Sa Pa សម្រាប់អ្នកធ្វើដំណើរប្រកបដោយចីរភាព

ការសិក្សាស្វែងយល់អំពីវប្បធម៌ក្នុងស្រុកគឺជាវិធីដ៏ល្អមួយដើម្បីចាប់ផ្តើមពេលវេលារបស់អ្នកនៅ Sa Pa។ ជនជាតិភាគតិចជាច្រើននៅក្នុងតំបន់នេះនៅតែស្លៀកសម្លៀកបំពាក់ប្រពៃណីរបស់ពួកគេ រស់នៅក្នុងភូមិដ៏សាមញ្ញ និងប្រតិបត្តិតាមទំនៀមទម្លាប់បុរាណ។ ផ្សារព្រឹកគឺជាកន្លែងដ៏ល្អឥតខ្ចោះដើម្បីទស្សនាវប្បធម៌ដ៏រស់រវើកនៃក្រុមជនជាតិភាគតិចទាំងនោះ។ សូមទុកពេលខ្លះសម្រាប់ Mường Hum ដែលជាផ្សារព្រឹកថ្ងៃអាទិត្យតូចមួយប៉ុន្តែមានមន្តស្នេហ៍ ឬបើកបររយៈពេលបីម៉ោងទៅកាន់ ផ្សារ Bắc Hà ដើម្បីទស្សនាអ្នកស្រុកធ្វើការជួញដូរទំនិញ និងកសិផលចម្រុះពណ៌គ្រប់ប្រភេទ។ 

អ្នកក៏អាចស្គាល់ក្រុមជនជាតិភាគតិចតាមរយៈសម្លៀកបំពាក់ធ្វើដោយដៃដ៏ពិសេសរបស់ពួកគេផងដែរ។ ចំណាយពេលខ្លះរៀនអំពីម៉ូដសម្លៀកបំពាក់នៃកុលសម្ព័ន្ធផ្សេងៗគ្នា តាមរយៈរោងជាងដេរ ប៉ាក់ ត្បាញ ឬធ្វើបាទិក (batik)។ សម្លៀកបំពាក់នីមួយៗអាចចំណាយពេលរាប់ខែដើម្បីធ្វើ។ ប្រសិនបើអ្នកចង់ទិញទំនិញម៉ូដជនជាតិភាគតិច សូមចូលទៅកាន់ហាង IndigoCat ដើម្បីទិញកាបូប អាវរងា និងខ្នើយប្រកបដោយប្រណីតភាព និងស្នាដៃពិតៗ។

គន្លឹះ៖ ETHOS ផ្តល់ជូននូវដំណើរកម្សាន្តផ្អែកលើសហគមន៍សម្រាប់អ្នកទេសចរប្រកបដោយការទទួលខុសត្រូវ ចាប់ពីការជិះម៉ូតូ រហូតដល់ថ្នាក់រៀនដេរ និងដំណើរកម្សាន្តថតរូប។

មានក្រុមហ៊ុនទេសចរណ៍រាប់មិនអស់នៅ Sa Pa ប៉ុន្តែការជ្រើសរើសក្រុមហ៊ុនដែលជាកម្មសិទ្ធិរបស់អ្នកស្រុក និងអនុវត្តតាមគោលការណ៍ចីរភាពគឺជាជម្រើសដ៏ល្អបំផុត។ មុនពេលអ្នកចេញដំណើរ សូមជជែកជាមួយមគ្គុទ្ទេសក៍របស់អ្នកដើម្បីសម្រេចចិត្តលើកាលវិភាគដែលសមស្របនឹងអ្នក។ អ្នកប្រហែលជាចង់ចំណាយពេលច្រើនដើរលេងនៅលើភ្នំ ឬរៀនអំពីជីវិតរស់នៅក្នុងភូមិ។ ប្រសិនបើអ្នកជ្រើសរើសការដើរព្រៃច្រើនថ្ងៃ ឬស្នាក់នៅមួយយប់ អ្នកនឹងមានឱកាសគេងនៅក្នុងភូមិជនជាតិភាគតិចតូចមួយនៅលើភ្នំ — គឺជាបទពិសោធន៍ដែលមិនគួររំលង!

