ຄູ່ມືນັກທ່ອງທ່ຽວສຳລັບວັນພັກບຸນເຕັດ

ບຸນເຕັດ (Tết) ເປັນການເລີ່ມຕົ້ນວັນທຳອິດຂອງປີໃໝ່ປະຈຳເຜົ່າ (ຕາມຈັນທະຄະຕິ), ແລະ ເປັນການເລີ່ມຕົ້ນຂອງລະດູໃບໄມ້ປົ່ງທາງພາກເໜືອຂອງຫວຽດນາມ. ວັນພັກນີ້ມີປະຫວັດຄວາມເປັນມາຕັ້ງແຕ່ຍຸກທຳອິດຂອງການຕັ້ງຖິ່ນຖານຂອງຄົນຫວຽດນາມຢູ່ເຂດແອ່ງແນມແມ່ຮ່ອງ (Red River Delta), ໃນເວລານັ້ນ ບຸນເຕັດ ໝາຍເຖິງຮອບວຽນໃໝ່ຂອງການປູກເຂົ້າ. ໃນປັດຈຸບັນ, ຄວາມໝາຍຂອງວັນພັກນີ້ເລິກເຊິ່ງກວ່າຮາກເຫງົ້າທາງການກະເສດຫຼາຍ: ວັດທະນະທຳຫວຽດນາມເນັ້ນໜັກເຖິງຄວາມສຳຄັນຂອງການເລີ່ມຕົ້ນໃໝ່ທີ່ເປັນສິລິມົງຄຸນ, ໂດຍມີຄອບຄົວ ແລະ ຄົນທີ່ຮັກແພງຢູ່ອ້ອມຂ້າງ.

ທົ່ວປະເທດຫວຽດນາມ, ການກຽມພ້ອມສຳລັບບຸນເຕັດແມ່ນເລີ່ມຕົ້ນລ່ວງໜ້າຫຼາຍອາທິດ, ຍ້ອນວ່າການອະນາໄມ, ການຕົກແຕ່ງ ແລະ ການປະດັບປະດາເຮືອນຊານແມ່ນສ່ວນໜຶ່ງທີ່ສຳຄັນຂອງປະເພນີວັນພັກ. ຄົນຫວຽດນາມຈະໄປຊື້ເຄື່ອງອຸປະກອນໃໝ່, ຕັດຜົມ, ແຕ່ງອາຫານພິເສດ, ຊື້ດອກໄມ້, ແລະ ແມ່ນແຕ່ລ້າງລົດຈັກຂອງເຂົາເຈົ້າ. ແຕ່ລະເຮືອນ ແລະ ສຳນັກງານຈະຕົກແຕ່ງດ້ວຍປ້າຍ ‘Chúc Mừng Năm Mới’, ແລະ ຕົ້ນສົ້ມກວັດ ຫຼື ດອກທໍ້ຈະຖືກຕັ້ງໄວ້ໃນບ່ອນທີ່ສົມກຽດ. ຕົ້ນສົ້ມກວັດຍິ່ງໃຫຍ່ເທົ່າໃດ, ຄອບຄວກໍຈະຍິ່ງໄດ້ຮັບຄວາມຈະເລີນຮຸ່ງເຮືອງ ແລະ ສຸຂະພາບແຂງແຮງຫຼາຍຂຶ້ນໃນປີໃໝ່. ຖະໜົນຫົນທາງເຕັມໄປດ້ວຍສີສັນຍ້ອນຕົ້ນໄມ້ເຫຼົ່ານີ້ຖືກຂົນສົ່ງຢູ່ທາງຫຼັງລົດຈັກ. ເພື່ອຕ້ອນຮັບວັນພັກຍາວ, ບັນຍາກາດແຫ່ງການສະເລີມສະຫຼອງໄດ້ຄອບຄຸມໄປທົ່ວປະເທດ. 

