ເມື່ອເຂົ້າໜົມປັງຝຣັ່ງໄດ້ເຂົ້າມາຮອດຫວຽດນາມຫຼາຍກວ່າ 100 ປີກ່ອນ, ບໍ່ມີໃຜຄາດຄິດເລີຍວ່າ ມັນຈະປ່ຽນແປງວັດທະນະທຳອາຫານຫວຽດນາມໄປຕະຫຼອດກາລ. Bánh mì, ແຊນວິດແຄມທາງທີ່ເປັນທີ່ຮັກມັກຂອງຫຼາຍໆ ຄົນ, ປັດຈຸບັນແມ່ນໜຶ່ງໃນ ອາຫານຫວຽດນາມທີ່ເປັນເອກະລັກທີ່ສຸດ. ແຕ່ຄວາມລຽບງ່າຍທີ່ເຫັນນັ້ນອາດຈະລວງຕາ. ປະຊາຊົນທ້ອງຖິ່ນໄດ້ສ້າງສັນອາຫານຫຼັກນີ້ຄືນໃໝ່ຄັ້ງແລ້ວຄັ້ງເລົ່າ, ໃນທຸກໆ ແຈຂອງປະເທດ. ການຄົ້ນຫາ bánh mì ໃນຫວຽດນາມ ແມ່ນໜຶ່ງໃນການເດີນທາງທີ່ແຊບຊ້ອຍທີ່ສຸດທີ່ທ່ານສາມາດສຳຜັດໄດ້. ເພື່ອເລີ່ມຕົ້ນ, ດ້ານລຸ່ມນີ້ແມ່ນ 7 bánh mì ທີ່ທ່ານຕ້ອງລອງ.
ບົດທີ 01 —
Bánh mì sốt vang
ຕົ້ມຕຸນເນື້ອງົວໃສ່ເຫຼົ້າໄວແດງຟັງເບິ່ງຄືວ່າມັນຄວນຢູ່ໃນຮ້ານອາຫານລະດັບດາວມິຊະລິນ, ແຕ່ຄືກັນກັບອາຫານຫວຽດນາມທີ່ດີເລີດອື່ນໆ, ທ່ານສາມາດຊອກຫາອາຫານນີ້ໄດ້ງ່າຍໆ ຕາມຮ້ານແຄມທາງໃນຮ່າໂນ້ຍ. ຕົ້ມຕຸນທີ່ໄດ້ຮັບອິດທິພົນຈາກຝຣັ່ງນີ້ຖືກປຸງລົດຊາດດ້ວຍອົບເຊີຍ, ໂປ້ຍກັກ, ແລະ ຜັກຊີ. ຈີກເຂົ້າໜົມປັງເປັນຕອນໆ ແລ້ວຈຸ່ມລົງໃນນ້ຳຊຸບທີ່ເຂັ້ມຂຸ້ນ ແລະ ກົມກ່ອມ. ທ່ານຕ້ອງໄດ້ໃຊ້ຮູບແບບການກິນແບບລຸຍໆ ຈັກໜ້ອຍກັບ bánh mì sốt vang. ມັນໃຊ້ເວລາຫຼາຍຊົ່ວໂມງໃນການຕົ້ມຕຸນເຫຼົ້າໄວແດງໃຫ້ສົມບູນແບບ, ດັ່ງນັ້ນຄົນເຮືອນຄົວໃນຄອບຄົວຈຶ່ງເຮັດໝໍ້ໃຫຍ່ ແລະ ໃຊ້ກັບທັງເຂົ້າໜົມປັງ ແລະ phở. ແມ່ນແລ້ວ, ຕົ້ມຕຸນເນື້ອງົວເຫຼົ້າໄວແດງ phở ແມ່ນມີຢູ່ແທ້ໆ ແລະ ເປັນທີ່ນິຍົມຫຼາຍ.
