វៀតណាម៖ មគ្គុទេសក៍អាហារតាមតំបន់

រូបមន្តម្ហូបភាគខាងជើងវៀតណាមជាច្រើនមានអាយុកាលរាប់រយឆ្នាំមកហើយ។ អាហារនៅទីនេះទទួលរងឥទ្ធិពលយ៉ាងខ្លាំងពីប្រពៃណី និងទំនៀមទម្លាប់បុរាណ។ Bánh chưng ដែលជានំប្រពៃណីរៀបចំឡើងនៅថ្ងៃចូលឆ្នាំចិន មានព្រេងនិទានផ្ទាល់ខ្លួន។ ដោយទទួលបានគំនិតច្នៃប្រឌិតពីអ្វីដែលទឹកដីរបស់ទ្រង់មាន រាជបុត្រមួយអង្គបានបង្កើតមុខម្ហូបធ្វើពីសណ្តែកបៃតង និងអង្ករដំណើបខ្ចប់ក្នុងស្លឹកដុង។ មុខម្ហូបនេះតំណាងឱ្យទឹកដីយ៉ាងច្បាស់លាស់ រហូតដល់ព្រះរាជាបានប្រគល់រាជបល្ល័ង្កឱ្យទៅរាជបុត្រារបស់ទ្រង់។ គ្រួសារវៀតណាមនៅតែជួបជុំគ្នារៀងរាល់បុណ្យតេត (បុណ្យចូលឆ្នាំចិន) ដើម្បីធ្វើ bánh chưng ជាការរំឭកដល់ប្រភពដើមរបស់យើង។

អាហារមកពីភាគខាងជើងមាននិន្នាការមានរសជាតិស្រាល និងលេចធ្លោនូវរសជាតិធម្មជាតិនៃគ្រឿងផ្សំ ហើយត្រូវបានបម្រើជូនជាមួយជី និងគ្រឿងផ្សំជាច្រើន។ កុំបារម្ភចំពោះជម្រើសបន្ថែមជាច្រើនដែលមកជាមួយ phở របស់អ្នក។ ម្ទេសស្រស់ ក្រូចឆ្មារ និងខ្ទឹមសត្រាំទឹកខ្មេះ សុទ្ធតែនៅទីនេះដើម្បីជួយបន្ថែមរសជាតិ។ ទោះជាយ៉ាងណាក៏ដោយ មុននឹងថែមអ្វីទាំងអស់ សូមក្រង់យករសជាតិស៊ុបឆ្អឹងសុទ្ធដែលឈ្ងុយឆ្ងាញ់ដោយផ្កាប៉កក ក្រវ៉ាញ និងឈើអែមមួយស្លាបព្រាសិន។ វាជាវិធីមួយដើម្បីបង្ហាញការគោរពចំពោះចុងភៅ និងកោតសរសើរចំពោះភាពផ្ចិតផ្ចង់នៃម្ហូបភាគខាងជើងវៀតណាម។

សាកល្បង៖

Bún thang Thuận Lý, 33 Hàng Hòm, ខណ្ឌ Hoàn Kiếm, ហាណូយ
Phở bò Khôi Hói, 50 Hàng Vải, ខណ្ឌ Hoàn Kiếm, ហាណូយ

ភាគកណ្តាល

ប្រសិនបើអ្នកជាអ្នកចូលចិត្តគ្រឿងទេស ទឹកជ្រលក់ និងគ្រឿងជ្រលក់ អ្នកនឹងស្រឡាញ់អាហារនៅភាគកណ្តាលវៀតណាម។ អ្នកស្រុកនៅទីនេះនឹងប្រាប់អ្នកថា អាថ៌កំបាំងនៃអាហារដ៏ឆ្ងាញ់ពិសារគឺស្ថិតនៅលើទឹកជ្រលក់។ ទឹកជ្រលក់នៅ ដាណាំង, ហូយអាន និង ញ៉ាត្រាង មានភាពសម្បូរបែបលើសពី nước mắm (ទឹកត្រី) ធម្មតារបស់អ្នកឆ្ងាយណាស់។ ទទួលបានផលពីឆ្នេរសមុទ្រដ៏វែង ចុងភៅភាគកណ្តាលវៀតណាមបានរកឃើញវិធីជាច្រើនក្នុងការរក្សាទុកគ្រឿងសមុទ្រ។ កពិ និងប្រហុក គឺជាផ្នែកមួយដ៏សំខាន់នៃអាហារនីមួយៗ។ ជាធម្មតា មុខម្ហូបនីមួយៗត្រូវបានអមដោយទឹកជ្រលក់ផ្ទាល់ខ្លួន ដែលធ្វើឱ្យអាហារថ្ងៃត្រង់ធម្មតារបស់អ្នកស្រុកមើលទៅដូចជាពិធីលៀងសាយភោជនរបស់រាជវង្សដែលមានចានតូចៗជាច្រើននៅលើតុ។ វាស័ក្តិសមណាស់ ព្រោះតំបន់នេះជាទីតាំងនៃអតីតរាជធានីអធិរាជរបស់វៀតណាមគឺ ហ្វេ។