ໃນຊ່ວງບໍ່ກີ່ວັນກ່ອນບຸນເຕັດ, ຕະຫຼາດ ແລະ ຖະໜົນຫົນທາງຈະແອອັດໄປດ້ວຍຜູ້ຄົນທີ່ມາຊື້ຂອງ. ແມ່ເຮືອນທີ່ຍຸ່ງຢູ່ກັບການກຽມງານຈະເລືອກຊື້ແຜ່ນຟອຍ, ມາໄລເຈ້ຍ, ແລະ ເຄື່ອງຕົກແຕ່ງສີແດງ ແລະ ສີທອງທີ່ເປັນສິລິມົງຄຸນໃນຮູບຮ່າງຂອງປາ, ຫຼຽນຄຳ, ໝາກໂພກ, ແລະ ດອກໄມ້. ປີຈັນທະຄະຕິແຕ່ລະປີແມ່ນຖືກຕາງໜ້າດ້ວຍສັດປະຈຳ 12 ລາສີ, ຕາມທີ່ເຫັນໃນສະຕິກເກີເຫຼື້ອມ ຫຼື ເທິງໂຄມໄຟເຈ້ຍ. ຄົນທ້ອງຖິ່ນຈະນຳເອົາຊອງ red bao lì xì - ຊອງອັງເປົາສີແດງ - ເປັນຕັ່ງໆກັບເຮືອນ ເຊິ່ງຕາມປະເພນີແມ່ນຜູ້ໃຫຍ່ຈະມອບໃຫ້ຄົນຮຸ່ນຫຼັງໃນຄອບຄົວ, ຫຼື ຜູ້ຈັດການມອບໃຫ້ພະນັກງານ. ມັນເປັນສັນຍານຂອງຄວາມເຕີບໃຫຍ່ສຳລັບໄວໜຸ່ມຫວຽດນາມທີ່ຈະເຊົາຮັບ lì xì ແລະ ເລີ່ມເປັນຜູ້ໃຫ້ແທນ. 

ອາຫານ -- ໂດຍສະເພາະແມ່ນເຂົ້າຕົ້ມບຸນເຕັດ bánh chưng -- ແມ່ນອົງປະກອບທີ່ສຳຄັນຂອງການສະເລີມສະຫຼອງ. ຕາມນິທານພື້ນເມືອງ, ເຈົ້າຊີວິດ Hùng ອົງສຸດທ້າຍບໍ່ສາມາດຕັດສິນໃຈໄດ້ວ່າລູກຊາຍຄົນໃດຈະໄດ້ຂຶ້ນຄອງຣາຊະບັນລັງ, ສະນັ້ນພຣະອົງຈຶ່ງຈັດການແຂ່ງຂັນເພື່ອຊອກຫາລູກຊາຍຄົນທີ່ສາມາດນຳເອົາອາຫານທີ່ດີທີ່ສຸດໃນໂລກມາຖວາຍ. ມີລູກຊາຍຄົນໜຶ່ງທີ່ໂດດເດັ່ນ, ເພາະເພິ່ນໄດ້ນຳສະເໜີເຂົ້າຕົ້ມສອງຊະນິດນີ້ທີ່ເປັນຕົວແທນຂອງຟ້າ ແລະ ດິນ. ອາຫານທີ່ງ່າຍດາຍເຫຼົ່ານີ້ໄດ້ເຮັດໃຫ້ເຈົ້າຊີວິດປະທັບໃຈ ເຊິ່ງຕໍ່ມາໄດ້ມອບຣາຊະບັນລັງໃຫ້ເພິ່ນ. ທົ່ວປະເທດຫວຽດນາມ, ຄອບຄົວຕ່າງໆຈະນັ່ງຮ່ວມຮັບປະທານອາຫານງານລ້ຽງຕະຫຼອດມື້, ແລະ ເອົາຜົນໄມ້ເຊື່ອມໃນກ່ອງງາມໆມາຕ້ອນຮັບແຂກ.

