“ພວກເຮົາມອບຄວາມສົນໃຈ ແລະ ຕິດຕາມວົງການອາຫານຂອງຫວຽດນາມມາເປັນເວລາດົນນານແລ້ວ ແລະ ພວກເຮົາມີຄວາມຍິນດີຫຼາຍທີ່ຈະປະກາດລາຍຊື່ຮ້ານອາຫານທີ່ໄດ້ຮັບການຄັດເລືອກຄັ້ງທຳອິດຂອງ MICHELIN Guide ສຳລັບ ຮາໂນ້ຍ ແລະ ນະຄອນໂຮ່ຈີມິນ,” ທ່ານ Gwendal Poullennec, ຜູ້ອຳນວຍການລະດັບສາກົນຂອງ MICHELIN Guide ກ່າວ. “ນະຄອນໂຮ່ຈີມິນ ບໍ່ພຽງແຕ່ເປັນເມືອງທີ່ໃຫຍ່ທີ່ສຸດຂອງຫວຽດນາມເທົ່ານັ້ນ, ແຕ່ຍັງເປັນເມືອງທີ່ຄຶກຄື້ນ ແລະ ເຕີບໂຕຢ່າງໄວວາ, ເຊິ່ງວົງການອາຫານຂອງເມືອງນີ້ບໍ່ພຽງແຕ່ມີຊີວິດຊີວາເທົ່ານັ້ນ ແຕ່ຍັງເຕັມໄປດ້ວຍພະລັງ ແລະ ໂອກາດ. ໂດຍບໍ່ມີຂໍ້ຈຳກັດດ້ານຕົ້ນກຳເນີດຂອງອາຫານ, ຂະໜາດ, ແລະ ປະເພດອາຫານ, ເມືອງນີ້ບໍ່ເຄີຍຂາດລົດຊາດທີ່ໂດດເດັ່ນ ແລະ ປະສົບການການຮັບປະທານອາຫານທີ່ໜ້າຈົດຈຳ. ໃນທາງກັບກັນ, ຮາໂນ້ຍ ໃຫ້ບັນຍາກາດທີ່ຜ່ອນຄາຍ ແລະ ສະບາຍໆ, ໂດຍມີຮ້ານຄ້າ ແລະ ຮ້ານອາຫານນ້ອຍໆ ທີ່ພົບເຫັນສ່ວນໃຫຍ່ໃນເຂດເມືອງເກົ່າຂອງເມືອງ. ຜູ້ກວດສອບຂອງພວກເຮົາມີຄວາມຍິນດີທີ່ໄດ້ຄົ້ນພົບເພັດເມັດງາມທີ່ຊ່ອນຢູ່ຢ່າງຫຼວງຫຼາຍ ເຊິ່ງນຳສະເໜີການປຸງແຕ່ງອາຫານແບບດັ້ງເດີມທີ່ມີລົດຊາດເອກະລັກ.”
ການເປີດໂຕ MICHELIN Guide ຄັ້ງທຳອິດໃນຫວຽດນາມ ໄດ້ຮັບການສະໜັບສະໜູນຈາກ Sun Group, ເຊິ່ງເປັນກຸ່ມບໍລິສັດທີ່ມີພັນທະກິດໃນການສົ່ງເສີມ ແລະ ປົກປັກຮັກສາຄວາມງາມ ແລະ ວັດທະນະທຳທີ່ເປັນເອກະລັກຂອງຫວຽດນາມ ນັບຕັ້ງແຕ່ການກໍ່ຕັ້ງໃນປີ 2007. ທ່ານ Dang Minh Truong, ປະທານ Sun Group ກ່າວວ່າ: “ການຈັດພິມ MICHELIN Guide Hanoi & Ho Chi Minh City ສະບັບປະຖົມມະລຶກ ນີ້ ຖືເປັນມຸດໝາຍສຳຄັນສຳລັບວົງການອາຫານຫວຽດນາມ. ຜ່ານໂອກາດນີ້, ພວກເຮົາມຸ່ງຫວັງທີ່ຈະຍົກຍ້ອງຄວາມທຸ້ມເທ ແລະ ຄວາມພະຍາຍາມຂອງເຊຟ ແລະ ຮ້ານອາຫານຊັ້ນນຳຂອງຈຸດໝາຍປາຍທາງນີ້, ພ້ອມທັງສະເລີມສະຫຼອງຄວາມຫຼາກຫຼາຍ ແລະ ຄວາມປະນີດຂອງອາຫານຫວຽດນາມ. ພວກເຮົາມີຄວາມເຊື່ອວ່າ MICHELIN Guide ຈະເປັນແຮງບັນດານໃຈ ແລະ ຊຸກຍູ້ໃຫ້ເກີດນວັດຕະກຳ ແລະ ຄວາມເປັນເລີດໃນອຸດສາຫະກຳນີ້, ແລະ ຂ້າພະເຈົ້າມີຄວາມຕື່ນເຕັ້ນທີ່ຈະໄດ້ເຫັນວ່າ ມັນຈະສ້າງໂສມໜ້າຂອງວົງການອາຫານໃນຫວຽດນາມແນວໃດໃນຊຸມປີຕໍ່ໆໄປ. ດ້ວຍ MICHELIN Guide ສະບັບທຳອິດໃນຫວຽດນາມນີ້, ພວກເຮົານັບຫວັງວ່າມັນຈະຊ່ວຍສົ່ງເສີມການທ່ອງທ່ຽວສາກົນ, ແລະ ເຜີຍແຜ່ຄວາມຮັກໃນອາຫານທ້ອງຖິ່ນທີ່ແຊບຊ້ອຍ ທີ່ທັງ ຮາໂນ້ຍ ແລະ ນະຄອນໂຮ່ຈີມິນ ມີໃຫ້ນຳກັນ.”