ບົດທີ 02 —
Bánh mì heo quay
ຄວາມກອບໜ້ອຍຫຼາຍປານໃດຈຶ່ງຈະຖືວ່າຫຼາຍເກີນໄປ? ໃຜຈະໄປບອກໄດ້? ຢ່າງແນ່ນອນວ່າບໍ່ແມ່ນແຟນໆ ຂອງ bánh mì heo quay, ການດັດແປງໝູອົບຂອງ bánh mì ແບບດັ້ງເດີມ. ໝູສາມຊັ້ນອົບຕອນໜາກຖືກຍັດໄວ້ທາງໃນເຂົ້າໜົມປັງກອບ, ຢູ່ຂ້າງໆ ໝາກແຕ່ງ ແລະ ຫົວໄຊເຖົ້າດອງ. ມັນແມ່ນຄວາມສົມດຸນທີ່ດີເລີດຂອງສຳພັດອາຫານ. ຖະໜົນທັງສາຍໃນ ນະຄອນໂຮ່ຈີມິນ ຖືກອຸທິດໃຫ້ກັບ bánh mì heo quay, ບ່ອນທີ່ນັກຊິມອາຫານຕໍ່ແຖວທຸກໆ ເຊົ້າເພື່ອອາຫານເຊົ້າທີ່ເຂົາເຈົ້າຊອບມັກ. ບາງທີຄິດວ່າພວກເຮົາຍົກຍໍເກີນໄປບໍ? ລອງຊິມແຊນວິດນີ້ເບິ່ງແລ້ວທ່ານອາດຈະປ່ຽນໃຈ.
ບົດທີ 03 —
Bánh mì bò né
ການແປໂດຍກົງຂອງ bò né ແມ່ນ ‘ຫຼົບເນື້ອງົວ'. ແຕ່ບໍ່ແມ່ນເນື້ອງົວທີ່ທ່ານຕ້ອງການຫຼົບ, ມັນແມ່ນນ້ຳມັນຮ້ອນໆ ທີ່ຟົ້ງກະເດັນຈາກກະທະເຫຼັກຫຼໍ່ທີ່ໃຊ້ເສີຟ. ດ້ວຍເຫດໃດໜຶ່ງ, ຄົນຫວຽດນາມບາງຄົນໄດ້ຄົ້ນພົບວ່າ ສະເຕັກທີ່ຟົ້ງສຽງເດືອດໆ ຢູ່ ແມ່ນຄູ່ຫູທີ່ດີເລີດກັບເຂົ້າໜົມປັງ bánh mì. ໄຂ່ດາວເດືອດໆ, ປາເຕ, ໝາກເຂືອເທດ ແລະ ຜັກຫອມ ຕ່າງໆ ມາເຕີມເຕັມຄວາມໜ້າກິນນີ້. ໂດຍບໍ່ຕ້ອງເວົ້າເລີຍວ່າ, bánh mì bò né ທີ່ດີຕ້ອງການການກົ້ມຫຼົບຈັກໜ້ອຍເມື່ອມາຮອດທຳອິດ. ແຕ່ທ່ານຈະຮຽນຮູ້ການຫຼົບຫຼີກໄດ້ໃນບໍ່ຊ້າ. ເມື່ອຄວາມແຊບລະດັບນີ້ເປັນເດີມພັນ, ໃຜໆ ກໍຈະເຮັດໄດ້.
ບົດທີ 04 —
Bánh mì ốp la
ທຸກໆ ວັດທະນະທຳອາຫານມີເຂົ້າໜົມປັງ ແລະ ໄຂ່ ໃນຮູບແບບຂອງຕົນເອງ. ໃນນະຄອນໂຮ່ຈີມິນ, ມັນຖືກຮຽກວ່າ bánh mì ốp la, ໂດຍມີໄຂ່ດາວ ແລະ ເຂົ້າໜົມປັງຝຣັ່ງສົດໆ. Bánh mì ốp la ມັກຈະຖືກເສີຟໃນກະທະໂລຫະກັບ chả lụa (ຢໍໝູຫວຽດນາມນຶ່ງຫໍ່ໃບຕອງ) ທອດ, ຫຼື ໄຂ່ຈະຖືກໃສ່ລົງໃນເຂົ້າໜົມປັງອຸ່ນໆ ໂດຍກົງ, ແລະ ຍັດໃສ່ດ້ວຍຜັກດອງໝາກຫຸ່ງ ແລະ ກາລົດ, ຊອດພິກ ແລະ ຊີອິ້ວໜ້ອຍໜຶ່ງ. ໃນສະຖານທີ່ຄື ໂຮ້ຍອານ, bánh mì ốp la ກາຍເປັນ bánh mì trứng, ແລະ ຖືກຍັດດ້ວຍຜັກສະຫຼັດ, ໝາກເຂືອເທດ ແລະ ໝາກແຕ່ງຝານສົດໆ. bánh mì ນີ້ແມ່ນຕົວເລືອກທີ່ດີເລີດສຳລັບຄົນມັງສະວິຣັດທີ່ຕ້ອງການຊິມອາຫານວ່າງທີ່ມີຊື່ສຽງທີ່ສຸດຂອງຫວຽດນາມ.
