រំភើបញាប់ញ័រជាមួយស្ពានបាតកញ្ចក់វែងជាងគេបំផុតនៅលើពិភពលោក

_{ប្រភព៖ អ៊ីនធឺណិត}

យើងទាំងអស់គ្នាធ្លាប់បានឃើញវីដេអូវ៉ៃរ៉លកំប្លែងៗជាច្រើនអំពីមនុស្សដែលដើរទាំងញ័រជើងឆ្លងកាត់ស្ពានបាតកញ្ចក់ ដោយអ្នកខ្លះដើរបានជោគជ័យជាងអ្នកផ្សេងទៀត។ ឥឡូវនេះ ភ្ញៀវទេសចរនៅវៀតណាមក៏អាចជួបបទពិសោធន៍ដើរឆ្លងកាត់ជ្រោះជ្រៅដោយផ្ទាល់ខ្លួនឯងផងដែរ នៅលើស្ពានដែលទទួលបានពានរង្វាន់នៅភាគខាងជើង។ 

នៅថ្ងៃទី ២៨ ខែមេសា ឆ្នាំ ២០២២ មិនយូរប៉ុន្មានបន្ទាប់ពីការបើកដំណើរការឡើងវិញសម្រាប់ទេសចរណ៍អន្តរជាតិ ផ្លូវដើរបាតកញ្ចក់ចុងក្រោយបង្អស់របស់វៀតណាមបានបើកស្វាគមន៍អ្នកទស្សនា។ ស្ពាននេះមានឈ្មោះថា Bach Long ដែលមានន័យថា «នាគស» មានទីតាំងស្ថិតនៅក្នុងស្រុកម៉ុកចូវ (Moc Chau) ខេត្តសឺនឡា (Son La) ដែលជាខេត្តព្រំប្រទល់ជាប់ប្រទេសឡាវ ប្រមាណ ២០០ គីឡូម៉ែត្រភាគពាយ័ព្យនៃរាជធានីហាណូយ។ 

ស្ពានតម្លាភាពនេះគឺជាស្ពានកញ្ចក់ទីបីរបស់ប្រទេស បន្ទាប់ពីស្ពាន Rong May (នៅឡៃចូវ) និងស្ពានស្នេហា (នៅម៉ុកចូវផងដែរ)។ ដូច្នេះ តើមានអ្វីពិសេសចំពោះស្ពានទីបីនេះ? វាទើបតែត្រូវបានគេប្រសិទ្ធនាមថាជាស្ពានវែងជាងគេបំផុតនៅលើពិភពលោក ដោយបានយកឈ្នះស្ពានរបស់ប្រទេសចិននៅក្នុងក្រុង Qingyuan ខេត្ត Guangdong ដែលធ្លាប់កាន់កាប់ពានរង្វាន់កំណត់ត្រាពិភពលោកហ្គីនណេស។

_{ប្រភព៖ អ៊ីនធឺណិត}

ស្ពាននេះមានកម្ពស់ ១៥០ ម៉ែត្រ (៤៩២ ហ្វ៊ីត) ពីលើព្រៃឈើនៅខាងក្រោម ដោយមានទទឹង ២,៥ ម៉ែត្រ និងប្រវែង ៦៣៣ ម៉ែត្រ (២.០៧៣ ហ្វ៊ីត)។ ផ្នែកខ្លះនៃផ្លូវដើរគឺនៅតោងតាមចម្រាក់ភ្នំ ខណៈ ២៩០ ម៉ែត្រលាតសន្ធឹងឆ្លងកាត់ជ្រោះរវាងកំពូលភ្នំពីរ។ ធ្វើឡើងពីកញ្ចក់ចាត់ថ្នាក់ពិសេស (tempered glass) ដែលនាំចូលពីប្រទេសបារាំង វាអាចទ្រទម្ងន់មនុស្សបាន ៤៥០ នាក់ក្នុងពេលតែមួយ។

_{ប្រភព៖ អ៊ីនធឺណិត}

លោក Glen Pollard តំណាងមកពីកំណត់ត្រាពិភពលោកហ្គីនណេស ដែលបានចូលរួមក្នុងពិធីបើកសម្ពោធជាផ្លូវការនៅថ្ងៃទី ២៨ ខែឧសភា ជឿជាក់ថា ស្នាដៃវិស្វកម្ម «ដ៏អស្ចារ្យ» នេះពិតជានឹងទាក់ទាញភ្ញៀវទេសចរ។ លោកបានកោតសរសើរ "វិស្វកម្មដែលតម្រូវឱ្យសាងសង់វានៅចំហៀងច្រាំងថ្មចោទ ប៉ុន្តែនៅតែរក្សាបាននូវលក្ខណៈធម្មជាតិទាំងអស់ ភាពបៃតង និងថ្ម" ដោយហៅវាថាជា «គម្រោងដ៏អស្ចារ្យមួយ»។  