ការដើរព្រៃភាគច្រើនចាប់ផ្តើមដោយការដើរទៅកាន់ផ្សារបន្លែសាច់ដើម្បីទិញអាហារសម្រាប់ដំណើរកម្សាន្តរបស់អ្នក។ បន្ទាប់មក គឺជាការដើរឡើងភ្នំយ៉ាងមានថាមពលកាត់តាមកូនភ្នំ ពេញដោយទស្សនីយភាពដ៏ស្រស់ស្អាត និងខ្យល់អាកាសភ្នំដ៏បរិសុទ្ធ។ ដើរតាមមគ្គុទ្ទេសក៍របស់អ្នកតាមផ្លូវកោង ឈប់ថតរូបតាមផ្លូវ។ អាហារថ្ងៃត្រង់ជាទូទៅត្រូវចម្អិនលើភ្នក់ភ្លើង។ នៅពេលរសៀល អ្នកអាចនឹងដើរទៅកាន់ចំណុចមើលទេសភាព ព្រៃឫស្សី ឬទឹកធ្លាក់។ Sa Pa មានផ្លូវដើរសម្រាប់មនុស្សគ្រប់រូប។ សូមដើរតាមល្បឿនសមស្របរបស់អ្នក ហើយរីករាយជាមួយទិដ្ឋភាព។

គន្លឹះ៖ Sapa Sisters ត្រូវបានគេស្គាល់តាមរយៈដំណើរកម្សាន្តដែលរៀបចំឡើងយ៉ាងល្អឥតខ្ចោះដឹកនាំដោយមគ្គុទ្ទេសក៍ក្នុងស្រុក។ ដំណើរកម្សាន្តក្នុងស្រុកទាំងនេះនឹងផ្តល់ឱ្យអ្នកនូវបរិបទអំពីប្រវត្តិសាស្ត្ររបស់ Sa Pa និងការពិតនៃជីវិតរស់នៅរបស់ជនជាតិភាគតិចនៅទីនោះនាពេលបច្ចុប្បន្ន។

ការជ្រើសរើសកន្លែងស្នាក់នៅ Sa Pa គឺជាផ្នែកមួយដ៏រីករាយនៃការរៀបចំផែនការដំណើរកម្សាន្តរបស់អ្នក។ នៅទីប្រជុំជន ឬនៅតាមវាលស្រែថ្នាក់ជណ្ដើរ? អាងហែលទឹក និងអាហារប៊ូហ្វេ ឬការបដិសណ្ឋារកិច្ចបែបគ្រួសារ? មានជម្រើសជាច្រើននៅក្នុងប្រភេទនីមួយៗ ប៉ុន្តែកន្លែងស្នាក់នៅដ៏ប្លែកបំផុតមួយចំនួនរបស់ Sa Pa គឺផ្ទះស្នាក់ (homestay)។ ការស្នាក់នៅជាមួយគ្រួសារជនជាតិភាគតិច ជួយបន្ថែមលើប្រាក់ចំណូលតូចតាចដែលពួកគេទទួលបានពីការធ្វើកសិកម្ម និងផ្តល់ឱកាសឱ្យអ្នកស្តាប់រឿងរ៉ាវអំពីជីវិតក្នុងស្រុក ភ្លក់មុខម្ហូបជនជាតិភាគតិចដ៏ឆ្ងាញ់ពិសា និងបង្កើតមិត្តថ្មីៗដ៏អស្ចារ្យ។ 