ບົດທີ 05 —
Bánh mì thịt
Bánh mì thịt ແມ່ນຫຼັກຖານທີ່ວ່າທ່ານບໍ່ມີທາງຜິດຫວັງກັບຄວາມຄລາສສິກ. ບາງຄົນມັກເຂົ້າໜົມປັງກອບ, ບາງຄົນມັກນຸ້ມ, ແຕ່ໄສ້ທາງໃນແມ່ນດາລາທີ່ແທ້ຈິງຢູ່ທີ່ນີ້. bánh mì thịt ທີ່ຈັດເຕັມປະກອບດ້ວຍແຮມຫວຽດນາມຫຼາຍຊະນິດ, ໝູແດງ ຫຼື ໝູທອດ, ເນີ, ປາເຕ, ໝູຝອຍ, ກາລົດດອງ, ໝາກແຕ່ງ, ແລະ ຜັກຊີ. ຊອດສູດລັບເຊື່ອມທຸກຢ່າງເຂົ້າກັນ. ເຮັດຕາມແບບຄົນຫວຽດນາມ ແລະ ເພີດເພີນກັບ bánh mì thịt ຂອງທ່ານກັບ bạc xỉu (ກາເຟນົມເຢັນ) ຢູ່ແຄມທາງ. ມັນແມ່ນຊ່ວງເວລາທີ່ຕ້ອງໄດ້ສຳຜັດໃນຫວຽດນາມ.
ບົດທີ 06 —
Bánh mì chả cá
ຊິ້ນປາທອດ, ເຊິ່ງດັ້ງເດີມມາຈາກເມືອງຊາຍຝັ່ງ ຍາຈາງ, ກໍໄດ້ເຂົ້າມາຢູ່ໃນ bánh mì. ຊິ້ນປາທອດທີ່ດີທີ່ສຸດແມ່ນມີເອກະລັກຢູ່ທີ່ຄວາມໜຽວນຸ້ມ ແລະ ການປະສົມປະສານຂອງລົດຊາດອູມາມິຈາກປາຫຼາຍຊະນິດ ແລະ ຄວາມເຜັດຂອງພິກໄທດຳ. ສິ່ງເຫຼົ່ານີ້ຖືກທອດ, ແລ້ວໂລຍດ້ວຍຜັກຊີຫວຽດນາມທີ່ມີກິ່ນຫອມ, ແລະ ບາງຄັ້ງກໍມີໝາກແຕ່ງຝານກອບໆ, ຫຼື ຊີອິ້ວພິກກະທຽມ. ລົດຊາດທີ່ໜ້າຕື່ນເຕັ້ນເຫຼົ່ານີ້ທີ່ລະເບີດໃນທຸກໆ ຄຳໄດ້ເຮັດໃຫ້ແຊນວິດ bánh mì ນີ້ມີບ່ອນຢືນພິເສດໃນຫົວໃຈຂອງຄົນທາງພາກໃຕ້.
ບົດທີ 07 —
Bánh mì chấm sữa
ຄົນຫວຽດນາມຫຼາຍຄົນເຕີບໃຫຍ່ມາກັບນົມຂົ້ນຫວານກະປ໋ອງທີ່ຢູ່ໃນຕູ້. ວັດຖຸດິບທີ່ແຊບຊ້ອຍນີ້ມີສ່ວນຮ່ວມໃນອາຫານຫວານທີ່ດີເລີດຫຼາຍຢ່າງ. Bánh mì chấm sữa, ຫຼື ເຂົ້າໜົມປັງຈຸ່ມນົມຂົ້ນຫວານ, ແມ່ນອາຫານທີ່ໃຫ້ຄວາມອົບອຸ່ນໃຈທີ່ຜ່ານການພິສູດຕາມກາລະເວລາ. ຍ້ອນຫຍັງ? ກໍຍ້ອນວ່າ, ເຂົ້າໜົມປັງນຸ້ມໆ ທີ່ຊຶມຊັບນົມອຸ່ນໆ ຄຣີມມີ້ ນັ້ນຊ່ວຍໃຫ້ຮູ້ສຶກດີຢ່າງບອກບໍ່ຖືກ! ອາຫານວ່າງທີ່ຜ່ານການພິສູດນີ້ຊ່ວຍຟື້ນຄວາມຊົງຈຳໃນອະດີດທີ່ລຽບງ່າຍ, ເມື່ອອາຫານທີ່ມີແຄລໍຣີສູງແບບນີ້ບໍ່ມີຫຍັງນອກຈາກຄວາມສຸກ.
