សៀវភៅមគ្គទេសក៍ Michelin Guide សម្រាប់ទីក្រុងហាណូយ និងទីក្រុងហូជីមិញ

ក្រុមហ៊ុនកង់រថយន្ត Michelin បានចេញផ្សាយសៀវភៅមគ្គទេសក៍ Michelin Guide ដំបូងបង្អស់របស់ខ្លួននៅក្នុងឆ្នាំ១៩០០។ កាលណោះ វាគ្រាន់តែជាផែនទីសាមញ្ញមួយដែលមានការណែនាំអំពីសណ្ឋាគារ និងទីតាំងផ្លាស់ប្តូរកង់រថយន្ត Michelin ដែលបង្កើតឡើងសម្រាប់អ្នកធ្វើដំណើរតាមផ្លូវគោក។ បន្ទាប់ពីប៉ុន្មានទសវត្សរ៍មក សៀវភៅមគ្គទេសក៍នេះបានវិវឌ្ឍដោយបញ្ចូលនូវបញ្ជីភោជនីយដ្ឋាន។ ជាងមួយសតវត្សរ៍ក្រោយមក ឥឡូវនេះ Michelin Guide រំលេច និងលើកតម្កើងគ្រឹះស្ថានអាហារអន្តរជាតិដ៏ប្រណិតបំផុត ដោយណែនាំអ្នកស្រឡាញ់ម្ហូបអាហារទៅកាន់ភោជនីយដ្ឋាន និងគោលដៅម្ហូបអាហារដ៏ល្អបំផុតនៅក្នុងពិភពលោក។ 

សៀវភៅមគ្គទេសក៍ Michelin Guide ផ្ដល់ពិន្ទុផ្កាយពី ១ ដល់ ៣ ដល់ភោជនីយដ្ឋានដោយផ្អែកលើបទពិសោធន៍ម្ហូបអាហារដែលភោជនីយដ្ឋាននោះផ្ដល់ជូន។ អ្នកអធិការកិច្ចអនាមិករបស់ Michelin ដើរតាមប្រព័ន្ធលក្ខណៈវិនិច្ឆ័យ ៥ ចំណុចនៅពេលពួកគេវាយតម្លៃភោជនីយដ្ឋាន។ ភោជនីយដ្ឋានត្រូវបានវាយតម្លៃលើធាតុផ្សំនៃអាហារផ្ទាល់ ដូចជាគុណភាពគ្រឿងផ្សំ បច្ចេកទេសចម្អិន និងសុខដុមរមនានៃរសជាតិ។ សមត្ថភាពរបស់ភោជនីយដ្ឋានក្នុងការរក្សាគុណភាពតាមពេលវេលា និងនៅគ្រប់មុខម្ហូបចម្រុះក៏ដើរតួនាទីយ៉ាងសំខាន់ផងដែរ។ ទោះជាយ៉ាងណាក៏ដោយ លក្ខណៈវិនិច្ឆ័យដែលគួរឱ្យចាប់អារម្មណ៍បំផុតនោះគឺថា តើបុគ្គលិកលក្ខណៈរបស់ចុងភៅត្រូវបានឆ្លុះបញ្ចាំងយ៉ាងត្រឹមត្រូវនៅក្នុងអាហារដែរឬទេ។

_{ប្រភព៖ MICHELIN Guide}

ផ្កាយមួយត្រូវបានប្រគល់ជូនភោជនីយដ្ឋានសម្រាប់ «ការចម្អិនអាហារមានគុណភាពខ្ពស់ ដែលគួរតែឈប់សម្រាកភ័យ»។ ភោជនីយដ្ឋានដែលមាន «ការចម្អិនអាហារដ៏ឥតខ្ចោះ ដែលគួរឱ្យចូលទស្សនាផ្ទាល់» ទទួលបានផ្កាយពីរ។ ចំណែករង្វាន់ដែលគ្រប់គ្នាក្រឡេកមើលគឺចំណាត់ថ្នាក់ផ្កាយបី ដែលត្រូវបានប្រគល់ជូនភោជនីយដ្ឋានដែលមាន «ម្ហូបអាហារដ៏អស្ចារ្យវិសេសវិសាល ដែលស័ក្តិសមនឹងការធ្វើដំណើរពិសេស»។ 

ប្រទេសវៀតណាមទាំងមូលល្បីល្បាញលើពិភពលោកសម្រាប់ភាពឥតខ្ចោះ និងភាពសម្បូរបែបនៃម្ហូបអាហាររបស់ខ្លួន។ ជាការពិត ស្ថាប័ន World Travel Awards បានទទួលស្គាល់វៀតណាមជាគោលដៅម្ហូបអាហារឈានមុខគេនៅអាស៊ី ក្នុងឆ្នាំ២០១៩ និងឆ្នាំ២០២០។ ទីក្រុងហាណូយ និងទីក្រុងហូជីមិញ គឺជាមជ្ឈមណ្ឌលផ្នែកម្ហូបអាហារដ៏មានឥទ្ធិពលពីររបស់ប្រទេសនេះ ដោយទីក្រុងទាំងពីរផ្ដល់នូវបទពិសោធន៍ខុសៗគ្នាទាំងស្រុង។ 