ក្រុងហ្វេល្បីល្បាញដោយសារបេតិកភណ្ឌអធិរាជ ក៏ដូចជាអាហារហឹររបស់ខ្លួន។ គ្មានដំណើរទៅកាន់ក្រុងហ្វេណាដែលពេញលេញដោយគ្មានការអង្គុយលើចិញ្ចើមផ្លូវ ស្រូបយករសជាតិស៊ុបហឹរពណ៌ក្រហមដ៏សម្បូរបែបនៃ bún bò Huế (គុយទាវសាច់គោហ្វេ) រហូតដល់តំណក់ចុងក្រោយនោះទេ។ ចាប់ពីប្រេងម្ទេស ម្ទេសម៉ត់ រហូតដល់ដំណាប់ម្ទេស ក្រុងហ្វេគឺជាត្បូងពេជ្រសម្រាប់អ្នកធ្វើដំណើរដែលចូលចិត្តអាហារហឹរខ្លាំង។ មិនចូលចិត្តអាហារហឹរមែនទេ? អ្នកអាចស្វែងយល់ពីពិភពដ៏អស្ចារ្យនៃម្ហូបអាហារក្រុងហ្វេតាមរយៈនំចំហុយដ៏ឆ្ងាញ់ពិសារ។ ក្រុងហ្វេល្បីល្បាញដោយសារនំចំហុយយ៉ាងច្រើនប្រភេទដែលមានសាច់នំទន់ល្មើយ គ្របពីលើដោយបង្គាស្រស់ ឬស្រកាបង្គា។ ប្រាកដណាស់ នំនីមួយៗមកជាមួយទឹកជ្រលក់ផ្ទាល់ខ្លួន។

ត្រូវបានចាត់ទុកថាជាចុងភៅដែលមានគំនិតច្នៃប្រឌិតបំផុតមួយចំនួននៅក្នុងប្រទេស ចុងភៅនៅភាគកណ្តាលវៀតណាមមានវិធីផ្ទាល់ខ្លួនយ៉ាងពិសេសក្នុងការបន្ថែមរសជាតិអាហារ។ នៅក្នុងមីមួយចានដ៏ឥតខ្ចោះ mì Quảng (មីក្វាង) សរសៃមីលឿងរមៀតត្រូវបានកាត់ដោយកាំបិតដែលជូតដោយប្រេងសណ្តែកដី។ សរសៃមីត្រូវបានជ្រមុជក្នុងទឹកស៊ុបតែប៉ុន្មានស្លាបព្រាប៉ុណ្ណោះ គ្របពីលើដោយបន្លែស្រស់ សាច់ជ្រូក ឬសាច់មាន់ ពងក្រួច សណ្តែកដីបុក នំស្រួយ និងម្ទេស។ ការឈប់នៅតូបលក់ដូរណាមួយក្នុងក្រុងហូយអាន សម្រាប់មី mì Quảng មួយចាននៅព្រឹកព្រលឹម គឺជាបទពិសោធន៍មួយដែលមិនអាចរំលងបាន។ មុខម្ហូបភាគខាងកណ្តាលវៀតណាមដ៏អស្ចារ្យគឺមិនអាចស្វែងរកបាននៅកន្លែងផ្សេងទៀតឡើយ ដូច្នេះសូមរីករាយជាមួយអាហារគ្រប់ពេលនៅទីនេះឱ្យអស់ពីចិត្ត។

សាកល្បង៖

O Lé Dumplings, 104/17/9 Kim Long, Huế 
Mì Quảng Bà Vị, 166 Lê Đình Dương, ខណ្ឌ Hải Châu, Đà Nẵng 

ភាគខាងត្បូង 

ដូចគ្នានឹងមនុស្សនៅទីនេះដែរ ម្ហូបអាហារភាគខាងត្បូងប្រទេសវៀតណាមមានការបើកចំហទទួលឥទ្ធិពលយ៉ាងច្រើន។ ប្រជាជនក្នុងតំបន់នៅទីក្រុងហូជីមិញបាននាំយករចនាប័ទ្មធ្វើម្ហូបផ្ទាល់ខ្លួនរបស់ពួកគេមកពីតំបន់ផ្សេងៗគ្នាជាច្រើននៃប្រទេសវៀតណាម ដោយបង្កើតបានជាមជ្ឈមណ្ឌលម្ហូបអាហារនៅក្នុងទីក្រុងនេះ។ ម្ហូបភាគខាងត្បូងជាច្រើនគឺសាមញ្ញ និងងាយស្រួលបរិភោគ។ ខុសពីអាហារមួយចំនួននៅភាគខាងជើងដែលមានលក់តែពេលថ្ងៃត្រង់ តូបលក់អាហារភាគច្រើននៅភាគខាងត្បូងវៀតណាមបើកទ្វារពេញមួយថ្ងៃ។ អាហារពេញនិយម cơm tấm (បាយបាក់) គឺជាអាហារពេលព្រឹក ថ្ងៃត្រង់ ឬល្ងាចយ៉ាងពិសេស។ ធ្វើឡើងពីគ្រាប់បាយបាក់ដែលមិនអាចលក់បាន អាហារដែលធ្លាប់តែសាមញ្ញមួយនេះ ឥឡូវនេះបានក្លាយជាមុខម្ហូបពិសេសប្រចាំតំបន់ភាគខាងត្បូង។ ទទួលទានជាមួយសាច់ជ្រូកអាំង និងសាច់ចិញ្ច្រាំចំហុយបែបវៀតណាម cơm tấm ត្រូវបានស្រោចពីលើដោយស្លឹកខ្ទឹម និងទឹកត្រីផ្អែមយ៉ាងឈ្ងុយឆ្ងាញ់។ តាមពិតទៅ ប្រសិនបើមានរសជាតិមួយដែលតំណាងឱ្យម្ហូបអាហារភាគខាងត្បូងវៀតណាម នោះគឺរសជាតិផ្អែម។  