MICHELIN Guide ຖ່າຍທອດການຣີວິວຮ້ານອາຫານຜ່ານລະບົບການໃຫ້ລາງວັນທີ່ກວ້າງຂວາງ, ເຊິ່ງລາງວັນທີ່ມີຊື່ສຽງທີ່ສຸດແມ່ນ MICHELIN Stars ທີ່ມີຊື່ສຽງໂດ່ງດັງທົ່ວໂລກ ທີ່ມອບໃຫ້ກັບປະສົບການດ້ານອາຫານທີ່ດີທີ່ສຸດໃນບັນດາຮ້ານອາຫານທີ່ໄດ້ຮັບການຄັດເລືອກຂອງຄູ່ມື. ນອກຈາກການໃຫ້ດາວທີ່ທຸກຄົນໃຝ່ຝັນແລ້ວ, ການຄັດເລືອກຍັງລວມມີ ໝວດໝູ່ Bib Gourmand ທີ່ໄດ້ຮັບຄວາມນິຍົມ, ເຊິ່ງເປັນລາງວັນທີ່ມອບໃຫ້ກັບຮ້ານອາຫານທີ່ນຳສະເໜີອາຫານທີ່ມີຄວາມຄຸ້ມຄ່າເກີນລາຄາທີ່ສຸດ.
ທີ່ມາ: ອິນເຕີເນັດ
ຮ້ານອາຫານທັງໝົດແມ່ນໄດ້ຮັບການຄັດເລືອກໂດຍຜູ້ກວດສອບທີ່ບໍ່ເປີດໂຜຍຕົວຕົນຂອງ MICHELIN Guide ຫຼັງຈາກການທົດສອບຫຼາຍຄັ້ງ ແລະ ຕາມເກນ 5 ປະການດຽວກັນທີ່ໃຊ້ທົ່ວໂລກ: ຄຸນນະພາບຂອງວັດຖຸດິບ; ຄວາມຊ່ຽວຊານໃນເຕັກນິກການປຸງແຕ່ງ; ຄວາມກົມກ່ຽວຂອງລົດຊາດ; ການຖ່າຍທອດເອກະລັກຂອງເຊຟລົງໃນອາຫານ; ແລະ ຄວາມສະໝ່ຳສະເໝີ, ທັງຕາມໄລຍະເວລາ ແລະ ໃນທຸກໆເມນູ. ທີ່ຕັ້ງ, ການຕົກແຕ່ງ, ການບໍລິການ ແລະ ສິ່ງອຳນວຍຄວາມສະດວກທີ່ມີ ບໍ່ໄດ້ຢູ່ໃນເກນການຄັດເລືອກ, ເຖິງແມ່ນວ່າອາດຈະຖືກຍົກໃຫ້ເຫັນຫາກມີຄວາມໜ້າສົນໃຈເປັນພິເສດ.
ລາຍຊື່ຮ້ານອາຫານທີ່ໄດ້ຮັບການຄັດເລືອກທັງໝົດຈະມີໃຫ້ເບິ່ງໂດຍສະເພາະໃນຮູບແບບດິຈິທັອນ ຢູ່ເທິງທຸກແພລດຟອມຢ່າງເປັນທາງການຂອງ MICHELIN Guide: ເວັບໄຊ, ແອັບພລິເຄຊັນມືຖື, ແລະ ເຄືອຂ່າຍໂຊຊຽວມີເດຍ.