ទីក្រុងហាណូយ ដែលជារាជធានី ត្រូវបានគេស្គាល់ដោយសារបេតិកភណ្ឌ និងប្រពៃណីបុរាណរបស់ខ្លួន ដែលត្រូវបានបង្ហាញតាមរយៈស្ថាបត្យកម្ម វប្បធម៌ ក៏ដូចជាម្ហូបអាហារ។ មុខម្ហូបជាច្រើនត្រូវបានកែច្នៃយ៉ាងល្អឥតខ្ចោះជាច្រើនជំនាន់ និងច្រើនសតវត្សរ៍។ លោកយាយទួតលក់ប៊ុនឆា (bun cha) ក្តៅៗចេញពីឆ្នាំងដីធំៗនៅតាមចិញ្ចើមថ្នល់ ជូនដល់អ្នកញ៉ាំដែលអង្គុយលើកៅអីជ័រល្មមៗ – រូបមន្តទាំងនេះអាចប្រកួតប្រជែងជាមួយភោជនីយដ្ឋានលំដាប់ខ្ពស់ជាច្រើនបាន។ ប៉ុន្តែក៏មានភោជនីយដ្ឋានលំដាប់ខ្ពស់ ដែលចុងភៅប្រចាំភោជនីយដ្ឋានបានច្នៃប្រឌិតបច្ចេកទេសបុរាណទាំងនេះ ដល់កម្រិតមួយដែលពួកគេបម្រើមុខម្ហូបប្រពៃណីដូចគ្នានេះ ជាមួយនឹងគ្រឿងផ្សំក្នុងស្រុកមានគុណភាពខ្ពស់បំផុត ដើម្បីបង្កើតផលសម្រេចដ៏អស្ចារ្យពិតៗ។ 

នៅទីក្រុងហូជីមិញ ពាណិជ្ជកម្ម និងការផ្លាស់ទីលំនៅជាច្រើនសតវត្សរ៍បានបង្កើតឱ្យមានពិភពអាហារចម្រុះជាតិសាសន៍ដ៏អស្ចារ្យនៃការបូកបញ្ជូលគ្នានៃម្ហូប (fusion food)។ ចុងភៅជនជាតិវៀតណាមបានធ្វើដំណើរជុំវិញពិភពលោក ដើម្បីនាំយកឥទ្ធិពលបរទេសមកកាន់មុខម្ហូបក្នុងស្រុក។ នៅក្នុងភោជនីយដ្ឋាននានាក្នុងទីក្រុងហូជីមិញ ធាតុផ្សំក្នុងស្រុក និងអន្តរជាតិបានលាយបញ្ចូលគ្នា ប្រកបដោយសុខដុមរមនា និងការលើកកម្ពស់។ 

ចំណាត់ថ្នាក់ពីសៀវភៅមគ្គទេសក៍ Michelin Guide គឺជាពានរង្វាន់ម្ហូបអាហារដ៏មានកិត្យានុភាពបំផុតមួយនៅក្នុងពិភពលោក។ ការទទួលស្គាល់ចំនួនផ្កាយណាមួយ មានឥទ្ធិពលយ៉ាងធំធេងលើកេរ្តិ៍ឈ្មោះរបស់ភោជនីយដ្ឋាន ក៏ដូចជាតំបន់ទាំងមូលដែលភោជនីយដ្ឋាននោះដំណើរការ។ អ្នកធ្វើដំណើរជាច្រើនជ្រើសរើសគ្រឹះស្ថាន និងគោលដៅដោយផ្អែកលើការវាយតម្លៃផ្កាយ Michelin Rating ថែមទាំងជ្រើសរើសត្រឡប់មកវិញ និងបន្តការស្នាក់នៅរបស់ពួកគេនៅទីតាំងដែលទទួលបានពានរង្វាន់ Michelin ទៀតផង។ វាគឺជាការជំរុញដ៏ធំដល់សេដ្ឋកិច្ចក្នុងស្រុក ក៏ដូចជាភោជនីយដ្ឋានផ្ទាល់ខ្លួនផងដែរ។ 

វត្តមានរបស់សៀវភៅមគ្គទេសក៍ Michelin Guide នៅទីក្រុងហាណូយ និងទីក្រុងហូជីមិញ នឹងនាំមកនូវការយកចិត្តទុកដាក់ជាអន្តរជាតិដ៏សមរម្យចំពោះម្ហូបអាហារវៀតណាម។ វានឹងជំរុញការសរសើរចំពោះវិស័យអាហាររបស់ប្រទេសនេះឱ្យហួសពីព្រំដែនបច្ចុប្បន្ន។ ម្ហូបអាហារវៀតណាមក្នុងស្រុកគួរតែត្រូវបានអបអរសាទរនៅលើឆាកអន្តរជាតិ។ ការយកចិត្តទុកដាក់បែបនេះ នឹងជំរុញឱ្យចុងភៅវៀតណាមអនុវត្តសិល្បៈធ្វើម្ហូបរបស់ពួកគេ ដោយក្ដីស្រឡាញ់ គំនិតច្នៃប្រឌិត បច្ចេកទេស និងការប្តេជ្ញាចិត្តកាន់តែខ្លាំងឡើង ដែលបានជ្រួតជ្រាបនៅក្នុងព្រលឹងនៃប្រទេស និងវប្បធម៌របស់ខ្លួន។