ប្រសិនបើអ្នកកំពុងស្វែងរកការលំហែកាយដ៏ស្ងប់ស្ងាត់ ឬដំណើរកម្សាន្តជាមួយមនុស្សពិសេស សូមជ្រើសរើសបឹងហ្គាឡូនៅ Topas Ecolodge។ កន្លែងសម្រាកលំហែកាយនៅលើភ្នំមួយនេះ ត្រូវបានគេស្គាល់តាមរយៈទស្សនីយភាពដ៏អស្ចារ្យនៃកំពូលភ្នំគ្របដណ្តប់ដោយអ័ព្ទ និងជ្រលងភ្នំថ្នាក់ជណ្ដើររបស់ Sa Pa (ជាពិសេសពីអាងហែលទឹកទឹកប្រៃទាំងពីររបស់វា) ទោះជាយ៉ាងណាក៏ដោយ រីសតមួយនេះក៏ជាអ្នកដឹកនាំផងដែរនៅពេលនិយាយអំពីចីរភាព។ Topas មានមោទនភាពក្នុងការផ្តល់ការងារដល់បុគ្គលិកជាង ១០០ នាក់មកពីភូមិជិតខាង កែច្នៃទឹកកខ្វក់ និងកញ្ចក់ឡើងវិញ កាត់បន្ថយផ្លាស្ទិក និងការវេចខ្ចប់ ព្រមទាំងទិញទំនិញពីអ្នកផ្គត់ផ្គង់ក្នុងស្រុក។

អ្នកមិនអាចចាកចេញពី Sa Pa ដោយមិនបានសាកល្បងការត្រាំទឹកឱសថបុរាណដ៏ល្បីល្បាញរបស់វាឡើយ។ ស្ត្រីជនជាតិ Dzao ក្រហម បានធ្វើឱ្យរូបមន្តសម្រាប់ការត្រាំទឹកព្យាបាលជំងឺកាន់តែល្អឥតខ្ចោះ ដោយប្រើសម្បកឈើ និងស្លឹកឈើដែលប្រមូលបានពីក្នុងព្រៃ។ ស្លឹកឈើត្រូវបានចញ់ និងហាលថ្ងៃឱ្យស្ងួត បន្ទាប់មកដាំក្នុងឆ្នាំងទឹកដ៏ធំ ដើម្បីបង្កើតជាល្បាយមានក្លិនក្រអូប និងមានស្ពឹកចំហាយទឹក ដែលប្រើសម្រាប់សម្រាលសាច់ដុំដែលហត់នឿយ ការពារជំងឺ និងជួយឱ្យស្ត្រីឆាប់ជាសះស្បើយក្រោយសម្រាលកូន។ 

ចំណាយពេលពីរបីម៉ោងដើម្បីទៅទស្សនាផ្ទះត្រាំទឹក Sa Pa-napro នៅក្នុងភូមិ Tả Phìn។ ចំណាយពេលកន្លះម៉ោងត្រាំក្នុងធុងឈើដែលពេញដោយទឹកក្តៅ និងមានពពុះ ក្នុងតម្លៃត្រឹមតែ ១៥០ ០០០ ដុង (VND) ប៉ុណ្ណោះ បន្ទាប់មកសប្បាយរីករាយជាមួយអាហារថ្ងៃត្រង់យឺតពេល ឬកាកាវក្តៅនៅក្នុងហាងកាហ្វេជិតខាង ជាមួយនឹងទិដ្ឋភាពដ៏ស្រស់ស្អាតនៃ Sa Pa អមដំណើរអ្នករៀងរាល់នាទី។

គន្លឹះ៖ ប្រសិនបើអ្នកមិនចង់ជិះទៅកាន់ភូមិ Tả Phìn ទេ អ្នកអាចកក់ការត្រាំទឹកឱសថបុរាណព្យាបាលជំងឺនៅក្នុងក្រុងនៅ Victoria Sapa Resort & Spa ហើយបន្ទាប់មកទទួលសេវាកម្មម៉ាស្សាតាមការជ្រើសរើសរបស់អ្នក។ ស្ងប់ស្ងាត់និងមានក្តីសុខ!