អ្នកស្រឡាញ់ធម្មជាតិនឹងពេញចិត្តស្តូកចំពោះទស្សនីយភាពភ្នែកបក្សី ដោយមានអារម្មណ៍ថាលិចលង់ទាំងស្រុងនៅក្នុងធម្មជាតិជុំវិញ។ ការហានក្លាហានដើរលើផ្លូវដើរតម្លាភាពនេះនឹងនាំអ្នកទៅកាន់រូងភ្នំ Muong Moc ដែលគេហៅផងដែរថារូងភ្នំ Chim Than។ លើសពីនេះ ក៏មានកន្លែងកម្សាន្តកុមារ ភោជនីយដ្ឋាន និងរីសតនៅជិតនោះ ដើម្បីធ្វើឱ្យដំណើរកម្សាន្តកាន់តែមានតម្លៃបន្ថែមទៀត។ រហូតមកដល់ពេលនេះ កន្លែងទាក់ទាញនេះពិតជាទទួលបានជោគជ័យយ៉ាងខ្លាំង។ នៅថ្ងៃដំបូងនៃការបើកទ្វារ ស្ពាននេះបានស្វាគមន៍មនុស្សច្រើនជាង ៤.០០០ នាក់។ រយៈពេលបីថ្ងៃដំបូង មានភ្ញៀវទេសចរណ៍សរុប ១៥.០០០ នាក់។

សូមជឿជាក់ ស្ពាននេះត្រូវបានសាងសង់ឡើងតាមបទដ្ឋានសុវត្ថិភាពអន្តរជាតិយ៉ាងម៉ត់ចត់។ បាតស្ពានត្រូវបានធ្វើឡើងពីកញ្ចក់ពង្រឹងកម្លាំងបីជាន់ ដែលជាន់នីមួយៗមានកម្រាស់ ៤០ មីលីម៉ែត្រ។ វាក៏មានប្រព័ន្ធយ៉ាងម៉ឺងម៉ាត់ដើម្បីធានាថាស្ពានមិនដែលកកកុញមនុស្សហួសហេតុឡើយ។ អាជ្ញាធរមានទំនុកចិត្តលើសុវត្ថិភាពនៃកញ្ចក់នេះ។ ដើម្បីតេស្តកម្លាំងរបស់វា រថយន្ត SUV មួយគ្រឿងត្រូវបានបើកបរឆ្លងកាត់វាមុនពេលបើកឱ្យភ្ញៀវចូលទស្សនា។ អ្វីៗទាំងអស់នៅតែល្អឥតខ្ចោះ។ 

ដូច្នេះ ដោយសារឥឡូវនេះអ្នកដឹងថាវាមានសុវត្ថិភាពហើយ តើអ្នកមានក្លាហានសាកល្បងដើរឆ្លងកាត់វាដែរឬទេ? 

សម្រាប់អ្នកដែលដឹងថាទំនុកចិត្ត (និងជើង) របស់ពួកគេអាចនឹងទន់ញ័រ អ្នកនឹងរីករាយដែលបានដឹងថា អ្នកមិនចាំបាច់ដើរឆ្លងកាត់ផ្លូវដើរតម្លាភាពដោយលែងដៃនោះទេ។ មានបន្ទះពណ៌សតូចមួយនៅសងខាង (ក្របកញ្ចក់) ដែលអ្នកអាចដើររំកិលដោយប្រុងប្រយ័ត្នតាមបណ្តោយនោះ ខណៈពេលដែលអ្នកតោងបង្កាន់ដៃ។ ចំណាយពេលរបស់អ្នកដើម្បីស្រូបយកទេសភាពដ៏ខៀវស្រងាត់…

_{ប្រភព៖ អ៊ីនធឺណិត}

ត្រូវទទួលស្គាល់ការពិត − ស្ពានបាតកញ្ចក់មិនមែនសម្រាប់មនុស្សគ្រប់គ្នានោះទេ។ ប្រសិនបើអ្នកខ្លាចកម្ពស់ មានហេតុផលផ្សេងទៀតជាច្រើនក្នុងការទៅកម្សាន្តនៅស្រុកម៉ុកចូវ (Moc Chau) ដែលល្បីល្បាញដោយសារអាកាសធាតុត្រជាក់ស្រួល។ 

ទីនេះជាជម្រកនៃព្រៃស្រល់ ចំការតែទំហំ ៣.០០០ ហិកតា ព្រមទាំងភូមិស្ថានដ៏គួរឱ្យទាក់ទាញនៃជនជាតិភាគតិចលើភ្នំ។ អ្នកអាចដើរភ្នំទៅកាន់ចំណុចមើលទេសភាពដូចជា Pha Luong និង Ta Xua។ ទស្សនាទឹកធ្លាក់ Dai Yem ដ៏ស្រស់ស្អាត។ ឬថតរូបនៅពេលដែលវាលផ្កាកំពុងរីកស្កុសស្កាយ។ រវាងខែកុម្ភៈ និងខែមីនា គឺជាពេលវេលាសម្រាប់ដើមផ្លាំ ដើមប៉េស និងផ្កាអ័រគីដេរីកស្កុសស្កាយ។ 

នៅក្នុងខែមីនាផងដែរ ម៉ុកចូវប្រារព្ធពិធីបុណ្យ Het Cha ប្រចាំឆ្នាំនៅក្នុងភូមិ Ang ឃុំ Dong Sang។ ការប្រារព្ធពិធីដ៏រស់រវើក និងមានពណ៌ចម្រុះនៃសហគមន៍ជនជាតិភាគតិចថៃនេះ គឺជាអ្វីដែលពិសេសគួរឱ្យទស្សនា។

_{ប្រភព៖ Facebook - Moc Chau Island}