ອາຫານຄ່ຳປະເພນີບຸນເຕັດແມ່ນໂອກາດທີ່ສຳຄັນສຳລັບສະມາຊິກໃນຄອບຄົວທີ່ຈະໄດ້ມາໂຮມກັນ ແລະ ເວົ້າເຖິງປີທີ່ຜ່ານມາ. ແຕ່ລະພາກມີອາຫານສະເພາະຂອງຕົນເອງ. ຢູ່ພາກເໜືອ, nem (ຍໍ້ຈອດ), bánh chưng (ເຂົ້າຕົ້ມ) ແລະ ໄກ່ຕົ້ມທັງໂຕ ແມ່ນອາຫານທີ່ຂາດບໍ່ໄດ້. ສ່ວນອາຫານບຸນເຕັດຂອງພາກໃຕ້ແມ່ນປະກອບດ້ວຍໝູຕົ້ມເຄັມຫວານ, ຕຳຊຸບມະຣະ ແລະ ລາບໄກ່, ພ້ອມກັບອາຫານອື່ນໆ. ອາຫານຫຼາຍຢ່າງເປັນສັນຍະລັກຂອງການຜ່ານພົ້ນຄວາມຫຍຸ້ງຍາກ, ພ້ອມທັງເປັນຄວາມຫວັງໃໝ່ສຳລັບປີໃໝ່.

ການຍ່າງຫຼິ້ນອ້ອມຕະຫຼາດດອກໄມ້ Quảng Bá ໃກ້ກັບທະເລສາບຕາເວັນຕົກ (West Lake) ແມ່ນປະສົບການທີ່ລືມບໍ່ໄດ້ໃນອາທິດກ່ອນບຸນເຕັດ. ຜູ້ຄົນທີ່ນຸ່ງເຄື່ອງອົບອຸ່ນຕ້ອນຮັບຄວາມໜາວໄດ້ເລືອກຊື້ກິ່ງດອກທໍ້ສີຊົມພູທີ່ງາມທີ່ສຸດທີ່ເຂົາເຈົ້າສາມາດຊື້ໄດ້ ເພື່ອນຳເອົາໂຊກລາບມາໃຫ້ໃນປີໃໝ່. ຄືນສົ່ງທ້າຍປີເກົ່າຕ້ອນຮັບປີໃໝ່ຂອງບຸນເຕັດແມ່ນດີທີ່ສຸດທີ່ຈະໄດ້ເຫັນຢູ່ຕາມຮອກຊອຍຂອງຍ່ານເມືອງເກົ່າ (Old Quarter), ເຊິ່ງມີໂຕະບູຊາຊົ່ວຄາວຫຼາຍຮ້ອຍໂຕະປະກົດຂຶ້ນຢູ່ຕາມແຄມທາງ, ໂດຍມີເຄື່ອງບູຊາເປັນຜົນໄມ້ ແລະ ໄກ່ຕົ້ມ. 

ຂໍ້ແນະນຳ: ດອກໄມ້ໄຟຈະຖືກຈຸດຂຶ້ນທົ່ວເມືອງໃຫຍ່ໆ ຂອງຫວຽດນາມ ໃນຄືນສົ່ງທ້າຍປີເກົ່າຕ້ອນຮັບປີໃໝ່ຂອງບຸນເຕັດ (11 ກຸມພາ 2021), ສະນັ້ນ ໃຫ້ຊອກຫາບ່ອນຢູ່ກາງແຈ້ງ ແລະ ຊົມທ້ອງຟ້າທີ່ສະຫວ່າງໄສໃນເວລາທ່ຽງຄືນ. 

ຢູ່ທາງພາກໃຕ້, ດອກເໝີຍສີເຫຼືອງ (hoa mai) ເປັນສັນຍະລັກຂອງປີໃໝ່ຕາມຈັນທະຄະຕິ. ບຸນເຕັດຢູ່ເມືອງໂຮ່ຈີມິນ ກໍມີສີສັນບໍ່ໜ້ອຍໄປກວ່າຢູ່ທາງພາກເໜືອ. ຖະໜົນ ຫງວຽນເຫ້ວ ຢູ່ເຂດ 1 ເປັນບ່ອນຈັດງານສະແດງດອກໄມ້ທີ່ໃຫຍ່ທີ່ສຸດຂອງປະເທດ. ເຂົ້າຮ່ວມກັບຝູງຊົນ -- ບັນດາຄອບຄົວໃນຊຸດເຄື່ອງໃໝ່ ແລະ ຍິງສາວທີ່ນຸ່ງຊຸດ ອາວ່າຍ (áo dài) ຖືໄມ້ເຊວຟີ -- ເພື່ອຊົມການປະດັບປະດາຕົກແຕ່ງດອກໄມ້ທີ່ໜ້າປະທັບໃຈ.

