ວັນທີ 9 ກໍລະກົດ 2019 (ຮາໂນ້ຍ, ຫວຽດນາມ) – ເລີ່ມຕັ້ງແຕ່ວັນທີ 1 ສິງຫາ 2019, Vietnam Airlines ຈະນຳໃຊ້ລະບົບ Piece Concept ສຳລັບໂຄຕາກະເປົາເດີນທາງໃນທຸກທ່ຽວບິນພາຍໃນປະເທດ ແລະ ລະຫວ່າງປະເທດ, ໂດຍປ່ຽນແທນລະບົບ Weight Concept ໃນປະຈຸບັນ. ພາຍໃຕ້ລະບົບ Piece Concept, ໂຄຕາກະເປົາເດີນທາງຟຣີແມ່ນຖືກກຳນົດໂດຍຈຳນວນຊິ້ນຂອງກະເປົາ ແທນທີ່ຈະເປັນນ້ຳໜັກລວມທັງໝົດທີ່ຜູ້ໂດຍສານສາມາດນຳໄປໄດ້. 

ຜູ້ໂດຍສານທີ່ຊື້ປີ້ກ່ອນວັນທີ 31 ກໍລະກົດ ຍັງຄົງມີສິດໄດ້ຮັບໂຄຕາກະເປົາເດີນທາງມາດຕະຖານຕາມທີ່ລະບຸໄວ້ໃນປີ້ທີ່ມີຢູ່ຂອງພວກເຂົາ. Vietnam Airlines ແນະນຳໃຫ້ທຸກຄົນທີ່ຈອງປີ້ຫຼັງຈາກວັນທີດັ່ງກ່າວ ກວດເບິ່ງນະໂຍບາຍກະເປົາເດີນທາງສຳລັບວັນທີເດີນທາງຂອງພວກເຂົາ.

ລະບົບ Piece Concept ຖືກນຳໃຊ້ໂດຍສາຍການບິນຕ່າງໆ ທົ່ວໂລກ ລວມທັງ Air France, British Airways, All Nippon Airways ແລະ Korean Air. ການປ່ຽນແປງນີ້ຈະເຮັດໃຫ້ນະໂຍບາຍຂອງ Vietnam Airlines ເປັນອັນໜຶ່ງອັນດຽວກັນກັບສາຍການບິນໃຫຍ່ອື່ນໆ, ໂດຍມອບຄວາມສະດວກສະບາຍເພີ່ມເຕີມໃຫ້ກັບຜູ້ໂດຍສານທີ່ມີທ່ຽວບິນຕໍ່ເຄື່ອງ.

ພາຍໃຕ້ນະໂຍບາຍໃໝ່, ຜູ້ໂດຍສານຊັ້ນທຸລະກິດ (Business Class) ຈະໄດ້ຮັບໂຄຕາຟຣີ 1 ຊິ້ນ (32 ກິໂລກຣາມ) ໃນເສັ້ນທາງພາຍໃນປະເທດຫວຽດນາມ ແລະ ຫວຽດນາມ - ອາຊີຕາເວັນອອກສ່ຽງໃຕ້, ແລະ 2 ຊິ້ນ (32 ກິໂລກຣາມ/ຊິ້ນ) ໃນເສັ້ນທາງ ຫວຽດນາມ - ອາຊີຕາເວັນອອກສ່ຽງເໜືອ, ອີຣົບ, ອົດສະຕຣາລີ ແລະ ສະຫະລັດອາເມຣິກາ.

ຜູ້ໂດຍສານຊັ້ນປະຢັດ (Economy Class) ມີສິດໂຫລດກະເປົາໄດ້ 1 ຊິ້ນ (23 ກິໂລກຣາມ) ໃນເສັ້ນທາງພາຍໃນປະເທດຫວຽດນາມ ແລະ ເສັ້ນທາງ ຫວຽດນາມ – ອາຊີຕາເວັນອອກສ່ຽງໃຕ້, ອາຊີຕາເວັນອອກສ່ຽງເໜືອ, ອີຣົບ ແລະ ອົດສະຕຣາລີ, ແລະ 2 ຊິ້ນ (23 ກິໂລກຣາມ/ຊິ້ນ) ໃນເສັ້ນທາງ ຫວຽດນາມ - ຍີ່ປຸ່ນ ແລະ ສະຫະລັດອາເມຣິກາ. 