ដូចជានៅទូទាំងប្រទេសវៀតណាមដែរ នៅ Sa Pa អ្នកនឹងឃើញថាផលដំណាំស្រស់ៗដែលទើបបេះភ្លាមៗគឺជាចំណុចលេចធ្លោនៃតុអាហារ។ គ្រួសារជនជាតិភាគតិចហូបចុកជាចម្បងនូវបន្លែ និងជីរ ត្រីទន្លេ និងសាច់ក្របីអាំងផ្សែង។ មានមុខម្ហូបជនជាតិភាគតិចប្លែកៗមួយចំនួនសម្រាប់អ្នកធ្វើដំណើរដែលចូលចិត្តការផ្សងព្រេង ប៉ុន្តែសូម្បីតែអ្នកដែលរើសម្ហូបក៏នឹងចូលចិត្តតៅហ៊ូធ្វើដោយដៃស្រស់ៗប្រចាំតំបន់ និងស្លឹកផ្លែស៊ូស៊ូ (rau su su) ឆាខ្ទឹមសដែរ។ កុំភ្លេចភ្លក់ត្រីត្រាវឥន្ទធនូដ៏ល្បីឈ្មោះរបស់ Sa Pa ដែលមានបម្រើជាស៊ុបក្តៅៗ ឬអាំងជាមួយគ្រឿងទេស ហើយរុំក្នុងនំសែនសើមជាមួយត្រសក់ បន្លែ និងជីរ។ 

ភោជនីយដ្ឋាន Hill Station Restaurant នៅលើផ្លូវ Fansipan មានបើកវគ្គបង្រៀនធ្វើម្ហូបអាហារជនជាតិហ្មុងខ្មៅដ៏ពិតប្រាកដ រួមទាំងការនាំទៅទស្សនផ្សារក្នុងស្រុកផងដែរ។ ប្រសិនបើអ្នកជាអ្នកចូលចិត្តអាហារ អ្នកប្រហែលជាចង់ស្នាក់នៅ Topas Ecolodge ឬ Topas Riverside Lodge ដែលនៅទីនោះចុងភៅបានរៀបចំស៊ុបឆ្នាំងក្តៅយ៉ាងពិសេស អាហារពេលល្ងាចសាច់អាំងចង្ក្រានអុស និងមុខម្ហូបប្រចាំរដូវកាលដែលកែច្នៃចេញពីគ្រឿងផ្សំបានមកពីកសិដ្ឋានសរីរាង្គរបស់កន្លែងស្នាក់នៅ។ 

ការធ្វើដំណើរទៅកាន់ Sa Pa

បច្ចុប្បន្ន មានជម្រើសមធ្យោបាយធ្វើដំណើរយ៉ាងល្អជាច្រើនទៅកាន់ Sa Pa ពីទីក្រុង Ha Noi។ រថយន្ត limo vans ប្រកបដោយផាសុកភាព (ចាប់ពី ៤៥០ ០០០ ដុង) ចេញពីកណ្តាលទីក្រុង Ha Noi ចាយពេលប្រហែល ៥ ទៅ ៦ ម៉ោង ហើយនឹងជូនអ្នកទៅដល់ទីប្រជុំជន Sa Pa ដែលនៅទីនោះអ្នកអាចជិះតាក់ស៊ីបន្តទៅកាន់ homestay និងកន្លែងស្នាក់នៅក្នុងជ្រលងភ្នំជុំវិញ។ អ្នកធ្វើដំណើរជាច្រើនជ្រើសរើសជិះ រថភ្លើងយប់ រយៈពេល ៨ ម៉ោង (ចាប់ពី ៩០០ ០០០ ដុង) ពី Ha Noi ទៅកាន់ Lào Cai ដែលត្រូវការជិះរថយន្តប្រហែលមួយម៉ោងទៀតដើម្បីទៅដល់ទីប្រជុំជន Sa Pa។ ការជួល រថយន្តឯកជន ជាមួយអ្នកបើកបរពី Ha Noi ទៅ Sa Pa មានតម្លៃប្រហែល ៣,៥ លានដុង សម្រាប់ជើងតែមួយ។ 

ចង់បានគំនិតដំណើរកម្សាន្តនៅវៀតណាមបន្ថែមទៀតទេ? ចុះឈ្មោះទទួលព្រឹត្តិបត្រព័ត៌មានរបស់យើង ដើម្បីទទួលបានអត្ថបទល្អៗបំផុតផ្ញើជូនប្រអប់សំបុត្ររបស់អ្នក។