ຂໍ້ແນະນຳບຸນເຕັດສຳລັບນັກທ່ອງທ່ຽວ

- ປະຊາຊົນຈາກທົ່ວປະເທດຈະເດີນທາງກັບບ້ານເກີດເພື່ອສະຫຼອງບຸນເຕັດ, ເຮັດໃຫ້ມີຄວາມຕ້ອງການປີ້ລົດປະຈຳທາງ, ປີ້ລົດໄຟ ແລະ ປີ້ຍົນສູງຫຼາຍ, ລວມທັງຫ້ອງພັກໂຮງແຮມ. ຖ້າທ່ານຕ້ອງເດີນທາງໃນຊ່ວງເວລານີ້, ພະຍາຍາມຈອງການເດີນທາງ ແລະ ທີ່ພັກໄວ້ລ່ວງໜ້າດົນໆ.

- ເນື່ອງຈາກພະນັກງານຫຼາຍຄົນກັບບ້ານໄປຫາຄອບຄົວ, ຮ້ານຄ້າ ແລະ ຮ້ານອາຫານສ່ວນຫຼາຍຈະອັດໃນຊ່ວງ 2-3 ມື້ທຳອິດຂອງບຸນເຕັດ. ບັນດາໂຕເມືອງຈະງຽບສະຫງົບໃນຊ່ວງເວລານີ້, ແລະ ຕົວເລືອກການຮັບປະທານອາຫານ ແລະ ຊື້ຂອງຈະມີຢ່າງຈຳກັດ.

- ຊ່ວງບໍ່ກີ່ມື້ທຳອິດຂອງບຸນເຕັດແມ່ນໂອກາດທີ່ຫາໄດ້ຍາກທີ່ຈະໄດ້ເຫັນເມືອງໃຫຍ່ໆ ຂອງຫວຽດນາມ ປາດສະຈາກສຽງນວນ ແລະ ການຈາລະຈອນ. ນຳໃຊ້ຜົນປະໂຫຍດຈາກຄວາມງຽບສະຫງົບນີ້ ແລະ ອອກສຳຫຼວດໂດຍການຂີ່ລົດຖີບ, ລົດສະກູດເຕີ ຫຼື ການຍ່າງ.

- ທ່ານອາດຈະໄດ້ຮັບເຊີນເຂົ້າໄປໃນເຮືອນຂອງຄອບຄົວໃດໜຶ່ງໃນຊ່ວງບຸນເຕັດ ເຊິ່ງຖືເປັນກຽດຢ່າງຍິ່ງ. ໃນຊ່ວງບຸນເຕັດ, ມັນສຳຄັນຫຼາຍທີ່ຈະບໍ່ແວ່ໄປເຮືອນຄົນຫວຽດນາມໂດຍບໍ່ໄດ້ຮັບເຊີນ, ເພາະວ່າແຂກຄົນທຳອິດຂອງປີແມ່ນໄດ້ຖືກເລືອກເປັນພິເສດເພື່ອຄາດວ່າຈະນຳໂຊກລາບມາໃຫ້ແຕ່ລະຄົວເຮືອນ.

- ຄຳອວຍພອນທີ່ອົບອຸ່ນແມ່ນໄດ້ຮັບຄວາມຊື່ນຊົມຫຼາຍໃນຊ່ວງບຸນເຕັດ. ໃນມື້ທຳອິດຂອງປີໃໝ່, ໃຫ້ຍິ້ມ ແລະ ເວົ້າວ່າ “Chúc Mừng Năm Mới” (ສຸກສັນປີໃໝ່) ກັບທຸກຄົນທີ່ທ່ານພົບເຫັນ!

ຕ້ອງການໄອດຽາການທ່ອງທ່ຽວຫວຽດນາມເພີ່ມເຕີມບໍ? ລົງທະບຽນຮັບຈົດໝາຍຂ່າວຂອງພວກເຮົາ ເພື່ອຮັບເລື່ອງລາວທີ່ດີທີ່ສຸດຂອງພວກເຮົາສົ່ງເຖິງກ່ອງຂໍ້ຄວາມຂອງທ່ານ.