមដាក់កាបូបរបស់អ្នកនៅក្នុងឃ្លុបក្រោមកែបម៉ូតូ ឬថ្ពក់វានៅខាងមុខម៉ូតូ។ កាបូបដែលស្ពាយលើស្មា ឬដាក់ក្នុងកន្ត្រកម៉ូតូ អាចត្រូវចោរឆក់បានយ៉ាងងាយស្រួល។

នៅពេលស្នាក់នៅក្នុងសណ្ឋាគារ និងផ្ទះសំណាក់ សូមដាក់វត្ថុមានតម្លៃរបស់អ្នក នៅក្នុងទូសុវត្ថិភាព ឬចាក់សោវានៅក្នុងកាបូបរបស់អ្នក មុនពេលចាកចេញពីបន្ទប់។ ជាទូទៅ វាជាគំនិតល្អមួយក្នុងការប្រុងប្រយ័ត្នចំពោះវត្ថុមានតម្លៃរបស់អ្នក តាមដានមើលកាបូបរបស់អ្នកឲ្យបានដិតដល់ និងមិនត្រូវបង្ហាញសាច់ប្រាក់ច្រើន ឬឧបករណ៍បច្ចេកវិទ្យាថ្លៃៗនៅតាមតំបន់ជនបទឡើយ។

ជាអកុសល ប្រសិនបើអ្នកក្លាយជាជនរងគ្រោះនៃអំពើចោរកម្ម អាជ្ញាធរមានសមត្ថកិច្ចមិនអាចជួយធ្វើអ្វីបានច្រើនឡើយក្នុងការស្វែងរកទ្រព្យសម្បត្តិដែលត្រូវគេលួចត្រឡប់មកវិញ។

ការបោកប្រាស់តាមតាក់ស៊ី

ការបោកប្រាស់តាមតាក់ស៊ីនៅប្រទេសវៀតណាមមានទម្រង់ដូចជា ការកែច្នៃកុងទ័រ, ការទារប្រាក់ហួសហេតុ, ការភាន់ច្រឡំរូបិយវត្ថុ និងការកំណត់ថ្លៃថេរ។ ក្រុមហ៊ុនគួរឱ្យទុកចិត្តពីរដែលអ្នកអាចពឹងផ្អែកបានគឺ Mai Linh និង Vinasun។ ក្រុមហ៊ុនតាក់ស៊ីទាំងពីរនេះមានយានយន្តថ្មីៗ និងកុងទ័របិទជិតត្រឹមត្រូវ ព្រមទាំងមានសេវាកម្មទទួលភ្ញៀវដែលដំណើរការនៅក្នុងទីក្រុង និងទីប្រជុំជនភាគច្រើនក្នុងប្រទេសវៀតណាម។ អ្នកអាចស្វែងរកពួកគេភ្លាមៗនៅពេលអ្នកចុះចតនៅអាកាសយានដ្ឋានអន្តរជាតិនានាក្នុងប្រទេសវៀតណាម។

ការបោកប្រាស់ទេសចរនៅវៀតណាម

ការបោកប្រាស់ទេសចរ

ប្រទេសវៀតណាមកំពុងកែលម្អសេវាកម្មទេសចរណ៍របស់ខ្លួនជាបន្តបន្ទាប់ ប៉ុន្តែនៅតែមានភ្នាក់ងារ និងប្រតិបត្តិករឯករាជ្យមួយចំនួនដែលបំពានច្បាប់។ នៅពេលកក់កប៉ាល់កម្សាន្តនៅឆកសមុទ្រ Ha Long សូមជ្រើសរើសក្រុមហ៊ុនដែលមានកេរ្តិ៍ឈ្មោះជានិច្ច។ សម្រាប់ការដើរកម្សាន្តជុំវិញប្រទេសវៀតណាម សូមកក់ជាមួយភ្នាក់ងារទេសចរណ៍ដែលបានផ្ទៀងផ្ទាត់ត្រឹមត្រូវ ជាជាងកន្លែងតូចតាចដែលគ្មានកេរ្តិ៍ឈ្មោះ ដើម្បីចៀសវាងការរងការបោកប្រាស់។

សម្រាប់អ្នកធ្វើដំណើរជាស្ត្រី

ជាទូទៅ ប្រទេសវៀតណាមជាប្រទេសដែលមានសុវត្ថិភាពសម្រាប់ការធ្វើដំណើរ ហើយអ្នកធ្វើដំណើរជាស្ត្រីនឹងទទួលបានការស្វាគមន៍យ៉ាងកក់ក្តៅ។ ជនជាតិវៀតណាមនៅតែមានគំនិតអភិរក្សនិយមច្រើន ដូច្នេះវាជាការប្រសើរក្នុងការគោរពវប្បធម៌ក្នុងស្រុកដោយមិនត្រូវស្លៀកពាក់លេចលើលេចក្រោមពេកឡើយ។ ស្ត្រីដែលធ្វើដំណើរម្នាក់ឯង អាចនឹងមានគេចូលមកសួរនាំថាហេតុអ្វីបានជាធ្វើដំណើរតែម្នាក់ឯង។ ការសាកសួរទាំងនោះជាទូទៅមិនមានបំណងអាក្រក់ទេ ហើយកើតចេញពីការចង់ដឹងចង់ឃើញប៉ុណ្ណោះ។ បទល្មើសប្រឆាំងនឹងស្ត្រីគឺកម្រមានណាស់នៅប្រទេសវៀតណាម។ ទោះជាយ៉ាងណាក៏ដោយ វាជាការល្អដែលមិនត្រូវនៅម្នាក់ឯងនៅលើផ្លូវនៅពេលយប់ជ្រៅ ហើយត្រូវជិះតាក់ស៊ីប្រសិនបើអ្នកត្រឡប់មកវិញយប់ជ្រៅ។