មូលហេតុ ៧ យ៉ាងដែលធ្វើឱ្យហាណូយជាគោលដៅទេសចរណ៍សម្រាកកម្សាន្តនៅទីក្រុងឈានមុខគេលើពិភពលោកសម្រាប់ឆ្នាំ ២០២២

ទស្សនាតំបន់ទេសចរណ៍សំខាន់ៗ។ ក្នុងចំណោមនោះមាន រាជធានីបុរាណថាំងឡុង (Imperial Citadel of Thang Long) ដែលជាទីតាំងសំខាន់បំផុតមួយរបស់ប្រទេស និងជាបេតិកភណ្ឌពិភពលោក UNESCO។ ដើរទស្សនានៅតាមទីធ្លា និងរំលឹកការចងចាំទៅកាន់សម័យកាលរាជវង្ស និងប្រវត្តិសាស្ត្រជាច្រើនដែលស្ដែងចេញតាមរយៈអគារ សំណង់ និងស្លាកស្នាមប្រវត្តិសាស្ត្រ។ សំណង់ទាំងនោះរួមមាន ផ្លូវ 18 Hoang Dieu ដែលជាការកាយស្រាវជ្រាវបុរាណវត្ថុដ៏ធំបំផុតរបស់វៀតណាម ផ្លូវកាត់ក្រោមដី និងផ្ទះ D67 និងព្រះរាជវាំង Kinh Thien ដែលមានកាំជណ្ដើររូបនាគថ្ម។ កុំភ្លេចទៅទស្សនាប្រាសាទការពារទាំងបួនជុំវិញរាជធានីបុរាណ ដែលកាលពីមុនធ្លាប់ជាទ្វារចូលទៅកាន់ទីក្រុងបុរាណ។

សម្រាប់ទីកន្លែងដ៏ស្ងប់ស្ងាត់ កុំរំលង វិហារអក្សរសាស្ត្រ (The Temple of Literature) ដែលជាកន្លែងសាកលវិទ្យាល័យជាតិដំបូងគេត្រូវបានបើកដំណើរការក្នុងឆ្នាំ ១០៧៦។ បច្ចុប្បន្ន ទីនេះជាលំហដ៏ស្ងប់ស្ងាត់ដែលបង្កើតឡើងដោយទីធ្លាចំនួនប្រាំ ជាមួយនឹងផ្លូវដើរ ព្រះពន្លា និងសួនច្បារដ៏ស្រស់ស្រាយសម្រាប់ដើរទស្សនា។ ដោយសារទីតាំងនេះផ្តល់កិត្តិយសដល់អ្នកប្រាជ្ញ និងទស្សនវិទូដ៏អស្ចារ្យកាលពីអតីតកាល សិស្សនិស្សិតវៀតណាមនៅតែមកទីនេះដើម្បីបួងសួងសុំសេចក្តីសុខនិងសំណាងល្អក្នុងការសិក្សារបស់ពួកគេ។

បន្ទាប់មកគឺ រោងមហោស្រពហាណូយ (Ha Noi Opera House) ដែលជាទីតាំងមិនអាចរំលងបានសម្រាប់អ្នកស្នេហាស្ថាបត្យកម្ម។ សង់ឡើងនៅដើមសតវត្សរ៍ទី ២០ ក្នុងសម័យអាណានិគមបារាំង អគារដ៏គួរឱ្យចាប់អារម្មណ៍នេះត្រូវបានកសាងឡើងតាមរចនាប័ទ្មចម្រុះ Neo-classical, Baroque និង Gothic ហើយមានពណ៌លឿងដ៏ល្បីល្បាញដែលជានិមិត្តរូបនៃយុគសម័យនោះក្នុងប្រវត្តិសាស្ត្រវៀតណាម។ កាលពីមុនធ្លាប់ជាមជ្ឈមណ្ឌលវប្បធម៌សម្រាប់វណ្ណៈអភិជន វាក៏បានក្លាយជាសាក្សីនៃព្រឹត្តិការណ៍នយោបាយសំខាន់ៗជាច្រើនក្នុងអំឡុងពេលជាច្រើនឆ្នាំកន្លងមក។ ការសម្តែងសិល្បៈនិងល្ខោននៅតែត្រូវបានរៀបចំឡើងនៅទីនេះ ដូច្នេះសូមព្យាយាមទស្សនាការសម្តែងនៅទីនេះ។

មានសារមន្ទីរជាច្រើននៅក្នុងរាជធានី ដែលឆ្លើយតបទៅនឹងចំណាប់អារម្មណ៍ផ្សេងៗគ្នា។ សារមន្ទីរសំខាន់បំផុតមួយក្នុងចំណោមនោះគឺ វិមានតម្កល់សពហូជីមិញ (Ho Chi Minh Mausoleum) ដែលជាសំណង់ថ្មម៉ាបដ៏ស្កឹមស្កៃ ជាទីដែលរាងកាយរក្សាទុករបស់លោកប្រធាន ហូ ជីមិញ («លោកពូហូ») ត្រូវបានតម្កល់ក្នុងមឈូសកញ្ចក់។ ដើម្បីទទួលបានអារម្មណ៍នៃពិធីការ សូមរៀបចំពេលវេលាទស្សនារបស់អ្នកដើម្បីមើលពិធីផ្លាស់ប្តូរវេនកងឆ្មាំ។