ຜູ້ໂດຍສານຊັ້ນປະຢັດພຣີມ່ຽມ (Premium Economy) ຈະໄດ້ຮັບ 2 ຊິ້ນ (23 ກິໂລກຣາມ/ຊິ້ນ) ໃນເສັ້ນທາງ ຫວຽດນາມ - ອາຊີຕາເວັນອອກສ່ຽງເໜືອ, ອີຣົບ, ອົດສະຕຣາລີ ແລະ ສະຫະລັດອາເມຣິກາ ແລະ 1 ຊິ້ນ (32 ກິໂລກຣາມ) ໃນເສັ້ນທາງ ຮາໂນ້ຍ – ໂຮ່ຈີມິນ.

ສຳລັບກະເປົາຫິ້ວຂຶ້ນເຄື່ອງ, ຈຳນວນຊິ້ນທີ່ອະນຸຍາດຍັງຄົງຄືເກົ່າ, ແຕ່ນ້ຳໜັກສູງສຸດຂອງແຕ່ລະຊິ້ນຈະຖືກເພີ່ມຂຶ້ນ. ຜູ້ໂດຍສານຊັ້ນປະຢັດສາມາດນຳກະເປົາໄປໄດ້ 1 ຊິ້ນ ບວກກັບເຄື່ອງໃຊ້ສ່ວນຕົວຊິ້ນນ້ອຍ 1 ຊິ້ນ (ນ້ຳໜັກລວມບໍ່ເກີນ 12 ກິໂລກຣາມ) ໃນຂະນະທີ່ຜູ້ໂດຍສານຊັ້ນ Premium Economy ແລະ ຊັ້ນທຸລະກິດ ສາມາດນຳໄປໄດ້ 2 ຊິ້ນ ບວກກັບເຄື່ອງໃຊ້ສ່ວນຕົວຊິ້ນນ້ອຍ 1 ຊິ້ນ (ນ້ຳໜັກລວມບໍ່ເກີນ 18 ກິໂລກຣາມ.) ທັງໝົດນີ້ແມ່ນຢູ່ພາຍໃຕ້ຂໍ້ຈຳກັດຕາມທີ່ກຳນົດໄວ້.

ຜູ້ໂດຍສານຊັ້ນປະຢັດທີ່ເດີນທາງໃນທ່ຽວບິນຂອງ Vietnam Airlines ໄປ ແລະ ກັບຈາກ ອີຣົບ ແລະ ອົດສະຕຣາລີ ຕັ້ງແຕ່ວັນທີ 1 ສິງຫາ ຫາ 31 ທັນວາ 2019 ຈະໄດ້ຮັບໂຄຕາກະເປົາເດີນທາງເພີ່ມອີກ 1 ຊິ້ນ (23 ກິໂລກຣາມ.) Vietnam Airlines ຍັງຈະມອບສ່ວນຫຼຸດສູງສຸດເຖິງ 50% ສຳລັບການຊື້ລ່ວງໜ້າກ່ອນການເດີນທາງ ຕະຫຼອດຮອດຄ່າທຳນຽມກະເປົາເພີ່ມເຕີມ.

ກົດລະບຽບກະເປົາເດີນທາງໃໝ່ນີ້ມີຜົນບັງຄັບໃຊ້ກັບທ່ຽວບິນຂອງ Vietnam Airlines ເທົ່ານັ້ນ. ຜູ້ໂດຍສານທີ່ເດີນທາງໃນບໍລິການຕໍ່ເຄື່ອງກັບສາຍການບິນອື່ນ ຄວນກວດເບິ່ງນະໂຍບາຍກະເປົາເດີນທາງຂອງແຕ່ລະສາຍການບິນ.

ສຳລັບລາຍລະອຽດເພີ່ມເຕີມ, ກະລຸນາເຂົ້າເບິ່ງ ເວັບໄຊຂອງ Vietnam Airlines, ຫຼື ຕິດຕໍ່ຕົວແທນ, ຫ້ອງປີ້ ຫຼື ຝ່າຍບໍລິການລູກຄ້າຂອງ Vietnam Airlines ໄດ້ທີ່ +84 24 38320320.

 

---