ລັດຖະບານຫວຽດນາມຫາກໍອອກມະຕິກ່ຽວກັບການຍົກເວັ້ນວີຊາສຳລັບພົນລະເມືອງໂປໂລຍ, ເຊັກ ແລະ ສະວິດເຊີແລນ ທີ່ເດີນທາງທ່ອງທ່ຽວໄປຫວຽດນາມ. ນະໂຍບາຍດັ່ງກ່າວຈະຖືກນຳໃຊ້ແຕ່ວັນທີ 1 ມີນາ 2025 ຫາ ວັນທີ 31 ທັນວາ 2025 ພາຍໃຕ້ຂອບໂຄງການສົ່ງເສີມການພັດທະນາການທ່ອງທ່ຽວໃນປີ 2025.

ດັ່ງນັ້ນ, ການຍົກເວັ້ນວີຊາແມ່ນນຳໃຊ້ກັບນັກທ່ອງທ່ຽວທີ່ມາຢ້ຽມຢາມຫວຽດນາມເພື່ອຈຸດປະສົງການທ່ອງທ່ຽວ ແລະ ເຂົ້າຮ່ວມການທ່ອງທ່ຽວທີ່ຈັດໂດຍຜູ້ປະກອບການທ່ອງທ່ຽວພາຍໃນປະເທດຫວຽດນາມ. ໄລຍະເວລາສູງສຸດຂອງການພັກເຊົາພາຍໃຕ້ການຍົກເວັ້ນວີຊານີ້ແມ່ນ 45 ວັນນັບແຕ່ວັນເຂົ້າເມືອງ, ໂດຍບໍ່ຄໍານຶງເຖິງປະເພດໜັງສືຜ່ານແດນ, ບົນພື້ນຖານການປະຕິບັດຕາມເງື່ອນໄຂທີ່ກຳນົດໄວ້ໃນກົດໝາຍຫວຽດນາມຢ່າງຄົບຖ້ວນ.

ໃນປີ 2022, ລັດຖະບານຫວຽດນາມຍັງໄດ້ອອກມະຕິເລກທີ 32/NQ-CP ກ່ຽວກັບການຍົກເວັ້ນວີຊາສຳລັບພົນລະເມືອງຂອງ 13 ປະເທດລວມມີ: ເຢຍລະມັນ, ຝຣັ່ງ, ອີຕາລີ, ສະເປນ, ອັງກິດ, ຣັດເຊຍ, ຍີ່ປຸ່ນ, ເກົາຫຼີໃຕ້, ເດນມາກ, ສວີເດັນ, ນໍເວ, ຟິນແລນ, ເບລາຣຸດ ໂດຍມີໄລຍະເວລາພັກເຊົາຊົ່ວຄາວ 45 ວັນນັບແຕ່ວັນເຂົ້າເມືອງ.