ដោយផ្អែកលើប្រវត្តិសាស្ត្ររបស់វៀតណាម វាមិនមែនជារឿងចម្លែកទេដែលមានសារមន្ទីរឯកទេសជាច្រើនដែលអ្នកចូលចិត្តវិស័យយោធានឹងចូលចិត្ត។ សារមន្ទីរទាំងនោះរួមមាន សារមន្ទីរប្រវត្តិសាស្ត្រជាតិវៀតណាម (Vietnam National Museum of History), សារមន្ទីរកងទ័ពអាកាសវៀតណាម (Vietnamese Air Force Museum), និង សារមន្ទីរប្រវត្តិសាស្ត្រយោធាវៀតណាម (Vietnam Military History Museum)។ 

ដើម្បីស្វែងយល់បន្ថែមអំពីតួនាទីរបស់ស្ត្រី សូមអញ្ជើញទៅកាន់ សារមន្ទីរស្ត្រីវៀតណាម (Vietnamese Women’s Museum)។ ម្យ៉ាងវិញទៀត សារមន្ទីរជនជាតិវិទ្យាវៀតណាម (Vietnam Museum of Ethnology) ផ្តល់នូវការយល់ដឹងយ៉ាងស៊ីជម្រៅអំពីក្រុមជនជាតិទាំង ៥៤ របស់ប្រទេសនេះ។

_{ប្រភព៖ Facebook: Bao tang Phu nu Vietnam - Vietnamese Women's Museum.}

សម្រាប់ភាពស្ងប់ស្ងាត់និងភាពរមនា អ្នកស្រុកនៅទីនេះតែងតែទៅកាន់បឹងណាមួយនៃក្រុងហាណូយ។ តាមបណ្ដោយផ្លូវដើរក្រោមជ្រលប់ម្លប់ឈើជុំវិញបឹងទាំងនោះ អ្នកនឹងបានឃើញមនុស្សម្នាកំពុងហាត់តៃជី លេងអុក លេងឧបករណ៍តន្ត្រី ឬហាត់ក្បាច់រាំរបស់ពួកគេ។ 

បឹង Hoan Kiem គឺជាបឹងដែលមានប្រវត្តិសាស្ត្រយូរលង់ជាងគេ។ នៅចំកណ្តាល អ្នកនឹងឃើញប្រាសាទអណ្តើក (Turtle Tower) និងប្រាសាទ Ngoc Son ដែលតភ្ជាប់មកកាន់ដីគោកដោយស្ពាន The Huc ពណ៌ក្រហមឆើត។ រថយន្តក្រុងទេសចរណ៍ពីរជាន់សម្រាប់ទស្សនាក្រុងក៏ឈប់នៅជិតតំបន់ទេសចរណ៍ដ៏ពេញនិយមមួយនេះផងដែរ។

បឹងធំជាងគេនៅហាណូយគឺ West Lake – ជាជម្រើសដ៏អស្ចារ្យសម្រាប់ការដើរហាត់ប្រាណ ឬជិះកង់ចម្ងាយឆ្ងាយ ទទួលទានអាហារពេលព្រឹកយ៉ាងរំភើយ ឬក្រែបភេសជ្ជៈទស្សនាថ្ងៃលិចជាមួយនឹងទិដ្ឋភាពដ៏ស្រស់ស្អាត។ 

ជាមួយនឹងការបូកបញ្ចូលគ្នារវាងម្ហូបអន្តរជាតិ និងម្ហូបវៀតណាម អាហារតាមចិញ្ចើមផ្លូវ និងអាហារដ្ឋានកម្រិតខ្ពស់ ហាណូយគឺជាឋានសួគ៌សម្រាប់អ្នកស្នេហាវិស័យម្ហូបអាហារ។ ម្ហូបប្រពៃណីរបស់ហាណូយរួមមាន pho bo (ស៊ុបភើសាច់គោ), banh mi (នំប៉័ងប្រកប), bun cha (នំបញ្ចុកសាច់ជ្រូកអាំង), bun ca (ស៊ុបនំបញ្ចុកសាច់ត្រី) និង banh cuon (នំចំហុយម្សៅអង្ករ) - គ្រាន់តែជាឧទាហរណ៍មួយចំនួនប៉ុណ្ណោះ។ អ្នកអាចភ្លក់រសជាតិអាហារទាំងនេះនៅទូទាំងទីក្រុង ហើយមានទស្សនកិច្ចទេសចរណ៍ផ្នែកម្ហូបអាហារ និងថ្នាក់បង្រៀនធ្វើអាហារជាច្រើនសម្រាប់កក់ផងដែរ។

ភូមិសិប្បកម្មប្រពៃណីជាច្រើនមានទីតាំងនៅជុំវិញក្រុងហាណូយ។ ចូលរួមទស្សនាសេរ៉ាមិចនៅភូមិ Bat Trang និងធ្វើវត្ថុអនុស្សាវរីយ៍ដោយខ្លួនឯង។ មាន Center of Vietnam Quintessential Handicraft នៅក្នុងភូមិកុលាលភាជន៍ Bat Trang ដែលជាទីតាំងដាក់បង្ហាញផលិតផលកុលាលភាជន៍ និងសេរ៉ាមិចប្រពៃណីដ៏ល្បីល្បាញ។ ដើម្បីស្វែងយល់បន្ថែមអំពីមួកកោណ (nón lá) ដែលជានិមិត្តរូបនៃប្រទេសវៀតណាម សូមទៅកាន់ភូមិ Chuong ដែលជាទីតាំងផលិតមួកទាំងនេះអស់ជាច្រើនសតវត្សមកហើយ។