ប្រជាជនវៀតណាមនៅភាគខាងត្បូងចូលចិត្តរសជាតិផ្អែមខ្លាំងណាស់។ ស្ករមួយចុងព្រាម ឬខ្ទិះដូងបន្តិចធ្វើឱ្យអ្វីៗគ្រប់យ៉ាងនៅទីនេះមានរសជាតិឆ្ងាញ់ជាងមុន។ Cá kho tộ (ត្រីខឆ្នាំងដី) ទទួលបានពណ៌ត្នោតចាស់ដ៏លេចធ្លោពីស្ករខរ។ ប្រឡាក់ជាមួយទឹកត្រី និងម្រេច ការរួមផ្សំរសជាតិផ្អែម និងប្រៃនេះជួយបន្ថែមលើរសជាតិធម្មជាតិរបស់ត្រី ធ្វើឱ្យ cá kho tộ មានរសជាតិឆ្ងាញ់ពោរពេញដោយឱជារស។ មុខម្ហូបនេះគឺជាតំណាងដ៏ល្អនៃអាហារភាគខាងត្បូង ហើយជាពិសេសគឺតំបន់វាលទំនាបទន្លេមេគង្គ។ វាមានរសជាតិផ្អែម រសជាតិដិត ព្រមទាំងប្រើប្រាស់ត្រីទឹកសាបមកពីទន្លេមេគង្គ។ 

តំបន់វាលទំនាបទន្លេមេគង្គដ៏ខៀវស្រងាត់គឺសម្បូរទៅដោយបន្លែបៃតង ត្រីទឹកសាប និងផ្លែឈើក្រៅតំបន់ក្ដៅយ៉ាងច្រើនសន្ធឹកសន្ធាប់។ អ្នកប្រាកដជាបានទទួលទានអាហារយ៉ាងឆ្ងាញ់នៅទីនេះ។ ដីដែលមានសារធាតុចិញ្ចឹមដ៏ជីជាតិ ពេលត្រូវបានបង្កបង្កើនផលដោយកសិករវៀតណាមដ៏ខិតខំប្រឹងប្រែង វាផ្តល់នូវផលដំណាំយ៉ាងល្អ និងផ្លែឈើដែលផ្អែមជាងគេនៅក្នុងប្រទេស។ បន្ទាប់ពីអុំទូកពេញមួយថ្ងៃតាមប្រឡាយតូចៗដែលព័ទ្ធជុំវិញដោយដើមកោងកាង ចានផ្លែស្រកានាគ មង្ឃុត ឬមានឃុតដែលបេះថ្មីៗ ជាមួយតែទឹកឃ្មុំ គឺជាអាហារសម្រន់ដ៏ពិសេសប្រចាំតំបន់វាលទំនាបទន្លេមេគង្គ។ ការទទួលទានអាហារនៅភាគខាងត្បូងគឺជាបទពិសោធន៍ដ៏ស្រួលៗ និងមិនប្រកាន់។ រូបមន្តធ្វើម្ហូបគឺសាមញ្ញ ហើយប្រជាជនមានភាពរាក់ទាក់។ ស៊ុបបន្លែលើកន្ទេលចើងកននៅឡរក្រោយផ្ទះ គឺជាវិធីដ៏ល្អមួយដើម្បីស្គាល់អ្នកស្រុក។ អ្នកនឹងឃើញថាពួកគេមានចិត្តសប្បុរស និងផ្អែមល្ហែមដូចជាផ្លែឈើដែលពួកគេដាំដុះដែរ។ 

សាកល្បង៖ 

Cơm tấm Nguyễn Phi Khanh, 113 Nguyễn Phi Khanh, ខណ្ឌ 1, HCMC
ផ្លែឈើស្រស់ៗនៅផ្សារអណ្តែត Cái Bè តំបន់វាលទំនាបទន្លេមេគង្គ 

ចង់បានគំនិតធ្វើដំណើរនៅវៀតណាមបន្ថែមទៀតទេ? ចុះឈ្មោះទទួលព្រឹត្តិបត្រព័ត៌មានរបស់យើង ដើម្បីទទួលបានអត្ថបទល្អៗបំផុតចូលក្នុងប្រអប់សំបុត្ររបស់អ្នក។